Bjezdźěłny? Čehodla njestanješ so to ze zaprajerjom? Nižozemski dźěłowy zarjad płaći bjezdźěłnym wukubłanje na „spirituelneho telefoniskeho poradźowarja“. Sydom bjezdźěłnym su za to dotal wotpowědne pjenjezy wupłaćili, kaž rěčnik zarjada nižozemskemu rozhłosej wobkrući. Priwatne předewzaće zajimcow za něhdźe tysac eurow nawuči, kak maja z kartow čitać abo dóńt čłowjeka w škleńčanej kuli spóznać. Tež reinkarnaciju – wožiwjenje zemrětych – tam poskićeja.
Na wšě 15 wosobow w jednym awće je policija při kontroli w Badensko-Württembergskej zwěsćiła. Dźesać dorosćenych a pjeć dźěći běchu po puću do Španiskeje, zo bychu tam na žnjach pomhali. Zastojnicy policije klučiki awta sćazachu, dokelž běchu 35lětneho šofera a jeho sobujěducych hižo dźeń do toho zadźerželi a jim dalejězbu zakazali.
Předewzaćeljo na wopyće
Čorna Pumpa (SN/ch). Na přeprošenje twarskeho předewzaća ASG Grodk je delegacija egyptowskich předewzaćelow, inwestorow, hospodarskich spěchowarjow a wuwiwarjow projektow industrijnišćo w Čornej Pumpje wopytała. Wosebje zajimowali su so egyptowscy fachowcy za tamniši management. Informacija, zo planuje zwjazkowe knježerstwo bórzomny kónc zmilinjenja brunicy, pak jich chětro zadźiwa. W Egyptowskej wšak planuja wjacore nowe brunicowe milinarnje twarić, trěbny knowhow maja tuchwilu z Indiskeje.
Łužiska Nysa renaturěrowana
Moskwa/Rom (dpa/SN). Po wjeršku G 7 minjeny kónc tydźenja je ruski prezident Wladimir Putin zhromadne dźěło ze skupinu wodźacych hospodarskich krajow wuzamknył. Ruska je najebać to zwólniwa k bilateralnym kontaktam z čłonskimi statami G 7, praji Putin na wopyće w Italskej. Něhdy bě Ruska z gremijom dźěłała a ze swojim alternatiwnym zhladowanjam dźěło G 7 přisporjała. Ukrainskeje krizy dla su Rusku loni z formata G 8 wuzamknyli.
Na zetkanju Putina z bamžom Franciskusom we Vatikanje je swjaty wótc Putina namołwił, aktiwnje so prócować wo měr a dodźeržeć Minšćanske dojednanja. Wažne po słowach bamža je, zo so fatalne humanitarne połoženje ukrainskeje ludnosće najspěšnišo skónči.
Njebjelčicy (MWa/SN). Čłonojo iniciatiwneje skupiny Serbski sejmik su so wčera w Njebjelčicach na doskónčny tekst wo zakonskich prawach Serbow za wutworjenje demokratiskeho parlamenta jako politiskeho zastupnistwa Serbow dojednali. Kaž rěčnik iniciatiwneje skupiny dr. Měrćin Wałda zdźěli, je dosć naćiskow předležało za próstwu wo zakonjedawske jednanje, wutworić ramikowe wuměnjenja za demokratisce legitimowane ludowe zastupnistwo serbskeho ludu. Přinošowali su k tomu mjez druhim rady ekspertow mjezynarodneho prawa a juristow. „Woni potwjerdźeja, zo njetrjebaja Serbja stajnje so zakitujo argumentować, zo su lud a zo maja prawa kaž kóždy druhi narod. Njetrjebaja so tuž demokratiskich wólbow bojeć“, dr. Wałda piše.
Zwjazkowy sejm wobjednawa dźensa reformu struktury medicinskeho zastaranja. Z wotpowědnym zakonjom wotmysli wulka koalicija změnić zasydlenosć lěkarjow w Němskej. Nadzastaranje w husće wobydlenych regionach ma so skónčić, podzastaranje na wsach přewinyć.
Berlin (dpa/SN/K). Zjednoćenstwa regionalnych kasowych lěkarjow změja winowatosć, zarjadować terminowe serwisownje, zo bychu zawěsćeni, je-li trjeba, w běhu štyrjoch njedźel z přepokazanku termin pola fachoweho lěkarja měli. Njedyrbjało-li to móžno być, měła pacientej tež chorownja pomhać.
Tak mjenowany čorny dźěłaćer je spytał swojeho šefa na hłownym cłownym zarjedźe wozjewić. Twarski dźěłaćer bě někotre tydźenje na wšelakich twarnišćach zasadźeny, njedóstawaše pak žanu mzdu. Zastojnicy wšak zwěsćichu, zo nima 34lětny scyła dowolnosć přebywanja w Němskej. Nětko ma kraj najspěšnišo wopušćić. Šef pak změje so ilegalneho přizwolenja dźěła dla zamołwić.
Jako slepy pasažěr bě 22lětny z nakładnym ćahom w Bayerskej po puću. 22lětny chcyše z awtami nakładowany ćah wužiwać, zo by wot Mnichowa do Strasbourga jěł. Lokomotiwnik młodeho Texasčana po něhdźe hodźinje jězby blisko Augsburga wuhlada, zadźerža ćah a přepoda młodźenca policiji. Muž njebě wopity a njesteješe tež pod drogami. Wón přizna, zo bě w Mnichowje na ćah zalězł. Nětko čaka na njeho pokuta.