Hilse: Budźemy Němsku postajować kaž Budyski wokrjesny sejmik
Hosćenc Karstenowa piwowa stwička w Pančicach-Kukowje běše wčera wječor kopaće połna, zapósłanc AfD w zwjazkowym sejmje Karsten Hilse je na temu „Wójnu? Abo měr!“ přeprosył.
Pančicy-Kukow (SN/mb). Jako rěčnik swojeje frakcije za klimu a energiju wěnowaše so Karsten Hilse, dwójce direktnje woleny zapósłanc wólbneho wokrjesa Budyšin 1, najprjedy „najwjetšej łži našeje doby“: zo je čłowjek změnu klimy zawinował. Wuhlikowy dioksid je „płun žiwjenja“, a tohodla nochce přećiwo spalowanskim motoram abo wuhlowym milinarnjam zakročić. Spěchowanje wětrnikow („šrederowaki ptačkow“) chce wotstronić a zaso atomowu milinu w Němskej produkować, wšako dyrbi naš kraj wopačneje zeleneje politiki dla stajnje milinu z wukraja importować.
Israel staja Hamas ultimatum
Tel Aviv (dpa/SN). Runje tak kaž prezident USA Donald Trump je nětko tež israelske knježerstwo Hamas ultimatum za pušćenje zastajencow stajiło. Jeli islamisća přichodnu skupinu zastajencow hač do soboty njepušća, móhł so přiměr skónčić a wójna w Gazaskim pasmje, kiž je w daloke měrje zničeny, zaso wudyrić. Tole hrožeše israelski ministerski prezident Benjamin Netanjahu. Hamas Israelej wumjetuje, zo přiměr rani a je termin pušćenja zastajencow wotprajiła.
Egyptowska za natwar Gazy
Kairo (dpa/SN). Hladajo na ćišć ze stron prezidenta USA Donalda Trumpa je tež Egyptowska swójski plan nowonatwara Gazaskeho pasma předstajiła. „Egyptowska potwjerdźi swoju wolu, wobšěrnu wiziju za nowonatwar Gazaskeho pasma předpołožić a tak zaručić, zo móža Palestinjenjo w swojej domiznje wostać a tam swoje prawa wužiwać“, zdźěla egyptowske wonkowne ministerstwo. Rozrisanje po puću dweju statow „wostanje jenički puć k měrej“.
Habeck předstaja swój plan
Policisća steja při železniskim přechodźe njedaloko Hamburga ...
Ukraina chce kónčiny wuměnić
Kijew (dpa/SN). Ukraina je po słowach prezidenta Wolodymyra Zelenskeho zwólniwa, sej teritorije z Ruskej wuměnić. Jeli so prezidentej USA Donaldej Trumpej poradźi, wójnskeju přećiwnikow za samsne blido přinjesć, „jedyn teritorij přećiwo druhemu wuměnimy“, rjekny Zelenskyj britiskej nowinje The Guardian. Kajke kónčny wón konkretnje měni, nowiny njepisaja. Ukrainske jednotki běchu loni w awgusće ruske kónčiny wokoło Kurska nadpadnyli a zdźěla wobsadźili. Najebać rusku ofensiwu woni přeco hišće dźěle kraja kontroluja.
W Kijewje su dźensa rano wjacore ruske rakety rozbuchnyli. Kaž měšćanosta Witali Kličko rozprawja, je při tym wobydler města žiwjenje přisadźił.
Volkswagen napominany
Kretschmer na nowych pućach
Drježdźany (dpa/SN). Sakski ministerski prezident Michael Kretschmer (CDU) je dźensa w krajnym sejmje swoju prěnju knježerstwowu deklaraciju w nowej legislaturnej dobje předstajił. Jeho narěč steješe pod hesłom „Zmužiće nowe puće kročić. W zamołwitosći za Saksku“.
Nowe knježerstwo dyrbi wšak woprawdźe po nowych pućach kročić, wšako ma Sakska prěni króć mjeńšinowe knježerstwo. CDU a SPD pobrachuje za swójsku wjetšinu dźesać hłosow. Sakski krajnym sejm ma 120 zapósłancow.
Za wothłosowanje trěbnu wjetšinu chce sej Kretschmer přez tak mjenowany konsultaciski mechanizm zaručić. Za to chce koalicija CDU a SPD jara zahe opoziciju w parlamenće do projektow zapřijeć a tež namjety druhich stron wobkedźbować. Wo wotpowědnym dojednanju chcychu w běhu dnja wothłosować.
Rěčeli su dźensa na próstwu AfD wo policajskim zasadźenju při zjězdźe strony w Riesy. Něhdźe 10 000 ludźi bě přećiwo zjězdej protestowało. Při tym dóńdźe tež k namócnosćam přećiwo delegatam.
Dwaj swětaj w Serbach
Wuběrk: Sylnišo z Pólskej dźěłać!
Berlin (dpa/SN). Wuběrk němskeho hospodarstwa za wuchodne naležnosće žada sej wot zwjazkoweho knježerstwa sylniše zasadźenje za hospodarsku kooperaciju z Pólskej. „Zhromadne dźěło mjez Berlinom a z wotstawkom najsylnišim wuchodnym wikowanskim partnerom Pólskej dyrbi nowu kwalitu docpěć“, rjekny předsydka wuběrka Catharina Claas-Mühlhäuser w Berlinje.
Z wikowanskim wobjimom nimale 172 miliardow eurow bě Pólska 2024 znowa pjaty najwjetši wikowanski partner zwjazkoweje republiki. Jako wiki za němske twory je Pólska Chinu ze štwórteho městna wutłóčiła, z datow Zwjazkoweho statistiskeho zarjada wuchadźa. „Dyrbimy Pólsku jako hospodarski sylny kraj bóle na wědomje brać, předsydka wuběra rjekny. Je to jedne z čłonskich krajow EU z raznje wuwiwacym so hospodarstwom. Pólska budźe tež wažny kraj we wobłuku europskich napinanjow při nowonatwarje Ukrainy, je sej Claas-Mühlhäuser wěsta. Přichodne zwjazkowe knježerstwo dyrbjało kóždolětne němsko-pólske knježerstwowe konsultacije na hospodarski wobłuk rozšěrić.
Dźesać ludźi morił
To a tamne (12.02.25)
Kedźbliwy pěšk je w přijimarni hódnotnych maćiznow w hornjej Bayerskej panteroweho chameleona ze styroporoweje tyzy wuchował. Zwěrjo z mjenom Lucifer běchu prawdźepodobnje strowotnych problemow dla wusadźili, fachowcy stacije za reptilije měnja. Muž bě škrabanje w tyzy słyšał a na kóčku tukał. Na to wuhladachu chameleona. Zwěrjo dyrbi nětko do karanteny. Wobsedźerjej hrozy pokuta ranjenja zakonja za škit zwěrjatow dla.
Wot junija minjeneho lěta w swětnišćowej staciji ISS čakacaj astronawtaj móžetaj so nětko snano tola prjedy na zemju wróćić hač myslene. NASA, swětnišćowy zarjada USA, je rozsudźił, zo bjeru za nawrót hižo raz wužiwanu kapslu typa „Dragon“. Poprawom chcychu čakać, doniž njeje nowa kapsla dotwarjena. To pak móhło trać. Trjebany nastroj steji porno tomu hižo w měrcu k dispoziciji.
