Hosćom dypk darili
FC Energija Choćebuz – VfB Auerbach 1:1 (0:0)
Zestawa domjacych: Spahić – Starcew (90.+1 Broschinski), Karbstein, Kruse, Schlüter, Gehrmann, Weidlich, de Freitas, Siebeck (80. Graudenz), Viteritti, Mamba (67. Scheidhauer)
Po dospołnje přesłapjacej hrě načolnika regionalneje koparskeje ligi sewjerowuchod přećiwo VfB Auerbachej dyrbi FC Energija Choćebuz na kóncu z dypkom spokojom być. Nimale přez cyły čas paleše so před wrotami hosći, kotřiž běchu před nimi škitnu twjerdźiznu natwarili, zo bychu so před nadběhami Energije škitali. Tak běchu hłójčkowane wrota Malte Karbsteina w 57. min. po wólnym kopje Lasse Schlütera to jeničke ličomne, tež hdyž měještaj Streli Mamba a nowopřichad Alexander Siebeck dobre móžnosće, dalše wrota třělić. Hakle třeći róžk w nadběhu absolutnje njestrašnych hosći postara so wo 1:1. Marcel Schlosser třěli róžk do šěsnatki, a tam přetwori něhdyši Choćebuski kopar Marc-Philipp Zimmermann (78.). Wrotar Avdo Spahić njeměješe žanu šansu.
Sněhakowanje sylneho wichora dla přesunjene
Staw medaljow po 14 ze 102 rozsudow
złoto slěbro bronza
1. Němska 4 1 2
2. Nižozemska 3 2 2
3. USA 3 1 2
4. Norwegska 2 4 3
5. Kanada 2 4 1
6. Francoska 2 1 2
7. Awstriska 2 0 0
Po wuběrnym starće němskich sportowcow su wosebje sněhakowarske wubědźowanja wot wichora a měnjateho wjedra potrjechene. Kaž pola muži, hdźež startuje Thomas Dreßen štwórtk w spěšnosněhakowanju, su nětko tež wulkoslalom pola žonow přesunyli. Viktoria Rebensburg, dobyćerka we Vancouveru a třeća w Sočiju, je nazhonita dosć z tajkej situaciju wobchadźeć a koncentraciju znowa natwarić.
Ze zbožom k třom dypkam
Motor Kumwałd – Sokoł Ralbicy/Hórki 0:1 (0:1)
Zestawa hosći: Ch. Gloxyn – J. Bjeńš, Rawš, Šewc, Kř. Matka, M. Matka, Domaška, D. Gloxyn, S. Bjeńš, Janca (85. Materna), Kurjat
Do Kumwałda koparjo Sokoła Ralbicy/Hórki rady jědu. Dotal běchu tam dźewjeć z dohromady dźesać hrow dobyli. Wuspěch čisło 11 dźěše nětko tohorunja na jich konto. Kumwałd drje měješe přez cyłu partiju wjac hrajnych podźělow a kopicu šansow, Sokoljo pak jara koncentrowanje a taktisce disciplinowanje wustupowachu. Trenar Jiří Krohmer nastaji z Gabrielom Kurjatom jenož jeničkeho nadběhowarja a staji Pětra Domašku do centralneho srjedźneho pola z Dennyjom Gloxynom a Stefanom Bjeńšom. Woni dyrbjachu jako trójka hrajny natwar domjacych stajnje zaso mylić, štož wulkotnje fungowaše.
Wonka nětko podleželi
BSG Chemija Lipsk – FSV Budissa Budyšin 1:0 (0:0)
Zestawa hosći: Ebersbach – Heppner, Patka, Hoßmang, Mack, Hausdorf, Pfanne, Krawčik (61. Gehrmann), Schmidt, Müller, Bönisch
Regionalny koparski ligist Budissa Budyšin je njedźelu popołdnju w Lipšćanskim Sportowym parku „Alfred Kunze“ přećiwo Chemiji Lipsk hrał. Prěnju partiju doma bě Budissa 1:0 dobyła, pokalne zetkanje pola chemikarjow pak 0:1 přěhrała.
Po 0:0 přećiwo Energiji Choćebuz nastupichu Budyšenjo nětko z wjetšej zmužitosću. Před 2065 přihladowarjemi pak na woběmaj stronomaj najprjedy raz přemyslene akciji nastali njejsu. Hosćo agěrowachu z wěsteho škita a njemějachu w nadběhu ničo w poskitku. Njezbožo měješe Tony Schmidt ze strašnym wólnym kopom, kotryž prasny do žerdźe (17.). Tež Lipšćan Manuel Wajer měješe dobru składnosć, zwrěšći pak na wrotarju Maiku Ebersbachu (25.). Hewak bě prěni połčas wostudła naležnosć.
Energija ma nowych koparjow
Přestorčenu dypkowu hru w Lipsku je FC Energija Choćebuz z 2:0 wuspěšnje nachwatała, w Budyšinje pak jenož 0:0 hrała. Do zbywaceho koparskeho programa w regionalnej lize sewjerowuchod startowaše FCE ze štyrjomi nowymi hrajerjemi:
Alexander Siebeck (24 lět) je ofensiwny srjedźopólny hrajer, kotrehož su sej Choćebuženjo wot třećeho ligista w Karlsruhe wupožčili. „Na so skedźbnił je technisce jara dobry kopar hižo loni pola RB Lipska II. Tehdom pak njemějachmy financne móžnosće. Nětko smy spokojom, zo mamy zranjeneho Maximiliana Zimmera najprjedy jónu zarunaneho“, rjekny trenar Claus-Dieter Wollitz.
Kevin Rauhut (28) přińdźe wot Wackera Nordhausen. Wón chce nětko tróšku ćišća na stajneho wrotarja Avda Spahića wukonjeć. 1,88 metrow wulki Rauhut bě 121 razow we Wuppertalu, Aachenje, Siegenje a Kasselu w regionalnej lize zasadźeny. Zajimawe budźe, hač so pola FCE z rólu rezerwista spokoji.
Marijine hwězdźički bjezradne
Dorostowe koparske turněry přewjedli
Prěni kónc tydźenja w małym róžku je Sportowe towarstwo 1922 Radwor swój 2. halowy turněr za koparski dorost wuhotowało. Hižo pjatk wječor wubědźowachu so mustwa młodźiny A, hdźež doby cyłk SZ Bukecy/Kubšicy. Druhe městno wobsadźi zastupnistwo z Obercunnersdorfa/Lawaldy a třeće hosćićel HZ Radwor/Wulka Dubrawa. Sobotu dopołdnja móžachu ći najmłódši hrajerjo pokazać, što hižo zamóža. W młodźinje F je šěsć mustwow za bulom honiło, a dobyło je Hrajne zjednoćenstwo Minakał/Wulka Dubrawa. Slěbornu medalju dósta Póst Germania Budyšin a bronzowu jeho rezerwa. Mato Wawrik bě najlěpši wrotar a Johana Wjeselic najwustojniša hrajerka. Popołdnju hraješe potom młodźina C. ST 1922 Radwor wubědźi sej 1. městno, ST Hnašecy-Dobruša druhe a ST Marijina hwězda Pančicy-Kukow 3. městno. Wot 19 do 23 hodź. nastupichu koparjo młodźiny B. Tež tu přesadźichu so domjacy z 18 dypkami. Na dalšimaj městnomaj slědowaštej ST Horni kraj a ST Wulka Dubrawa.
Wuslědki (13.02.18)
Kopańca, wokrjesna wyša liga
Wojerowski FC – Bukecy 3:0 (1:0)
Germ. Budyšin – Großnaundorf 4:1 (1:1)
Rakecy – Hnašecy-Dobruša 3:0 (0:0)
Kumwałd – Sokoł Ralbicy/Hórki 0:1 (0:1)
SC Großröhrsdorf – ST Budyšin 6:0 (2:0)
LSV Hory – ST Wjelećin wupad
ST Radwor – Drohotka Ramnow wupad
1. SC Großröhrsdorf 16 35 : 5 40
2. Wojerowski FC 16 33 : 20 33
3. Rakečanske ST 16 39 : 22 30
4. Módro-běli Kulow 15 38 : 14 28
5. SG Großnaundorf 16 32 : 26 25
6. Motor Kumwałd 16 28 : 23 25
7. Sokoł Ralbicy/Hórki 16 20 : 22 24
8. LSV Hory 15 37 : 34 22
9. Drohotka Ramnow 15 30 : 31 21
10. ST Hnašecy-Dobruša 16 29 : 32 21
11. Póst Germ. Budyšin 16 29 : 28 18
Slěbro a bronza za volleyballistow SGB
W swójskej hali wudobychu sej hólcy-volleyballisća Serbskeho gymnazija Budyšin (SGB) w regionalnym finalu starobneje skupiny III pod hesłom „Młodźina trenuje za olympiju“ slěbro. Holcy zakónčichu turněr z bronzu.
Regionalne volleyballowe finale holcow a hólcow štyrjoch najlěpšich šulow wuchodneje Sakskeje w sportowni Serbskeho šulskeho a zetkawanskeho centruma Budyšin w starobnej klasy III bě šulski nawoda SGB René Wjacławk wotewrěł. Z wosebitym aplawsom powita wón zamołwiteho za šulski volleyballowy sport w Sakskej, Karla-Heinza Ruttkeho z Lipska.
Serbski gymnazij Budyšin – Wyša šula Niska 0:2
Za volleyballistki SGB bě zazběh do turněra jara napjaty, docpěwši přećiwo šulerkam z Niskej po sylnym boju krótko do kónca prěnjeje sadźby njerozsudne 22:22. Technisce dobre hrajerki tamnišeje wyšeje šule pak zmištrowachu brizantnu fazu klewernišo a dobychu sadźbu z 25:22. To da jim přidatnu motiwaciju, a tak rozsudźichu Nišćanki tež druhi přechod jasnje z 25:10 za sebje.
Serbski gymnazij Budyšin – Parkowa wyša šula Žitawa 2:1
