Widźał, słyšał, napisał (02.07.18)
Awtor dźensa
Tomaš Faska
Barjera skruplow bywa dźeń a niša. Hroženje z namocu abo samo nałožowana namóc, a to hač k najsurowišim złóstnistwam, wšědnje přiběra. To pokazuje so we wšědnym žiwjenju a specielnje tež w sporće. Njeměnju tu ani njefairnosć na hrajnišću, kaž dožiwjamy to lětsa na swětowych mišterstwach po mojim začuću trochu bóle dyžli hewak. Měnju předewšěm złóstniske zadźerženje tak mjenowanych „přiwisnikow“ napřećo sportowcam.
Cyle nowy drje zjaw njeje. Dopomńmy so na 2. julij lěta 1994. Dokładnje dźensa před 24 lětami bu narodny kopar Kolumbiskeje Andres Escobar před baru wot „fana kopańcy“ morjeny, dokelž bě něšto dnjow do toho w hrě přećiwo USA samowrota třělił. Jeho mustwo je tohodla tež 1:2 přěhrało a dyrbješe so z wubědźowanjom rozžohnować. Byrnjež tehdy 120 000 ludźi jeho ćěło k rowu přewodźało, byrnjež woprawdźići přiwisnicy kolumbiskeje wubranki k jeje hram hišće dźensa wobrazki Escobara při sebi měli a byrnjež za njeho lěta 2002 w měsće Medellínje pomnik stajili, njebě to kónc namocy přećiwo sportowcam, ale skerje zazběh.
Po prawidle fairplayja Japanska dale přišła
Pjeć narodnych cyłkow z Afriki bě za swětowe koparske mišterstwa w Ruskej kwalifikowanych, ale žane z nich njeje koło najlěpšich šěsnaće docpěło. Wčera měješe wubranka Senegala hišće šansu, přěhra pak poslednju skupinsku hru přećiwo mustwu Kolumbiskeje 0:1. Wrota za nje trjechi Yerry Mina po róžku z hłójčku (74.). Hižo w 31. min. pak dyrbješe kolumbiski superstar James Rodríguez trawnik zranjenja dla wopušćić. Hižo w prěnjej skupinskej partiji měješe wón problemy z muskulaturu a hraješe nětko jenož poł hodźiny. Při wšěm skwalifikowachu so Kolumbičenjo jako prěni stafle H za wosmifinale.
W paralelnym duelu podleža Japanska Pólskej z 0:1. Tu bě Jan Bednarek po wólnym kopje Rafała Kurzawy wuspěšny (59.). Najebać poražku pak je Japanska koło dale. Zhromadnje z narodnym mustwom Senegala měješe wona w skupinje samsny wrotowy kaž tež samsny dypkowy poměr. Tež mjezsobna partija bě 2:2 wušła. Tohodla je fairplay-prawidło rozsudźiło. We wosmifinalu nastupić smě kraj schadźaceho słónca, dokelž dósta dwě žołtej karće mjenje hač Senegal.
Sport (29.06.18)
Přihotowanske koparske hry
01.07. 17.00 Wubranka města Grodka
– FC Energija Choćebuz
07.07. 13.30 SZ Žylow
– FC Energija Choćebuz
11.07. 19:00 Přezjednota Niska
– Budissa Budyšin
14.07. 13:30 Módro-běli Kulow
– SC Mały Wosyk
15.07. 14:00 International Lipsk
– Budissa Budyšin
18.07. 18:30 Jednota Kamjenc
– Budissa Budyšin
04.08. 15:00 FSV Łuty
– Módro-běli Kulow
Šěsćdypkowa partija
Dźensa we 18.30 hodź. nastupi w Kulowje třeći wólnočasneje ligi Zapadołužiskeho koparskeho zwjazka přećiwo prěnjemu. Módro-běli Kulow wočakuja zastupnistwo Sokoła Ralbicy/Hórki. Te je dotal jenož jednu dypkowu hru přěhrało, a to doma přećiwo Kulowčanam. Jeli Sokoł dobudźe, móhł wón předskok na zakitowarja titula na šěsć dypkow rozšěrić.
Honja za bulom a keheluja
ST Rakecy přewjedźe 6. a 7. julija sportowy swjedźeń. Pjatk wot 18.30 hodź. wočakuje tamniša stara koparska garda hrajerjow Wojerowskeho FC. Kehelerjo wubědźuja so w samsnym času wo hejdušny pokal. Za sobotu je koparski turněr ze štyrjomi mustwami planowany. Za bulom honić chcedźa FSV Budissa Budyšin, Biskopičanske KT 08, Jednota Kamjenc a Rakečanske ST.
Hórki Róžant narunaja
Sport (28.06.18)
Aktualna tabulka wólnočasneje koparskeje ligi starych knjezow WFV
1. Sokoł Ralbicy/Hórki 9 37 : 9 24
2. Natwar Wojerecy 9 37 : 13 21
3. Módro-běli Kulow 9 18 : 8 20
4. HZ Hórnikecy/Ćisk 8 23 : 21 13
5. Jednota Wojerecy 8 9 : 15 12
6. Aktiwist Wojerecy 8 28 : 36 12
7. LSV Hory 9 19 : 13 10
8. HZ Rakecy/Šćeńca 7 8 : 15 7
9. HZ Bluń/Lubuš 8 9 : 16 4
10. Lok Wojerecy 9 8 : 50 0
Delenjo we Wojerecach jara sylnje hrali
Lok Wojerecy
– Sokoł Ralbicy/Hórki 1:8 (0:5)
Zestawa hosći: Mjetaš-Wowčer – Rychtar, Schultz, Matka, M. Žur, Jakubaš, Lulak, Šołta, Šwejda, Brückner, Hrjehor, Strelow, S. Žur, Krawc, Brězan
Na 7. hrajnym dnju wólnočasneje ligi starych knjezow Zapadołužiskeho koparskeho zwjazka wjedźeše jězba Sokoła Ralbicy/Hórki do Wojerowskeho stareho města k Lok Wojerecy. Lok drje steji z nul dypkami na poslednim městnje tabulki, tola hdys a hdys so jej překwapjenka radźi.
Snano cyle derje tak
Historiski dezaster, wulki debakl a zasłuženy kónc
Prěni raz w stawiznach swětowych koparskich mišterstwow je němske narodne mustwo hižo w předkole zwrěšćiło a domojjězbu nastupiło. Wčera podleža wone Južnokorejčanam z 0:2. Wrota třělichu ći w přidatnym hrajnym času. 1:0 Younga-Gwona Kima najprjedy njepłaćeše, dokelž bě pobóčny asistent nimohru spóznał. Sudnik Mark Geiger pak njepřewidnu scenu hišće raz na wobrazowce pruwowaše a rozsudźi na wrota. Posledni při bulu bě Toni Kroos (92.). W tej fazy hry wrotar Manuel Neuer swoje wrota wopušći, zo by so sobu do zadwělowanych nadběhow podał. Němcy pak bul zaso raz zhubichu a Son Heung-min zwyši po konteru na 2:0 (96.). Tři hry, tři słabe wukony, špatne wužiwanje wulkošansow, žadyn trěbny zapal. A k tomu su wjacori hrajerjo a po wšěm zdaću tež trenarjo a zamołwići hižo daloko přez swój cenit.
Nowy trenar
Detlef Scholze z Kulowa je nowy trenar prěnjeho koparskeho mustwa Módroběłych Kulow. 52lětny je ženjeny a nan dweju synow. Powołansce dźěła wón jako kładźer podłohow w firmje Graf & Maiwald. Jako šěsćlětny bě hižo pola Natwara Wojerecy za bulom honić započał. Pozdźišo šnórowaše wón kopački za Aktiwist Čornu Pumpu, Brězk, Zły Komorow a za Hrajne zjednoćenstwo Aktiwist Čorna Pumpa/FSV Wojerecy. Wot lěta 1995 je wrotar Módro-běłych Kulow, a čini to hač do dźensnišeho pola starych knjezow.
W prezidiju Módro-běłych wukonja Detlef Scholze funkciju sportoweho nawody. Přeco, hdyž ludźo pobrachowachu, je kaž wobornik wupomhał. Hižo trójce bě wón nazwučowar za wšelake mjezydoby. Wotnětka pak steji jako Kulowski šeftrenar při liniji. Werner Müller
Kónčna tabulka koparskeho dorostamłodźina C, wokrjesna liga, ...
Kónčna tabulka koparskeho dorosta
młodźina C, wokrjesna liga, stafla 1
1. Póst Germania Budyšin 18 106 : 16 52
2. Wulka Dubrawa/Radwor 18 116 : 29 43
3. ST Hnašecy-Dobruša 18 74 : 27 40
4. HZ Pančicy/Njebjelčicy 18 62 : 34 32
5. ST Porchow 18 45 : 46 31
6. HZ Horni kraj/Kumwałd 18 61 : 38 28
7. Kamjenc/Biskopicy II 18 38 : 69 18
8. ST Palow-Stachow 18 13 : 81 11
9. HZ Załom/Wernarjecy 18 14 : 82 10
10. HZ Huska/ST Hodźij 18 14 : 121 0
Zhromadnje z wuslědkom nula nula do wosmifinala
Z Francoskej a Danskej stej so cyłkaj prěni raz na swětowych koparskich mišterstwach w Ruskej bjez wrotow dźěliłoj. Wobaj pak stejitej we wosmifinalu. Francozojo kopachu z tak mjenowanym B-mustwom, wostachu pak na čole skupiny C. Trenar Didier Deschamps je swoju Équipe Tricolore hnydom na šěsć pozicijach změnił. Tak steješe na přikład Steve Mandana za Huga Llorisa we wrotach, a w nadběhu hraješe Thomas Lemar za superstara Kyliana Mbappéja.
W dalšej hrě wčerawšeho popołdnja měješe Awstralska z dobyćom hišće móžnosć, koło najlěpšich šěsnaćoch docpěć. Dźiw pak so njesta. Awstralčenjo podležachu wubrance Peruwa 0:2. Z direktnej třělwu trjechi za nju André Carillo we 18. min., a krótko po połčasu zwyši Paolo Guerrero na 2:0 (50.). Carillowe wrota běchu zdobom prěnje za Peru na swětowych mišterstwach po 36 lětach. Kosta Rika je tuž dotal jeničke mustwo na aktualnym turněrje bjez wrotoweho wuspěcha.
FCE trenuje za nowu ligu
FC Energija Choćebuz, postupnik do třećeje koparskeje ligi Němskeje, je přihoty na nowu sezonu zahajiła. Tydźenja dyrbjachu hrajerjo na test laktata a na medicinske přepytowanja. Na to započachu trenować. Sezona 2018/2019 započnje so wot 27. do 30. julija. Wot 23. decembra přizamknje so pjećtydźenska přestawka. Finalny hrajny dźeń budźe 18. meje, a po tym relegacija do druheje zwjazkoweje ligi. Wo relegaciji pak w Choćebuzu njerěča. Tam dźe jeničce wo to klasu dźeržeć, štož je hłowny zaměr FC Energije za přichodnu hrajnu dobu. Hrać budu łužiscy koparjo sobotu a njedźelu stajnje wot 14 hodź., pjatk a srjedź tydźenja wot 19 hodź.
Žadosćiwje wočakowany hrajny plan budźe hakle w běhu tydźenja wozjewjeny. Dokładny datum pak hišće znaty njeje. Zo by FCE derje přihotowana była, su zamołwići treningowe jednotki podlěšili. Zwjetša traje jedna tajka dwě hodźinje. Jeničku wotměnu tworja při tym testowe partije, kotrež maja trenarjam wažne dopóznaća wunjesć.
