Brüssel (dpa/K/SN). Wonkowni ministrojo statow Europskeje unije wjedu dźensa a jutře rozmołwy wo přistupje Turkowskeje k EU. Zda wšak so to być přewšo twjerdy worjech, chce dźě awstriski wonkowny minister Sebastian Kurz dalše jednanja wo tym blokować a ma za to podpěru Nižozemskeje kaž tež Bołharskeje. Prezident komisije EU Jean-Claude Juncker je porno tomu za to, wotpowědne rozmołwy dale wjesć, za čož je so tohorunja prezident Europskeho parlamenta Martin Schulz wuprajił. Šef Zelenych Cem Özdemir k tomu měni, zo wón woprawdźe njemóhł rjec, z čim bychu sej Erdoğan a wukonjerjo jeho wole dalewjedźenje rozmołwow zasłužili.

Budyšin (SN/MkWj). Bjez wuslědka skónčiło je so posedźenje wo prašenju serbskeho zastupnistwa w šulskich naležnosćach minjeny pjatk w Budyšinje. W Serbskim domje běchu so mjez druhim předsyda Domowiny Dawid Statnik a jednaćel Marko Kowar za Domowinu, zapósłanča CDU w zwjazkowym sejmje Marja Michałkowa a Leńka Thomasowa za serbsku radu Sakskeje z předsydstwom Serbskeho šulskeho towarstwa zešli. Přitomny bě tež zapósłanc CDU w Sakskim krajnym sejmje Marko Šiman.

W srjedźišću wuradźowanja steješe prašenje, kak hodźeli so serbske zajimy w nowym šulskim zakonju kraja najlěpje zrjadować. Minjene 20 lět bě to nadawk Serbskeho šulskeho towarstwa. Mjeztym je w mnohich dokumentach, kaž na přikład w sakskim regionalnym planje, zakótwjene, zo maja w serbskich naležnosćach „zastupnicy­ zajimow Serbow“ sobu rěčeć. Po posedźenju rjekny Marja Michałkowa: „Bě to spomóžna rozmołwa. Sym sej wěsta, zo rozrisanje bórze namakamy.“ W januaru chcedźa so znowa schadźować.

Z njesmilnosću a dalšej namocu chce turkowski prezident Erdoğan na najnowšej bombowej nadpadaj reagować, kotrejž běštej sej sobotu w Istanbulu 44 smjertnych woporow žadałoj. Hižo je wón wjace hač sto pro-kurdiskich politikarjow zajeć dał. Směmy z toho wuchadźeć, zo so spirala namocy w Turkowskej dale wjerći a zo su nowe atentaty a wotpowědne reakcije na nje jenož prašenje časa. To wězo tych pohonja, kotřiž sej žadaja rozmołwy wo přistupje Turkowskeje k Europskej uniji skónčnje přetorhnyć a tak Erdoğanej durje před nosom zaprasnyć. To pak by bjezdwěla wulki zmylk był. Turkowska je z EU wusko hospodarsce, strategisce a čło­wjesce dawno wusko splećena. Tajke styki njemóžeš zničić. Dyrbimy je hajić, runje w časach, hdyž bombowe atentaty kraj střasu a ludźi znjeměrnjeja. Nic naposledk njesměmy zabyć: Turkowska je wo wjele wjace hač Erdoğan. Marko Wjeńka

Konferenca so z energijowej změnu zaběrała

Čorna Pumpa (SN/BŠe). Energijowa změna je formujomna! To je wuslědk konferency pod hesłom „Rewěrowy transfer“ Łužiskeho kruha zańdźeny pjatk w Čornej Pumpje, na kotrejž wobdźělichu so zastupjerjo komunow, Europskeje unije kaž tež Zwjazka a krajneju knježerstwow Sakskeje a Braniborskeje.

„Energijowa změna měła so socialnje sprawnje přewjesć“, wuzběhny zastu­pjerka Europskeje komisije za brunicu a energiju Aleksandra Tomczak. Wona připowědźi, zo zahaji klětu w prěnim połlěće program, kotryž ma regiony kaž Łužicu podpěrać. Tak namołwješe wobdźělnikow, zapodać projekty a temy. Wosebje narěčany je w tymle zwisku Łužiski kruh z rěčnikomaj, Grodkowskej měšćanostku Christinu Herntier (njestronjanka) a Běłowodźanskim wyšim měšćanostu Torstenom Pötzschom (Klartext).