Dźakowano jara lochkemu wustupej swjećeše Jendźelska z dobyćom 6:2 přećiwo Iranej poměrnje jednory zazběh do turněra. Wočakowanjam wotpowědujo přewza Jendźelska hnydom ceptar hry. Po prěnjej šansy partije, kotruž měješe Maguire po standardnej situaciji, trjechi wón jenož wonkowny sak, dóńdźe hnydom k dołhemu přetorhnjenju. Wrotar Alirez Beiranvand a škitar Maijdo Hosseinijo (wobaj Iran) běštaj mócnje hromadźe zrazyłoj. Wrotar bu dlěje hač pjeć mjeńšin lěkowany, hraješe potom skrótka dale, dyrbješe pak so skónčnje ze zranjenym nosom wuměnić. Jako hra zaso běžeše, přińdźe Jendźelska po někotrych mjeńšinach poněčim do partije. Mount zwrěšći z krótkeje distancy na wonkownym saku a Maguire z hłowu na aluminiju. Potom dźěše dyr po dyru. Po rjanej hrajnej štafeće a dokładnej flance Shawa zhłójčkowa Bellingham k nawjedowanju 1:0 (35.). Za koparja Borussije Dortmund běchu to prěnje wrota za Jendźelsku (35.). Na to dźěše hnydom přećiwo pře husto njerjadowanej defensiwy Irana čile dale. Saka trjechi po předłoze Maguirya k 2:0 (43.), krótko na to zwyši Sterling na 3:0 (45. + 1).

Wojerowski FC II –­ SJ Chrósćicy II 1:1 (1:1)

Zestawa hosći: Škoda – Sćapan, Bětnar, Cyž, Mark, S. Handrik, Wornar, Domaška, C. Handrik, Liznar (87. Čornak), Žur

Na poslednju hru do zymskeje přestawki poda so druhe mustwo SJ Chrósćicy minjenu sobotu do Wojerec. Tam wočakowaše jich napjata hra, wšako stej mustwje w tabulce susodaj.

Po prěnim dnju holčeje kopańcy Zapadołužiskeho koparskeho zwjazka (WFV) zhromadnje ze zarjadowacymi towarstwami srjedź julija buchu za druhe zarjadowanje lětsa 14. nowembra lětniki 2010 do 2014 hišće raz přeprošene. Tež tónraz bě wothłós enormny. Něhdźe 50 holcow namaka so nawječor na nowym kumštnym trawniku při sportowym centrumje ST Zeleno-běłych w Halštrowje. Wot zažneje ćmy a předzymskich temperaturow njedachu so holcy pod swětłomjetakami a při wjele pohibowanju scyła mylić. Zamołwity za wokrjesnu wubranku we WFV Tino Gottlöber a jeho team nazwučowarkow a nazwučowarjow mějachu pjeć stacijow spřihotowanych, na kotrychž móžachu koparki swój talent w dribblingu, třělenju na wrota, kaž tež při małych hrajnych formach prezentować.

Trenarki a trenarjo podpěrowacych towarstwow móžachu sej znowa přehlad wysokeje ličby koparkow dorosta w Budyskim wokrjesu tworić. Na druhim boku bě tež wobkedźbować, zo je jara wjele wobdarjenych hrajerkow pódla, kotrež móžeše sej Tino Gottlöber za swoje kadery wokrjesnych wubrankow notěrować.