Wolejbulisća SGB dalše sakske finale docpěli
Po dobyću regionalneho finala šulerskeho wubědźowanja „Młodźina trenuje za olympiju“ we wolejbulu w starobnej klasy II w Rychbachu kwalifikowachu so nětko tež najmłódši sportowcy Serbskeho gymnazija Budyšin (SGB) w bulosportowej družinje w starobnej klasy IV za kónčne krajne wurisanje. Woni su so w Kamjencu suwerenje přesadźili a pojědu 8. apryla do Grimmy.
Hižo 14. raz skwalifikowa so jedne wolejbulowe mustwo Budyskeho Serbskeho gymnazija za sakske krajne finale wubědźowanja „Młodźina trenuje za olympiju“. Do Budyšina wróćichu so dotal z jednej slěbornej a ze šěsć bronzowymi medaljemi.
W měrcu pojědu wolejbulisća 10. a 11. lětnika SGB wokoło kapitana Jakuba Bobki do Dippoldiswaldy a měsac pozdźišo šulerjo 6. a 7. lětnika z kapitanom Amadeusom Zamoru-Gonzalezom do Grimmy, zo bychu z dalšimi pjeć najlěpšimi sakskimi mustwami swojeje staroby mocy měrili.
Serbski gymnazij Budyšin – Wyša šula Rychbach 2:0
Sokoljo čakaja na přizjewjenja
Budyšin (SN). Za 38. sokołski wolejbulowy turněr wo pokal Domowiny je so dotal jenož jedne mustwo přizjewiło. A to je nowačk ze sakskeje stolicy z mjenom Łobjobul. Ani jedne z etablěrowanych cyłkow njeje dotal startowy pjenjez, kotryž je zdobom přizjewjenje, na konto Serbskeho Sokoła přepokazało. Přizjewjenski čas za najwjetši serbski wolejbulowy podawk, kotryž budźe 16. meje w Radworju, wuběži 29. februara wo połnocy.
Intensiwny přihotowanski kónc tydźenja
Naročny přihot na druhu połseriju běše trenar koparjow Sokoła Ralbicy/Hórki Chrystof Gloxyn za minjenej pjatk a njedźelu spřihotował. Za pjatk je sej z Biskopičanskej rezerwu treningowu hru wučinił, a njedźelu hrajachu Sokoljo w Drježdźanach přećiwo wyšemu ligistej FC Grimma.
Biskopicy – Sokoł Ralbicy/Hórki 5:3
Zwučowanska hra přećiwo Biskopicam wotmě so w Arnsdorfje. Treningowy partner nawjeduje tučasnje tabulku wokrjesneje ligi-stafle 1. Wotmysł hry běše, trening pod wubědźowanskimi wuměnjenjemi přewjesć a tak hrajne wotběhi nastudować. Najčasćišo pak su Ralbičenjo jenož chribjet młodych Biskopičanskich hrajerjow widźeli, kotřiž jim zas a zaso ćeknychu. Na kóncu sydaše poražka 3:5. Za Sokoł běštaj dwójce Michał Matka a jónu Pětr Domaška wuspěšnaj. Chrystof Gloxyn měješe partiju přiwšěm za dobru treningowu jednotku, hdźež so to a tamne zdźěla zešlachći. Ale tež wulke njedostatki so wukopachu.
Sokoł Ralbicy/Hórki – FC Grimma 1:7
Zestawa Sokoła: Schöne, Lešawa (62. Nuk), Šewc, Wałda, Matka, Bejma, Rawš, Gloxyn, M. Kurjat (79. Kobalc), G. Kurjat (87. Ćěsla), Domaška
W treningowym lěhwje byli
Wuslědki (05.02.20)
Kopańca, regionalna liga muži
Halberstadt – Berlinski AK 1:2 (0:2)
Lok Lipsk – FC Viktoria Berlin 0:0 (0:0)
Altglienicke – Rathenow 3:0 (2:0)
Fürstenwalde – BFC Dynamo 3:0 (2:0)
Hertha BSC II – Auerbach 1:3 (0:0)
Babelsberg – Chemija Lipsk 1:0 (1:0)
Po horinach sněhakowali
Tež lětsa je Serbska wyša šula Ralbicy sněhakowarske lěhwo přewjedła, a to znowa w Bedřichovje blisko Libereca. Hižo 17 lět jězdźa Ralbičanscy šulerjo do Jizerskich horin, zo bychu nawuknyli so na běžkach a alpinskich sněhakach pohibować.
Wotjěli běchu šulerjo a štyrjo dorosćeni z ćahom z Biskopic hač do Libereca. Wottam dźěše z busom dale do Bedřichova. Wutoru zwučowachu a pospytachu so na běžkach, nazajtra podachu so na pućowanje přez zasněženy lěs. Srjedu a štwórtk přewjedźechu zwučowanja na alpinskich sněhakach. W jednej skupinje běchu započatkarjo, w tamnej postupnicy, potajkim ći, kotřiž běchu hižo raz sněhakowali. Srjedu wječor je cyła skupina bowlingowała a štwórtk wječor wočerstwichu so šulerjo w Liberecskej kupanskej hali Babylon. Wjedro bě cyły tydźeń dosć přijomne, sněha pak bě tamne lěta wjace. Hač na někotre módre blaki na zadku su so Ralbičanscy šulerjo pjatk popołdnju zaso strowi do domizny nawróćili.
Za cyłu skupinu SWŠ Ralbicy bě to rjany, byrnjež tróšku napinacy čas.
Mia-Katarina Hrjehorjec
Napjaty halowy koparski turněr starych knjezow w Delanach
Kónčna tabulka
1. SJ Chrósćicy 8 :2 10
2. Sokoł Ralbicy/Hórki 9 :6 7
3. ST Marijina hwězda 6 :5 7
4. Sokoł Ralbicy/Hórki II 2 :6 2
5. Zeleno-běli Hórki 3 :9 1
Ralbičanscy stari knježa přewjedźechu 31. januara halowy turněr za koparjow stareje serbskeje gardy. Přeprošenje sćěhowali běchu hrajerjo ST Marijineje hwězdy, Zeleno-běłych Hórki a zakitowarja pokala SJ Chrósćicy. Njebjelčenjo dyrbjachu pobrachowacych koparjow dla wotprajić. Domjacy stajichu dwě mustwje, a w modusu kóžde přećiwo kóždemu so turněr wotmě. Hrajny čas wučinješe prěni raz dwanaće mjeńšin.
Přewšo zasłužene dobyće
ST 1896 Wulka Dubrawa
– Viktoria Worklecy 92 0:3
(23:25, 20:25, 17:25)
Dyrbjało-li mišterstwo realistiske wostać, njesmědźa wolejbulisća Viktorije Worklecy pola mustwow ze zadnjeho dźěla tabulki žadyn dypk wotedać. Hra w Kundraćicach pak bě pokazała, zo runje tajke teamy mocy wuwiwaja, z kotrymiž maja faworića častodosć swoje ćeže.
Runje z teje přičiny započachu mužojo wokoło přistajerja Marcela Rjelki we Wulkej Dubrawje jara koncentrowani a nawjedowachu spěšnje 4:0. Přez sylne nadběhi Stephana Wjeńki a jara stabilny blok powjetšichu předskok na 13:6 a 18:11. Z njelogiskich přičin pak so hrajna nitka torhny. Někotre wotedate nadaća, zmylki při saku a njemotiwowany nadběh dachu předskok kaž sněh w słóncu roztać. Přećiwnik spózna swoju šansu a wojowaše hač k stawej 23:23. Z rutinu pak hosćo sadźbu tola hišće z 25:23 dobychu.
Druhi přechod běše wurunany, ale z jasnym předskokom za Worklečanow. Nadaća a přiwzaća běchu stabilne a tak dypkowachu woni hač do suwereneho dobyća sadźby z 25:20.
Za běhi so přizjewić
Zajimcy smědźa so za prěnje běhi přizjewić, kotrež słušeja na přikład tež lětsa zaso do Wopačanskeho cupa běharjow. 8. měrca wotměje so 26. raz tradicionalny Mužakowski parkowy běh, 15. měrca budu 30. cityjowe běhi w Drježdźanach.
05.04.2020 Wostrowski nalětni běh
11.04.2020 Biskopičanski běh na dołhich čarach
03.05.2020 Kćenjowe běhi w Kamjencu
09.05.2020 Běh na Sokolnik we Wjazońcy
10.05.2020 Bike & run na Sokolnik
Wučerjo-wolejbulisća SGB sej tripl zawěsćili
Třeći wólnočasny wolejbulowy turněr serije „top-šěsć“ w Kulowje dobychu třeći raz za sobu wučerjo Serbskeho gymnazija Budyšin (SGB) před prěnim zastupnistwom Žołto-módrych Kulow a abiturientami lěta 1996.
Roland Stiebitz, předsyda sportoweje jednotki Žołto-módri Kulow, witaše wčera tydźenja sydom wolejbulowych wólnočasnych mustwow na 4. ptačokwasny turněr w tamnišej sportowni. Škoda, zo njemóžachu so wólnočasni sportowcy Viktorije Worklecy na wubědźowanju wobdźělić. Tak zaskoči jedne třeće mustwo Kulowskeho zjednoćenstwa.
