PJATY wólnočasny volleyballowy turněr serije „top-šěsć“ skónči so w Ralbičanskej hali z dobyćom Viktorije Worklecy před wučerjemi Serbskeho gymnazija Budyšin (SGB) a Žołto-módrymi Kulow. Po ptačokwasnym volleyballowym turněrje srjedź januara w Kulowje dojědźe sej šěsć wólnočasnych mustwow minjeny štwórtk do Ralbic, zo bychu přewjedli 5. turněr z mjenom „Witamy nalěćo“. Wutrobny dźak słuša hosćićelej, abiturnemu lětnikej 12/96, za wuběrny přihot a wotběh wubědźowanja. Tón njeměješe tónraz najsylnišu zestawu k dispoziciji a wobsadźi 6. městno. Dypk wjace měještej mustwje z Radworja a Chrósćic na konće. Při wuličenju małkich plusowych dypkow běchu Chróšćenjo ći lěpši. ST Radwor nastupi znowa z najmłódšimi hrajerkami a hrajerjemi, mjez kotřiž běchu třo aktualni gymnaziasća a jedyn bywši. W prěnjej sadźbje pokazachu Radworčenjo přećiwo swojim wučerjam SGB z 11:6 solidny wukon. Druhi přechod 9:10 snadnje přěhrachu.
Zamołwići Serbskeho Sokoła su w Budyskej Serbskej kulturnej informaciji přidatne wulosowanje přewjedli, dokelž bě Sokoł Budyšin, zakitowar volleyballoweho pokala Domowiny, připrajenje za lětuši 36. turněr zaso wotprajił. Losowanska sonina bě sobudźěłaćerka SKI Marija Swierczekowa. Ze štyrjoch staflow nastachu tři. Tu nětko nowa zestawa:
Stafla A
Bratrowstwo Róžant, Serbski gymnazij-wučerjo, Škit Budyšin, Mustwo 1296, Jěcharki a jěcharjo Pančicy
Stafla B
11./12. lětnik SGB, Smešomłóćawa, SGB MIKS 10./11. lětnik, SJ Chrósćicy, Skupina brodatych
Stafla C
Serbski dom Budyšin, Swobodny los, Handicap, Rapaki, Synojo Pančic
Jurij Bjeńš
Přichodnu sobotu, 10. měrca, přewjedźe Serbski Sokoł w Budyskej sportowej hali na Třělnišću 36. sokołski volleyballowy turněr wo pokal Domowiny. Z rěčnikom Serbskeho Sokoła Janom Hrjehorjom je so Jurij Bjeńš rozmołwjał.
Najprjedy dwanaće přizjewjenych cyłkow, po tym 14, při wulosowanju 16, nětko 15 – přihoty za 36. nakład sokołskeho volleyballoweho turněra wo pokal Domowiny runjewon optimalne njejsu ...
J. Hrjehor: Hladajo na zašłe turněry bě to poprawom přeco tak, zo dyrbjachmy stajnje zaso na změny reagować. Nimamy pak z tym problem. Turněr njeje za wobdźělnikow žane winowatostne zarjadowanje. Smy derje přihotowani. Wjeselimy so, zo mamy nětko 15 cyłkow a nadźijamy so, zo tež wšitke přijědu.
Sće so rozsudźili město ze štyrjomi w třoch staflach hrać (hlej wulosowanje).
J. Hrjehor: To bě trjeba, dokelž je Sokoł Budyšin, zakitowar pokala, wobdźělenje wotprajić dyrbjał. Jedna stafla z třomi mustwami njeby optimalne rozrisanje było.
Powěda so, zo njebudźeće lětsa na čas hrać, ale chceće wšitke partije bjez wulkeho ćišća wuhrać ...
Njedawno wulosowachu čłonojo Serbskeho Sokoła kaž tež koparski trenar Tomaš Henčl skupiny za Sokołski volleyballowy turněr wo pokal Domowiny, kotryž budźe 10. měrca w sportowej hali na Budyskim Třělnišću. Napjeće hrajerjo na njón čakaja, wšako wuličeja sej hižo prěnje šansy, kak daloko móhli přińć. Jurij Bjeńš, sam hrajer mustwa Bratrowstwo Róžant, je so mjez akterami naprašował.
Beno Šołta z Miłoćic: Kaž nimale přeco hrajemy z Bratrowstwom Róžant tež lětsa zaso přećiwo Škitej Budyšin. Duel je so minjene lěta na wěčny dwubój wuwił, tohodla sym na njón jara wćipny. Dale sym wjesoły, zo nastupimy w skupinje hišće přećiwo wučerjam Serbskeho gymnazija a Mustwu 12/96. Tam tójšto přećelow sobu hraje, a tohodla budźetej tež to rjanej hrě. Mojej faworitaj stej Škit Budyšin a Handicap Pančicy – z Róžantom pak bych zaso rady raz w finalu stał.
Poprawom nochcych w póstnym času žane słódkosće chłóšćić. Sprawnje pak přiznawam, zo sym so toho předewzaća poměrnje spěšnje wzdał. Zo pak bych swojemu ćěłu tola něšto dobreho popřał, předewzach sej kóždy dźeń znajmjeńša poł hodźinki sportować. Pozitiwny pódlanski efekt je tón, zo při sportowanju stajnje něšto dožiwješ.
Sibirske temperatury minjeny tydźeń ćehnjechu nas na lód. Tak smy tydźenja cyłe popołdnjo na Kamjentnym haće za čornym pukom honili. Lód bě jara kruty a nimale tak hładki kaž w hali – perfektne to wobstejnosće. Puk pak bě tak spěšny, zo so hač do rohodźe na kromje suny a so tam chowaše. Runje na tych městnach pak bě lód přećeńki a tuž móžno njebě jón tam zaso wotewzać. Mandźelska sobuhrajerja wšak měnješe, zo so jej to poradźi. A woprawdźe. Móžachmy bórze zaso lodohokej hrać, ale hakle po tym zo bě wona cyle přemokana z lódzymneho hata wulězła. Na tym městnje hišće raz wutrobny dźak za angažowane zasadźenje a runočasnje wuběrnu show.
Seniorojo za bulom honja
Jutře, 3. měrca, wot 12 hodź. přewjedu Módro-běli Kulow prěni B & R cup (Bulank a Rose twar domow) w Kulowskej wjacezaměrowej hali. Koparjo starobneje klasy nad 50 lětami chcedźa tam za bulom honić. Nimo hosćićela budu to mustwa z Ramnowa, Njebjelčic, Trjebina, Hórnikec, Blunja, Šěrachowa a Brězka (Brieske).
Kónctydźenska kopańca
03.03. 13:00 SV Bannewitz
– SJ Chrósćicy
04.03. 14:00 ST Wjelećin
– Módro-běli Kulow
04.03. 14:00 SJ Njebjelčicy
– ST Ćisk II
04.03. 14:00 SV Haselbachtal
– Sokoł Ralbicy/Hórki
Blidotenisowe duele
03.03. 16:00 TTC Połčnica 69
– Viktoria Worklecy
05.03. 19:30 SC Großröhrsdorf
– DJK Konjecy
09.03. 19:00 DJK Konjecy
– MB Njeswačidło
09.03. 19:30 TTV 90 Biskopicy III
– ST 1922 Radwor
Volleyballowe dypkowe hry
03.03. 14:00 Marijine hwězdźički
– MSV Budyšin
03.03. 16:00 Marijine hwězdźički
– VF BW Wojerecy
03.03. 14:00 Módro-běli Wojerecy II
– Viktoria Worklecy
03.03. 14:00 VV Žitawa 09 III
– Dźiwje micki
Chcedźa na němske mišterstwa
SJ Njebjelčicy – HZ Wulke Ždźary 4:0 (0:0)
Zestawa domjacych: Hahn – Hoelzel (87. Šram), Hrjehor, Pawlik, Hanuza, Kral, Lejnart (80. Domš), Korjeńk, Šołta (80. Domš), Čornak
Krasna, słónčna a lódzymna njedźela to bě, jako su koparjo Njebjelčanskeje SJ a hósć z Hórnikec na přemjerznjenym Njebjelčanskim trawniku w dypkowej partiji mocy měrili. Wobě mustwje daštej so skerje skedźbnje do dwubojow. Hakle we 18. min. sadźi Rony Hanuza z mócnej třělwu na přećiwniske wrota prěni akcent. Dwě mjeńšinje po tym bě Robert Lejnart před wrotami hosći w najlěpšej poziciji, škitar pak bul z poslednim zasadźenjom wotkopny. Do přestawki nadźěłachu sej chowancy Handrija Krawčika dalšej šansy. Po poł hodźinje so na lěwym křidle Sandro Šołta derje přesadźi, ale jeho kop bu k róžkej wotwobarany. Pjeć mjeńšin po tym wotwobara škit hosći nadběh Njebjelčanow. Swobodny bul sadźi Hanuza wótrje na klětku. Wrotar Fischeder pak bě znowa na městnje.
Dalše dypkowe hry prěnjeho koparskeho mustwa SJ Chrósćicy
10.03. 15:00 FSV Oderwitz – SJ Chrósćicy
18.03. 15:00 SJ Chrósćicy
– ST Horni kraj Sprjewja
25.03. 15:00 Drježdźany 06 Laubegast
– SJ Chrósćicy
08.04. 15:00 SJ Chrósćicy
– Fortuna Trjebin 1996
15.04. 15:00 Nowosólc-Hródk
– SJ Chrósćicy
22.04. 15:00 SJ Chrósćicy
– Drježdźanski SC
28.04. 15:00 FC HŁ Neugersdorf II
– SJ Chrósćicy I
06.05. 15:00 SJ Chrósćicy
– SC Borea Drježdźany
13.05. 15:00 SZ Weixdorf – SJ Chrósćicy
SN
BSC Freiberg – SJ Chrósćicy 2:0 (0:0)
Zestawa hosći: Králíček – Cyž, Hrdlitschka, Sentiwan, G. Zahrodnik, M. Zahrodnik, Runt, Henčl (46. Dórnik), Młynk (46. L. Zahrodnik), Němec
Minjenu sobotu nastupi prěnje koparske mustwo Chróšćanskeje SJ pola BSC Freiberga, kotryž hraje tučasnje tohorunja w krajnej klasy, jenož w hinašej stafli. Partija wopokaza so spěšnje jako klasiski test. W dwubojach stej so wobě mustwje tróšku wróćo dźeržałoj. Wosebje SJC njemóže sej nětko žane zranjenja wjace dowolić, wšako běštaj w zymskej přestawce hižo dwaj koparjej wupadnyłoj. Nimo toho budźe wrotar Králíček čerwjeneje karty w prěnjej dypkowej hrě po přestawce dla pobrachować.
Běhanje na čas pod hołym njebjom zahaji so lětsa 11. měrca z 23. tradicionalnym Mužakowskim parkowym běhom, kotryž słuša do rjadneje lisćiny Wopačanski cup. Regionalna lisćina poskića 15 wubědźowanjow w Hornjej Łužicy mjez Žitawu a Mužakowom, Wopaku a Połčnicu. Za cyłkowne kónčne hódnoćenje dyrbi so atlet na znajmjeńša pjeć běhach wobdźělić, a maksimalnje dźesać je do njeho zapřijatych.
Hižo 10. nalětnika přewjedu po tradiciji w Połčničanskim hrodowym parku 19. nalětnje crossowe mišterstwa běharjow wulkowokrjesa Budyšin. SN