Nowa europska ciwilna raketa Ariane 6 je wuspěšnje do swětnišća wotlećała. ­Raketa je po planje na europskim swět­nišćowym zepěranišću Kourou w Francoskej Guayanje na komercielny lět startowała. Wšitke nastroje perfektnje dźě­łachu. Transportowany satelit su na ­prawym městnje w swětnišću wusadźili. Satelit dźěła za francoske wójsko. Prěni lět bě Ariane 6 loni w lěću w dalokej ­měrje wuspěšnje zmištrowała.

Swětnišćowy program „Starship“ Elona Muska je dalšu poražku poćerpjeł. Najwjetši hdy natwarjeny raketowy system swětnišćowych stawiznow njeje swój ­testowy lět po planje wotzamknyć móhł. Po wotlěće bě „Starship“ njeplanowanu demontažu poćerpjeł, na čož kontakt k rakeće zhubichu, předewzaće SpaceX w USA zdźěla. Raketa so rozpušći a padny do morja. Nichtó so njezrani.

Politiska popjelna srjeda sakskeje CDU, kotruž zapósłanc strony Marko Šiman wot lěta 1993 zarjaduje, je dale woblubowane zarjadowanje. Tole je so tež wčera zaso pokazało.

Budyšin (SN/MkWj). Połnje wobsadźena bě Budyska „Króna“ wčera z hosćimi, kotřiž běchu na mjeztym 31. politisku popjelnu srjedu sakskeje CDU přichwatali. Serbski zapósłanc CDU w Sakskim krajnym sejmje Marko Šiman, hłowny zamołwity tradicionalneho zarjadowanja, witaše zaso zajimawych hosći: Přeprosył bě sej wón lětsa wulkopósłanca Madźarskeje republiki w Němskej Pétera Györkösa a bywšeho prezidenta Sakskeho krajneho sejma dr. Matthiasa Rößlera (CDU). W žurli bě tež tójšto Serbow.

Madźarski hósć skedźbni w swojej narěči na historiske styki, kotrež sahaja hač do 15. lětstotka. Tehdy słušeše Hornja Łužica 21 lět k Madźarskemu kralestwu. Hordźe Györkös rozprawješe, zo je w Budyskim měšćanskim archiwje wotpowědne wopisma widźał.

Drježdźany (SN). Ličba prawicarskich njeskutkow je w lěće 2024 razantnje stupała. Tole wozjewištej nowinarska agentura dpa kaž tež frakcija Lěwicy w sakskim krajnym sejmje. Zapósłanča Juliane Nagel praša so statneho knježerstwa mjenujcy měsačnje za padami politisce motiwowaneje namocy. Statne knježerstwo je nachwilne ličby nětko wozjewiło: Dohromady zliči policija loni 4200 njeskutkow z prawicarskim pozadkom. To je přerěznje wjace hač jědnaće na dźeń a telko kaž hišće ženje do toho w swobodnym staće. W lěće 2023 běchu hišće 2704 njeskutkow zličili. Najwjace z přeńdźenjow (79 proc.) su tak mjenowane propagandistiske njeskutki, štož woznamjenja wužiwanje znamjenjow organizacijow, kotrež wustawje njewotpowěduja abo su teroristiske, tež našćuwanje ludu liči do tutych padow. W statistice namaka pak so tež 105 padow zranjenja ćěła, kotrež so hłownje přećiwo migrantam měrjachu. Wokrjes Budyšin steji z dohromady 363 njeskutkami na štwórtym městnje za Lipskom, Drježdźanami a wokrjesom Šwikawa.

Bonn (dpa/SN). Póst šmórnje w Němskej hač do kónc lěta 8 000 dźěłowych městnow. Potrjechena je wotnožka za listy a pakety, w kotrejž dźěła tuchwilu 187 000 přistajenych. Štyri procenty tutych dźěłowych městnow chcedźa wottwarić. Zwoprawdźić ma so tole na socialnje znjesliwe wašnje. Lutowanje wuskutkuje so na globalnje dźěłacu logistisku wotnožki DHL ze 600 000 sobudźěłaćerjemi. Přiběrace kóšty a woteběracy dobytk koncern poćežuja.

USA so Ukrainje přibližuja

Washington (dpa/SN). Po eklaće w Běłym domje a přetorhnjenym dodawanju brónjow so knježerstwo USA po swójskich informacijach zaso Ukrainje přibližuje. „Hibamy so do pozitiwneho směra“, rjekny poradźowar za wěstotne prašenja Mike Waltz sćelakej Fox News. Tuchwilu rěča z Ukrainu wo tym, hdy a hdźe móhli so zastupnicy zetkać. Tež namjety za polěpšenje mjezsobneje dowěry tuchwilu zdźěłuja. Plan chcedźa Ruskej předpołožić.

Bamž dźeń w křesle přežiwił