Widźał, słyšał, napisał (25.05.20)

póndźela, 25. meje 2020
artikl hódnoćić
(0 )
Awtor dźensa André Strelow

„Absolutny njezmysł, to je farsa! Skónčnje pak je čas abstinency nimo.“ Tajke a podobne běchu wuprajenja w horcych diskusijach w přećelskich kruhach wokoło starta zwjazkoweje koparskeje ligi po tak mjenowanym „lock­downje“. Na kóždy pad pak zaso za bulom honja. Wuměnjenja su kuriozum, při­hladowarjo w stadionach wězo žani njejsu. Prawa koparska atmosfera wšak hinak wupada.

Hač so hygienowy koncept Němskeho koparskeho zwjazka (DFB) hač do kónca hrajneje doby wuspěšnje přesadźi, so pokaza. Na kóždy pad eksistuja hižo nětko wulke twarnišća. W Drježdźanach na přikład hišće žane koparske hry njejsu. Pozitiwneho koronapada dla njemóže tučasny posledni tabulki druheje zwjazkoweje ligi docyła do jednanja zapřimnyć. Prašenje je, što so stanje, hdyž towarstwo wirusa dla žanu dalšu hru wjac přewjesć njemóže? Snano tež zamołwići z tajkim padom liča a tak klasu zachowaja. Šibałc to, kiž sej tajke něšto lóze mysli.

Hišće klasu niže měnjeja towarstwa samo krajnu hranicu, zo bychu trenowali a dypkowe hry wotměli. Koparjo FC Carl Zeiss Jeny nětko w Lipsku bydla a trenuja. W Durinskej njesmědźa hač do 5. junija w mustwach trenować. Tež wubědźowanja su zakazane. Towarstwo dyrbi swoje domjace hry tuž zwonka Durinskeje přewjesć. Na naprašowanja njejsu tam dotal žanu pozitiwnu wotmołwu dóstali.

Wšitcy přećeljo, kotřiž su so za nowozazběh wuprajili, so wězo wjesela. Hustodosć słyšach hesła kaž „skónčnje ma kónc tydźenja zaso zmysł.“ Wosobinsce mam tu­časnu situaciju za jara kritisku. Małe towarstwa smědźa jenož pomałku zaso ­trenować započeć. Na hrajkanišćach dyrbja dźěći wotstawk dźeržeć, štož je wězo ćežko, hdyž so mjez sobu honja. Ja pra­widłownje podłu Łobja kolesuju a jogguju. Před tydźenjom běchu tam wotstawki mjez wosobami hišće wulke dosć. Wčera knježeše ­hižo cyle hinaši wobraz. Hačrunjež bě špatne wjedro, běše na kolesowarskim puću wulka tołkańca. Strach, so z wirusom natyknyć, wjetšina hižo nima. Nadźijam so, zo žana druha žołma korony njewu­dyri.

Dokelž sym jako koparski sudnik na hrajnišćach po puću, naprašowach so pola Zapodołužiskeho zwjazka, kak nětko dale póńdźe – runje tež hladajo na planowane zhromadźizny, hdźež so informacije za přichodny hrajny čas wozjewja. Nimo toho dyrbi nimale kóždy sudnik do zazběha noweje sezony teoretiski a sportowy test přewjesć. Kaž tučasnje wupada, to lětsa wupadnje. To rěka so sam dale kubłać a trenować a informacije swojemu towarstwu wosobinsce sposrědkować.

Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND