Wuslědki wólbow wužaduja tež Serbow
W reakciji na wólby zwjazkoweho sejma je předsyda Domowiny Dawid Statnik přilubił, zhromadnje z mjeńšinowej radu přichodne knježerstwo w zajimje narodnych mjeńšin wužadać.
To a tamne (25.02.25)
Zwada mjez žonu a jeje partnerom na awtodróze A 4 mjez Drježdźanami a Zhorjelcom je zasadźenje policije zawiniła. 31lětna žona bě so předwčerawšim, njedźelu z mužom zwadźiła a je z parkowanišća „Lubijska woda“ prosće bjez njeho wotjěła, policija zdźěli. Muž na to spytaše, pěši dale hić. Šoferojo pěška na kromje awtodróhi wuhladachu a informowachu policiju. Zastojnicy muža sobu wzachu a dowjezechu jeho na dwórnišćo. Hač je so porik wujednał, njeje znate.
Nakładne awto ze 162 žiwymi swinjemi je so na awtodróze A 2 pola sewjerorynsko-westfalskeho Hamma powaliło. Něhdźe 30 zwěrjatow na to do bliskeho lěsa ćekny. Někotre při njezbožu zahinychu. A 2 bě wjacore hodźiny dospołnje zawrjena. Wobchad haćeše so na 16 kilometrow. Ratar z bliskeje wsy za swinjemi honješe. Hač je wšitke dosahnył, njeje znate.
Politiske zemjerženje w Serbach
AfD tež we Worklecach a Njebjelčicach najsylniša strona – CDU chce z ludnosću bóle rěčeć
Berlin/Budyšin (SN/mb). Prěni raz njeje CDU w dwěmaj gmejnomaj katolskich Serbow wjac najsylniša strona. Na wčerawšich wólbach do zwjazkoweho sejma je AfD we Worklecach 37,8% dóstała (CDU 29,3). Přirost za módru stronu wučinja 14,9%, minus za CDU 2,3%. SPD spadny tule wo 8,2 na jenož hišće 5,2%. Tež w Njebjelčicach steji AfD nětko z 34,8% před CDU (32,2) na prěnim městnje (wšě ličby tuteju gmejnow bjez hłosow listowych wólbow). Kulow tohorunja wjac do „čorneje kupy w módrym morju“ njesłuša: AfD stopnjowaše so wo 12,6% na 39,1% (CDU 30,6%).
Dźensa před třomi lětami Ruska Ukrainu nadpadnyła – zhladowanja ...
Po Mnichowskim zrěčenju z lěta 1938 bě Winston Churchill prajił: „Naše knježerstwo móžeše wolić mjez hańbu a wójnu. Wone je so za hańbu rozsudźiło, ale wójna je njewobeńdźomna.“
Wulka Britaniska a Francoska běštej wobzamknyłoj, demokratiski a suwereny stat – Čěskosłowaksku – diktatorej do rukow dać. Čechow a Słowakow so nichtó za jich měnjenjom prašał njeje. Přerada sta so njedźiwajo jich njewotwisnosće a jich prawa, wo swójskim staće, swojim wosudźe a swojim žiwjenju rozsudźeć.
Wězo so stawizny njewospjetuja. Ale bohužel so ludźo w podobnych situacijach podobnje zadźeržuja, to rěka, zo činja podobne zmylki.
Merz chce spěšnje jednać
Unija CDU/CSU wólby zwjazkoweho sejma dobyła – AfD na wuchodźe prědku
Berlin (dpa/SN). Unija CDU/CSU z kanclerskim kandidatom Friedrichom Merzom na čole je wólby zwjazkoweho sejma jasnje dobyła. Předsyda CDU je připowědźił, zo chce nowe zwjazkowe knježerstwo hač k jutram wutworić, dotal pak njeje hišće jasne, z kim. Zwjazkowy kancler Olaf Scholz je poražku swojeje SPD mjeztym přiznał. Strona leži za AfD, kotraž je swój wuslědk podwojiła. Scholz je připowědźił, zo njebudźe w nowym knježerstwje sobu skutkować.
Po dotalnym wuličenju je so unija CDU/CSU na 28,5 procentow polěpšiła (2021: 24,1 procent). Při wšěm je to druhi najšpatniši wuslědk unije. AfD docpěwa 20,8 procentow (10,4 procenty). SPD kanclera Olafa Scholza je dramatisce na najšpatniši wuslědk po 1949 spadnyła a docpěwa runje hišće 16,5 procentow (2021: 25,7 procentow). Zeleni z kanclerskim kandidatom Robertom Habeckom spadnu na 11,6 procentow. Lěwica polěpši so jasnje na 8,7 procentow (4,9). FDP nima z 4,3 procentami ani wjace połojcu hłosow z lěta 2021 (11,4) a njebudźe runje tak kaž BSW (4,97 procentow) hižo w zwjazkowym sejmje zastupjena.
Wulka njewěstosć
Bonn (B/SN). Prezident USA Donald Trump je spěchowanje wuwićowych pomocnych naprawow w USA (USAID) z 10 000 sobudźěłaćerjemi a z lětnym budgetom 40 miliardow dolarow na 90 dnjow wusadźił. Tež cyrkwinske pomocne skutki w Němskej kaž Adveniat, Missio a Renovabis su potrjechene.
Złoty templ
Amritsar (B/SN). W indiskim měsće Amritsar steji w kumštnym jězorje wulki złoty templ z 15. lětstotka za 25 do 20 milionow přisłušnikow nabožiny sikh. Woni wěrja do jeničkeho stworićela a do jenakosće wšěch ludźi. Na najwažnišim městnje wěriwych kóždy dźeń wurězki ze swjateje knihi, přewodźane z cunjej hudźbu, čitaja. Mužojo-sikhojo njesmědźa sej włosy třihać a žadyn turban nosyć. Woni noša naručnicy a mały mječ.
List ameriskim biskopam
Najebać poražku dźakowaše so něhdyša zapósłanča zwjazkoweho ...
Ralbičan šula bě mnohim wjesnjanam městno, swoje wólbne prawo ...
Macron pola Trumpa
Washington (dpa/SN). Prezident USA Donald Trump wočakowaše dźensa francoskeho prezidenta Emmanuela Macrona w Běłym domje we Washingtonje. Centralna tema rozmołwow bě po informacijach prezidentskeho palasta w Parisu 3. róčnica ruskeho wojerskeho nadpada na Ukrainu. Hladajo na postupowanje Trumpa bě Macron minjene dny z europskimi statnikami na krizowym posedźenju wo reakciji EU wuradźował a po tym z Trumpom telefonował.
Wjerškowe zetkanje w Kijewje
Kijew (dpa/SN). Składnostnje třećeje róčnicy inwazije Ruskeje w Ukrainje wočakowachu w Kijewje dźensa prezidentku komisije EU Ursulu von der Leyen a druhich načolnych politikarjow. Hosćo chcedźa so na wot ukrainskeho prezidenta Wolodymyra Zelenskeho organizowanym wjerškowym zetkanju wobdźělić a swoju solidaritu zwuraznić. Zetkanje je wosebje wažne, po tym zo bě nowy prezident USA Donald Trump připowědźił, wojersku pomoc za Ukrainu skónčić.
Nasrallah wulce pochowany
