Druhe městno ze staflu
SJC hotuje so na nowu sezonu
Nowa hrajna doba w kopańcy so bórze započnje, a tak je so tež přihotowanska faza za 1. mustwo SJ Chrósćicy zahajiła. Minjenu wutoru započa wone oficialnje trenować. Na to slědowaštej hnydom přećelskej hrě. Přećiwo Großröhrsdorfej přesadźichu so Chróšćenjo 4:0. Wrota třělili su Matti Bětnar a Radim Věchet (troje). We Wesenitztalu pak přěhrachu chowancy trenarja Pavela Runta 0:3. Sobotu změja dalšu přećelsku partiju. W 14 hodź. je zakop w Sebnitzu. Njedźelu wobdźěla so na turněrje w Njebjelčicach, wot 14 hodź. móža tam potom přihladowarjo lute serbske derbyje dožiwić.
W přihotowanskej fazy wězo treningowe lěhwo pobrachować njesmě. 27. julija poda so 1. koparske mustwo SJC štyri dny do pólskeje Leśnicy. Lěhwo zakónča z hru přećiwo cyłkej NKS Namysłów. W awgusće slědujetej potom dalšej přećelskej hrě přećiwo teamomaj z Hradeka nad Nisou a ST Radworja.
Prěnja dypkowa hra za SJC w sezonje 2017/2018 budźe njedźelu, 13. awgusta, wot 15 hodź. w Trjebinje. Feliks Cyž
Tabulka (19.07.17)
Wokrjesna wyša koparska liga
1. ST Ćisk 30 103 : 25 74
2. Sokoł Ralbicy/Hórki 30 77 : 38 59
3. Rakečanske ST 30 75 : 53 56
4. ST Hnašecy-Dobruša 30 65 : 56 51
5. LSV Hory 30 77 : 46 50
6. SC Großröhrsdorf 30 50 : 39 45
7. ST Kinspork/Łužnica 30 69 : 48 41
8. Motor Kumwałd 30 53 : 73 38
9. Póst Ger. Budyšin 30 53 : 73 37
10. Drohotka Ramnow 30 43 : 60 35
11. Wojerowski FC 30 61 : 56 34
12. Zeleno-běli Bukecy 30 57 : 85 33
13. Módro-běli Kulow 30 47 : 57 32
14. ST Wjelećin 30 65 : 105 31
15. TSV Połčnica 30 51 : 79 27
16. FV Ottendorf-Okrilla 30 37 : 90 21
Módro-běli Kulow maja jasne zaměry
Sportowy reporter Werner Müller je so za Serbske Nowiny w lětnjej přestawce z předsydu Módro-běłych Kulow Alexanderom Dolezychom rozmołwjał. Mjez druhim rěčeše z nim wo hrajnej dobje 2016/2017, ale tež wo přihotach na nowu sezonu.
Kajka bě minjena hrajna doba za Módro-běłych Kulow?
A. Dolezych: Smy so na spočatku sezony chětro kopolili. Wjacore razy smy njerozsudnje hrali a stajnje jenož dypk domchowali. To je so hač do oktobra ćahnyło. Hakle w Ralbicach dobychmy z wulkim bojowniskim wukonom 2:1 přećiwo Sokołej. Na to je horu horje šło. K zymskej přestawce stejachmy na sedmym městnje. Z dobrym wobdźělenjom na treningach je so tež kondicija mustwa polěpšiła.
Buchu přeća mustwa spjelnjene?
A. Dolezych: Naš zaměr, 10. městno w tabulce, njejsmy spjelnili. Zakónčichmy sezonu na 13. městnje z 32 dypkami a z wrotowym poměrom 47:57.
Kak je kołowokoło změny trenarjow wotběžało?
Štwórta stacija bičwolejbuloweje tury Radija Satkula wjedźeše ...
Sakske finale w lochkoatletice
Minjeny měsac startowachu lochkoatletki Serbskeho gymnazija Budyšin prěni raz w sakskim finalu. Hižo wobdźělenje w Kamjenicy je wusahowacy wukon hladajo na to, zo z nich žana w sportowym zjednoćenstwje jednotliwe discipliny lochkoatletiki njetrenuje.
Naše sportowče, kotrež wudobychu sej w sakskim finalu njedźakowne a přiwšěm wulkotne štwórte městno, su tež w kopańcy, volleyballu, beachvolleyballu, mjetańcy a rejowanskich skupinach jara wuspěšne.
Z 1,40 m we wysokoskoku nastaji Tadeja Šeferec wosobinski rekord. Škoda, zo njezamóchu wšitke serbske lochkoatletki swoje wosobinske najlěpše časy a dalokosće w Kamjenicy pokazać. Přiwšěm bě wubědźowanje jim wšěm rjane nazhonjenje. Gabriela Jendrewscyna
Wojuje wo stajne městno
W Njebjelčicach bě Jonas Krawčik, čłon nětčišeje Serbskeje koparskeje wubranki, z kopańcu započał, pola Budissy Budyšin a wosebje pola Dynama Drježdźany je so dale wukmanjał. Po změnje k FC Hornjej Łužicy Neugersdorf hraje Njebjelčan wot noweje sezony 2017/ 2018 zaso za Budissu Budyšin. Tadej Cyž, tohorunja z Njebjelčic, je so z Jonasom Krawčikom rozmołwjał.
Jonaso, po tym zo sy k Budissy Budyšin přišoł, su hižo někotre tydźenje zašli. Połojca přihotowanskeho časa je nimo. Sy dotal spokojom?
J. Krawčik: Sym so tu wot wšeho spočatka derje čuł. Mamy jara młode mustwo a hajimy přijomnu zhromadnosć. Pozitiwne tež je, zo sym w přihotowanskim času dotal bjez zranjenja.
Na kotrej abo kotrych pozicijach je će trenar Torsten Gütschow w testowych hrach zasadźił?
J. Krawčik: Sym fleksibelny, sym pak hłownje na lěwym abo prawym ofensiwnym křidle hrał.
Prěnja dypkowa hra budźe hnydom derby přećiwo FC Hornjej Łužicy Neugersdorf. To je za tebje zawěsće wosebita hra!
Budissa so přećiwnika njebojała
Dalši serbski sudnik w krajnej koparskej lize
Serbski koparski sudnik Michał Neter je jako referee do zwjazkoweje koparskeje ligi młodźiny B a do krajneje ligi muži postupił. Šuler Serbskeho gymnazija Budyšin je nimo Matijasa Krala dalši serbski sudnik, kiž nawjeduje hry w najwyšej lize Sakskeho koparskeho zwjazka. Tež serbska sudnica Lea Krječmarjec smě nětko klasu wyše sudźić – gymnaziastka postupi do wokrjesneje ligi.
Zapadołužiski koparski zwjazk informuje hišće wo dalšich sudnikach, kotřiž su na jeho teritoriju zasadźeni. Do regionalneje ligi postupi Richard Hempel, ze Schleswigsko-Holsteinskeje přińdźe do krajneje ligi Sakskeho koparskeho zwjazka Kevin-Coren Eckert, w krajnej klasy smětaj nětko Nils Fiedler a Maurizio Hoffmann hry nawjedować, do wokrjesneje wyšeje ligi postupja Torsten Aust, Malte Grünert, Eric Stolarski a Sebastian Mieth. A we wokrjesnej lize budu tež Jakob Holling, Mathias Hohlfeld a Enrico Stiebitz zasadźeni. Kilian Hrjehor
Dirk Rettig nowy Kulowski trenar
Po tym zo bě Waldemar Adamowicz po dźewjeć lětach jako hrajer a trenar prěnjeho koparskeho mustwa Módro-běłych Kulow přestał, je Detlef Scholze mustwo spočatk lěta přechodnje přewzał a z nim we wokrjesnej wyšej lize wostał.
W přihotach na nowu hrajnu dobu su z Dirkom Rettigom nětko noweho nazwučowarja angažowali. Kulowskim koparjam je Spalowčan derje znaty. Wón narodźi so 13. nowembra 1969 w Choćebuzu, je ženjeny a ma dwě dźěsći. Z pjeć lětami započa wón z kopańcu pola FC Energije Choćebuz. Tam hraješe we wšitkich dorostowych mustwach. Z 19 lětami dźěše na dwě lěće k Chemiji Gubin a hraješe w lize NDR, kotraž bě tehdy druha najwyša. Z 21 lětami wróći so k Energiji a 1996 změni k FC Rudne horiny Aue. Wot lěta 1998 do 2002 šnórowaše wón kopački za FSV Wojerecy a wot 2002 pjeć lět za FSV Budissu Budyšin. W hrajnym lěće 2007/2008 hraješe za Wojerecy 1919. Kónc lěta 2008 započa Rettig jako trenar FSV Budissy Budyšin II a wukonješe funkciju pjeć lět. Rezerwa Budissy postupi z nim z wokrjesneje wyšeje ligi do krajneje ligi. Dalšej staciji jako trenar běštej SJ Chrósćicy (dwě lěće) a ST Hnašecy/Dobruša.
