Njewšědna městnosć přenocowanja přiwisnika „gruftijoweje sceny“ w Frankskej je pěška njesměrnje wustróžiła. Muž bě při wječornym wuchodźowanju z psom na parkowanišću w Zirndorfje čorny kašć wuhladał a policiju informował. Ta namaka w nim 26lětneho spicy. Wón bě sej kašć sam kupił a tak wuhotował, zo móžeše w nim přenocować. To chcyše nětko zaso raz činić, kaž zastojnikam rozłoži. Tući jeho namołwichu, sej přichodnje druhe spanske městno pytać.

Njesměrnje so wadźacy a samo do so bijacy porik dyrbjachu policisća na awtodróze A 4 změrować. Žona a muž běštaj so wčera hižo w awće na so roznjemdriłoj. Mjez Kodersdorfom a Zhorjelcom bije­štaj so na pobóčnej smuze awtodróhi, doniž zastojnicy nje­za­přimnychu. Dotal njeje znate, čehodla so wonaj wadźeštaj a hač staj so zaso wujednałoj.

Dóstanu spěchowanske pjenjezy

Choćebuz (dpa/SN/ch). Centrum za čłowjeske prawa w Choćebuzu dóstanje něhdźe 312 000 eurow spěchowanja wot Zwjazka a Kraja Braniborskeje hač do lěta 2016. Pjenjezy słuža wobdźěłanju sta­wiznow w bywšim Choćebuskim jastwje. Při přepodaću spěchowanskeje zdźělenki kulturny statny sekretar Martin Gorholt wčera zwurazni, zo je bywše jastwo NDR symbol potłóčowanja a politiskeho přesćěhanja za čas nacionalsocializma kaž tež sowjetskeje wobsadniskeje mocy a diktatury strony SED. Lěta 2007 załožene nošerske towarstwo Centruma za čłowjeske prawa Choćebuz je 2012 wopo­minanske a zetkawanske městno wote­wrěło a lěto pozdźišo trajnu wustajeńcu.

Podhlad zapalerstwa

Seehofer chce skutkownišu pomoc wot Zwjazka

Berlin/London (dpa/SN/K). Žołma ćěkancow nabywa rozměrow, zo to zamołwitym pomału přez hłowu rosće. K tomu přińdźe, zo dochadźa dale a husćišo k namócnym rozestajenjam w stanowych přebywanišćach, kaž kónc tydźenja w Drježdźanskim, hdźež běchu so při­słu- šnicy wšelakorych narodnosćow hroznje bili. Sakski minister za nutřkowne naležnosće Martin Ulbig (CDU) je hromadźe z dalšimi politikarjemi dźensa dopoł­dnja prowizoriske sydlišćo z tuchwilu 1 026 wobydlerjemi wopytał, zo by so wo połoženju próstwarjow wo azyl resp. wo atmosferje mjez nimi wobhonił. Kriti­zowało bě so, zo dyrbja ludźo přewusko hromadźe być a zo su hygieniske po­měry njedosahace.

Athen (dpa/SN). Ze stratami nimale 23 procentow je grjekska bursa dźensa po dobrym měsacu nanuzowaneje přestawki zaso wikować započała. Indeks grjekskich bankow so samo wo nimale 30 procentow sypny, kaž medije rozprawjeja. Grjekscy staćenjo smědźa tuchwilu jenož hišće akcije kupować, hdyž za to pjenjezy z wukrajnych kontow wužiwaja abo pjenjezy direktnje zapłaća. Za wukrajnych inwestorow porno tomu žane wobmjezowanja njepłaća. Knježerstwo bě bursu runje tak kaž wšitke banki kraja we wobłuku kontrole kapitala 29. junija zawrěło, zo njeby so system bankow zwjezł. Měsacy do toho běchu Grjekojo miliardy eurow wot swojich kontow wotzběhnyli, dokelž njemějachu nalutowanki hižo za wěste. Mnohim bankam hrožeše tohodla bankrot.