30 000 eurow namakachu dźěći w Gundelfingenje pola Freiburga, jako běchu po puću do šule – a su so jako sprawni namakarjo wopokazali. Kaž policija zdźěli, běchu šulerjo w starobje 12 do 13 lět wčera na kromje wsy wjacore baliki pjenjez namakali a na policajsku stražu donjesli. Tam napisachu jim zastojnicy zamołwjenje, wšako dźěći swojeje sprawnosće dla spočatk wučby zapasechu. Policija dotal njewě, zwotkel pjenjezy pochadźeja.

Tójšto mjerzanja napara sej farar w norwegskim Gjerdrumje, po tym zo je z dźesaćlětnymi šulerjemi pohrjeb „hrał“. Komuna jako nošerka šule je jemu tole mjeztym zakazała. Duchowny bě šulerjow kašć njesć dał. Kritiku wón wotpokazuje: Smjerć je dźensa mnohim wulki tabu. Dźěći pak maja tójšto prašenjow. Wopyt cyrkwje je dźěl wučbneho plana.

Berlin (dpa/SN). Zwjazkowa kanclerka Angela Merkel (CDU) je přećiwo zawěranju Němskeje w zwisku z mjezynarodnymi krizami a njewěstosćemi warnowała. Tak měli zhromadnje z druhimi krajemi za globalizaciju skutkować, rjekny kanclerka dźensa w Berlinje na generalnej debaće zwjazkoweho sejma wo etaće 2017. Klětu přewozmje Němska prezidentstwo 20 wodźacych industrijnych a wuwiwacych so krajow swěta.­ Ćežišćo ma wuše zhromadne dźěło z Afriku być, ale nic jenož na ćěkancow wusměrjene.

Trumpa akceptować

Istanbul (dpa/SN). Turkowski statny prezident Recep Tayyip Erdoğan je přichodneho prezidenta USA Donalda Trumpa před kritikarjemi z Europy a USA­ zaki­tował. „Hdyž někoho za diktatora pomjenuja, je to derje tak“, rjekny Erdoğan dźensa na konferency islamskich statow w Istanbulu. Dale wón Europje wumjetowaše, zo wuslědki wólbow w USA njeakceptuje. „Trump bu demokratisce woleny, respektujće to.“

876 lětow wupadnyło

Rěčicy/Budyšin (SN/BŠe). „Mjeztym twarimy twjerdźizny, zo bychmy swój skót před wjelkom škitali“, podšmórny Carola Tuschmo wčera na demonstraciji přećiwo wjelčemu managementej. Něhdźe 200 ludźi bě na Budyske Žitne wiki přišło. Wulki dźěl z nich běchu wowčerjo a dalši, kotřiž běchu hižo swoje nazhonjenja z rubježnym zwěrjećom činili. W chětro emocionalnej debaće organizatorka zarjadowanja rozłoži, zo so problemy potrjechenych hižo chutnje njebjeru.

Nětko je tež łužiski wjelči běrow ze sydłom w Rěčicach reagował a zdźělenku z wotmołwami na wšelake prašenja zestajał. Tak wottam na přikład rěka, zo njejsu so škitne kriterije ze zawjedźenjom spěchowanskeje směrnicy z lěta 2008 změnili. Hłownje čerpa wjelči management z nazhonjenjow tamnych europskich krajow, hdźež su tohorunja wjelki. Skót na pastwach dźeržeć je bjezdwěla móžno, jeli so škitne naprawy wobkedźbuja. W padźe problematiskeje Róžeńčanskeje wjelčeje črjódy chce management přichodnje po teritoriju wěsćiše škitne metody zawjesć. Jeli wone potom hižo njedosahaja, měł so wjelk w najhóršim padźe „wotstronić“.