Znowa Captainscup přewjedli
Worklečanske volleyballistki a volleyballisća wuhotowachu njedawno swój třeći turněr z mjenom Captainscup. Po lońšej přestawce, přetwara sportownje dla, móžeštaj organizatoraj Maćij Šěn a Ludwig Eckert dohromady 14 mustwow witać.
Na beachvolleyballnišću wojowaše wosom dwójkow wo dobyćerski pokal, a paralelnje k tomu wubědźowaše so šěsć cyłkow na trawniku za rjanej ponowjenej Worklečanskej sportownju. Tam hrajachu w modusu kóždy přećiwo kóždemu, z dwěmaj sadźbomaj hač do 15 dypkow. Po 15 hrajnych kołach přesadźi so tu mustwo Dwójna nula. Wone ani jeničku sadźbu njepřěhra a zawěsći sej tak zasłužene prěnje městno. Druhi bě team Tita dźiwow z jednej sadźbu předskoka před zastupnistwom Hintenreiner.
W finalu beachvolleyballa stejachu sej Andrey Antonov/Peter Noack (wobaj MSV Budyšin II) a Milan Budar (Viktoria Worklecy)/Marek Bačko (MTV Mariendorf) napřećo. Budyšanaj so po horcym boju přesadźištaj. Bronzowe městno zaručištaj sej Jurij Lipič (Viktoria Worklecy)/Petrick Leße (ST TuR Drježdźany).
Energija drastisce chłostana
Sportowe sudnistwo Sewjerowuchodneho koparskeho zwjazka (NOFV) je wjacorych přeńdźenjow přiwiska FC Energije Choćebuz dla koparskemu klubej pokutu 16 000 eurow nabrěmjeniło. Nimo toho dyrbi FCE prěnju domjacu dypkowu hru sezony 2017/2018 bjez přihladowarjow přewjesć. Přičiny chłostanja běchu za sudnikow za zelenym blidom tele: hra w Meuselwitzu (wobškodźenje schodow a płota), hra w Lipsku (mjetanje zapalaka) a hra w Budyšinje (pyrotechnika). Za to chce NOFV 6 000 eurow měć, za přeńdźenje při wonkownej hrě w Babelsbergu 10 000 eurow.
„Chłostanje je za naše towarstwo absolutna katastrofa. Z tajkim wusudom njejsmy ličili. Njedóstanjemy w dźěle přećiwo škarakam žanu podpěru. Smy woprawdźe wšitko činili, štož bě móžne, zo bychmy tajkim přeńdźenjam zadźěwali. Za wěstotne naprawy mamy kóžde lěto wudawki w šěsćcyfrowym wobjimje. Nimo toho wuprajamy so jasnje přećiwo prawicarjam. Někotři z našich porjadnych fanow su so jim w Budyšinje do puća stupili. Chłostani su nětko wšitcy. To njeje poměrne“, zwurazni prezidij FCE po pokutnym mandaće, kotryž nochce akceptować. Georg Zielonkowski
Wot zašłeho tydźenja regionalny koparski ligist Budissa Budyšin ...
Widźał,słyšał, napisał (03.07.17)
Awtor dźensa
Michał Nuk
Jónkrótna šansa skićeše so lětsa němskim lubowarjam kolesowanja, kotřiž móžachu po 30 lětach zaso raz „le grand depart“ – start jězby Tour de France – w swojej domiznje dožiwić. Tule składnosć sym wužił a podawam swoje zaćišće wo třećim najwjetšim sportowym zarjadowanju swěta.
Wot minjeneho štwórtka hač do njedźele, wot předstajenja mustwow hač k startej 2. etapy sy móhł w Düsseldorfje najlěpšim kolesowarjam cyle blisko być. A sy-li zbožo měł, je ći snadź jedyn z faworitow, kaž Christopher Froome za žołty, Peter Sagan za zeleny trikot abo domoródny star, kaž němski mišter Marcus Burghardt, awtogram dał. A zbožo sy trjebał, wšako běchu statysacy fanow z cyłeho swěta do krajneje stolicy nad Rynom přichwatali a najlěpše městna hižo hodźiny do přichada kolesowarjow zabrali.
SGB sej bronzu wubědźił
Wučerjo-volleyballisća Serbskeho gymnazija Budyšin (SGB) skónčichu 50. wokrjesne mišterstwo z dobyćom přećiwo kolegam Powołanskeje šule za zežiwjenje Budyšin a wotzamknychu sezonu šěsć startowacych šulow z bronzu.
Sernjačan dalši wuspěch žnjał
Na lětušej wokrjesnej dźěćacej a młodźiniskej spartakiadźe w Budyšinje wuwojowa sej blidotenist Benjamin Grutka znowa dwě medali. Pola dwójkow přesadźi so młody Sernjančan z Paulom Hauffu (SZ Lückersdorf-Gelenau) přećiwo Freundej/Brokwitzej (SZ Łužnica/TuS 1890 Gersdorf-Möhrsdorf) w zajimawym finalu a wudoby sej tak złotu medalju.
Po tym sćěhowachu hry jednotliwcow. Tam hraješe Benjamin w finalu přećiwo swojemu partnerej z dwójki. Na kóncu pak dyrbješe so wón přećiwnikej z 0:3 kłonić. W rozsudnych fazach falowachu jemu prosće mocy a tróšku dokładnosće w akcijach. Ale tež druhe městno je wulki wuspěch, nad kotrymž so cyłe towarstwo Viktorije Worklecy za njeho wjeseli.
Marcel Rjelka
Prěni raz wulke myto dobył
Kulowske jěchanske towarstwo je mjeztym na swojim jěchanišću při Lubohozdźanskim puću hižo 46. jěchanski a skakanski turněr přewjedło. Organizatorojo, kotřiž běchu kónc apryla sezonu 2017 zahajili, mějachu znowa ruce połnej dźěła. Přihotować, přewjesć a wuhódnoćić dyrbjachu zarjadowarjo 550 startow z 200 jěcharkami a jěcharjemi a 300 konjemi z něhdźe 60 sportowych towarstwow.
Na woběmaj dnjomaj mějachu w Kulowje pruwowanja w dresurje a skakanju w klasach E do M. Podpěrałoj stej 46. jěchanski a skakanski turněr mjez druhim Wuchodosakska nalutowarnja Drježdźany a firma Idee Kaffee. Wubědźowanja dožiwiło je 1 000 přihladowarjow.
Prěni raz poradźi so Kulowčanej hłowne skakanje klasy M z hwězdźičku dobyć. André Schlegel přesadźi so z kobłu Kolett přećiwo 17 kontrahentam. Druhe městno wobsadźi Sasha Rubienke z towarstwa BSV Gubin-sewjer na koble Celine a třeće Roby Schubert z jěchanskeho towarstwa Při Tuchorskim lěsu na konju Quick Step. Nadine Schneider (Kulow) doby skakanje klasy A na koble Cilly. Werner Müller
Wuspěšnu sezonu njewšědnje wuklinčeć dali
Sezona we wobwodnej volleyballowej lize je zakónčena, a tule nětko krótki rezimej. Wšako běše hrajna doba 2016/ 2017 za Worklečanskich muži z titulom wicemištra zaso jara wuspěšna, byrnjež so són postupa do sakskeje klasy wospjet njespjelnił. Fanojo pak widźachu wjele rjanych a napjatych hrow w Ralbičanskej sportowni w času, jako bu Worklečanska ćěłozwučowarnja přetwarjena. Njeby-li so přistajer Marcel Rjelka zranił, štó wě …?
Wuslědki (03.07.17)
Wokrjesna wyša koparska liga
1. ST Ćisk 30 103 : 25 74
2. Sokoł Ralbicy/Hórki 30 77 : 38 59
3. Rakečanske ST 30 75 : 53 56
4. ST Hnašecy-Dobruša 30 65 : 56 51
5. LSV Hory 30 77 : 46 50
6. SC Großröhrsdorf 30 50 : 39 45
7. ST Kinspork/Łužnica 30 69 : 48 41
8. Motor Kumwałd 30 53 : 73 38
9. Póst German. Budyšin 30 53 : 73 37
10. Drohotka Ramnow 30 43 : 60 35
11. Wojerowski FC 30 61 : 56 34
12. Zeleno-běli Bukecy 30 57 : 85 33
13. Módro-běli Kulow 30 47 : 57 32
14. ST Wjelećin 30 65 : 105 31
15. TSV Połčnica 30 51 : 79 27
16. FV Ottendorf-Okrilla 30 37 : 90 21
Sport (30.06.17)
Sport na wjesnym swjedźenju
14. a 15. julija zarjaduje ST Wóslink/Skaskow na sportnišću w Skaskowje wjesny swjedźeń. Pjatk wot 18.30 hodź. wubědźuje so šěsć wohnjowych woborow, nazajtra, sobotu, wot 14 hodź. budźe dźěćacy swjedźeń.
Dynamocamp w Delanach
Koparska šula Dynama Drježdźany chce w oktoberskich prózdninach zaso camp w Ralbicach pola Sokoła Ralbicy/Hórki zarjadować. Wot 9. do 13. oktobra smědźa tam holcy a hólcy w starobje sydom do 14 lět kóždy dźeń pod nawodom profesionelnych nazwučowarjow trenować. Camp płaći 194 eurow, swójby z wjacorymi dźěćimi dóstanu dźesać procentow rabata. Dalše informacije pod www.dynamo-dresden.de
Beachvolleyball Satkule
Po tym zo je 4. beachvolleyballowa tura Radija Satkula w Róžeńće startowała, zastanje wona prěnju póndźelu julija w Konjecach. Tež tam zetkaja so mustwa zaso we 18 hodź., hry započnu so poł hodźiny pozdźišo. Dalše terminy:
10.7. 18.30 hodź. w Jaseńcy
17.7. 18.30 hodź. w Kulowcu
24.7. 18.30 hodź. w Pančicach
31.7. 18.30 hodź. w Radworju
7.8. 18.30 hodź. w Budyšinje
28.8. 18.30 hodź. w Miłoćicach
Wubědźowanja wobornikow
7.7. 19:00 w Róžeńće
30.7. 14:00 w Smjerdźacej
25.8. 18:30 we Wotrowje
Testowe koparske hry
