„Krimi“ na Radworskim sportnišću!
Poslednju njedźelu w juniju absolwowachu Radworscy koparjo prěnjeho mustwa swoju poslednju dypkowu hru sezony wokrjesneje ligi, stafle II.
Po tym zo běchu Radworčanam dźewjeć dypkow wotćahnyli, dokelž njemějachu postajenu ličbu sudnikow k dispoziciji, je so jim poradźiło deficit nachwatać a sej samo druhe městno tabulki zawěsćić. Wulki són wo postupje do wokrjesneje wyšeje ligi bě nětko jenož hišće móžny z pomocu Łutowskich koparjow. Bychu-li woni přećiwo konkurentej na prěnim městnje tabulki, Běłemu Chołmcej, znajmjeńša njerozsudnje hrali a bychu-li Radworčenjo runočasnje doma mustwo z Noweho Města přewinyli, móhli sej woni postupny són zwoprawdźić. Zo so tale konstelacija k woprawdźitemu krimijej wuwije, drje nichtó wočakował njeje.
Hrě při wysokim saku wotměli
Spočatk junija wotměštej so tradicionelnej volleyballowej hrě na Budyskim Serbskim gymnaziju. Jubilejny 25. duel muskeje generacije rozsudźichu wučerjo z 2:1 přećiwo maturantam, rozžohnowace so abiturientki přewinychu wučerki z 2:0.
Sportowu halu Serbskeho šulskeho a zetkawanskeho centruma Budyšin pjelnjachu tón dźeń šulerjo wjacorych lětnikow. Wosebje wulki bě fanowy blok dwanatkarjow. Woni postarachu so ze wšelakorymi „instrumentami“ wo porjadnu sportowu atmosferu a tworjachu tak perfektny ramik wubědźowanja.
11. nowembra 1992 běchu prěni raz dwanatkarjo a pedagogojo noweho Serbskeho gymnazija Budyšin (SGB) při wysokim saku mocy měrili. Tehdy přesadźichu so šulerjo přećiwo wučerjam z 2:1. Rjana tradicija hišće dźensa eksistuje, dokelž je volleyball na kubłanišću nade wšo woblubowany.
Koparjo SGB sej slěbro wubědźili
Šulerjo-koparjo 5. a 6. lětnika Serbskeho gymnazija Budyšin (SGB) wubědźichu sej w kónčnym wurisanju najlěpšich šěsć šulow Sakskeje slěbornu medalju. W finalu podležachu woni wysokemu faworitej, Gymnazijej Bürgerwiese Drježdźany, přinošowachu pak z wurjadnym rezultatom k najwuspěšnišemu sportowemu lětu na hornjoserbskim kubłanišću.
Staflowy dobyćer
Traktor Malešecy
– ST Wjernarjecy 2:1 (2:0)
Zestawa domjacych: Riedesel (46. Seiler), – Schwurack (Wunsch), Swakou, Stewig, Hasse, Benad (68. Günther), Steffek, Koksch, Unger, Hoferichter, Bolz
Do zakopa zakónčaceje dypkoweje hry sezony 2016/2017 dósta mustwo Traktora Malešecy wot wokrjesneho koparskeho zwjazka čestne wopismo a pokal za dočasne staflowe dobyće.
Partiju zahajichu Malešanscy koparjo ze spěšnymi nadběhami. Młody Janis Schwurack docpě z wótrej třělwu nawjedowanje hižo w 5. min. Slědowachu hišće dalše móžnosće, kotrež pak domjacy njewužichu. W 30. min. Marco Benad po róžku na 2:0 zwyši.
W druhim połčasu widźeše něhdźe sto přihladowarjow w Malešecach dale a słabšu kopańcu. Lochkomyslnosć Malešanow wjedźeše k tomu, zo móžachu hosćo w 62. min. přez Stefana Hölzela na 2:1 skrótšić.
Kurt Lorenc
Znowa Captainscup přewjedli
Worklečanske volleyballistki a volleyballisća wuhotowachu njedawno swój třeći turněr z mjenom Captainscup. Po lońšej přestawce, přetwara sportownje dla, móžeštaj organizatoraj Maćij Šěn a Ludwig Eckert dohromady 14 mustwow witać.
Na beachvolleyballnišću wojowaše wosom dwójkow wo dobyćerski pokal, a paralelnje k tomu wubědźowaše so šěsć cyłkow na trawniku za rjanej ponowjenej Worklečanskej sportownju. Tam hrajachu w modusu kóždy přećiwo kóždemu, z dwěmaj sadźbomaj hač do 15 dypkow. Po 15 hrajnych kołach přesadźi so tu mustwo Dwójna nula. Wone ani jeničku sadźbu njepřěhra a zawěsći sej tak zasłužene prěnje městno. Druhi bě team Tita dźiwow z jednej sadźbu předskoka před zastupnistwom Hintenreiner.
W finalu beachvolleyballa stejachu sej Andrey Antonov/Peter Noack (wobaj MSV Budyšin II) a Milan Budar (Viktoria Worklecy)/Marek Bačko (MTV Mariendorf) napřećo. Budyšanaj so po horcym boju přesadźištaj. Bronzowe městno zaručištaj sej Jurij Lipič (Viktoria Worklecy)/Petrick Leße (ST TuR Drježdźany).
Energija drastisce chłostana
Sportowe sudnistwo Sewjerowuchodneho koparskeho zwjazka (NOFV) je wjacorych přeńdźenjow přiwiska FC Energije Choćebuz dla koparskemu klubej pokutu 16 000 eurow nabrěmjeniło. Nimo toho dyrbi FCE prěnju domjacu dypkowu hru sezony 2017/2018 bjez přihladowarjow přewjesć. Přičiny chłostanja běchu za sudnikow za zelenym blidom tele: hra w Meuselwitzu (wobškodźenje schodow a płota), hra w Lipsku (mjetanje zapalaka) a hra w Budyšinje (pyrotechnika). Za to chce NOFV 6 000 eurow měć, za přeńdźenje při wonkownej hrě w Babelsbergu 10 000 eurow.
„Chłostanje je za naše towarstwo absolutna katastrofa. Z tajkim wusudom njejsmy ličili. Njedóstanjemy w dźěle přećiwo škarakam žanu podpěru. Smy woprawdźe wšitko činili, štož bě móžne, zo bychmy tajkim přeńdźenjam zadźěwali. Za wěstotne naprawy mamy kóžde lěto wudawki w šěsćcyfrowym wobjimje. Nimo toho wuprajamy so jasnje přećiwo prawicarjam. Někotři z našich porjadnych fanow su so jim w Budyšinje do puća stupili. Chłostani su nětko wšitcy. To njeje poměrne“, zwurazni prezidij FCE po pokutnym mandaće, kotryž nochce akceptować. Georg Zielonkowski
Wot zašłeho tydźenja regionalny koparski ligist Budissa Budyšin ...
Widźał,słyšał, napisał (03.07.17)
Awtor dźensa
Michał Nuk
Jónkrótna šansa skićeše so lětsa němskim lubowarjam kolesowanja, kotřiž móžachu po 30 lětach zaso raz „le grand depart“ – start jězby Tour de France – w swojej domiznje dožiwić. Tule składnosć sym wužił a podawam swoje zaćišće wo třećim najwjetšim sportowym zarjadowanju swěta.
Wot minjeneho štwórtka hač do njedźele, wot předstajenja mustwow hač k startej 2. etapy sy móhł w Düsseldorfje najlěpšim kolesowarjam cyle blisko być. A sy-li zbožo měł, je ći snadź jedyn z faworitow, kaž Christopher Froome za žołty, Peter Sagan za zeleny trikot abo domoródny star, kaž němski mišter Marcus Burghardt, awtogram dał. A zbožo sy trjebał, wšako běchu statysacy fanow z cyłeho swěta do krajneje stolicy nad Rynom přichwatali a najlěpše městna hižo hodźiny do přichada kolesowarjow zabrali.
SGB sej bronzu wubědźił
Wučerjo-volleyballisća Serbskeho gymnazija Budyšin (SGB) skónčichu 50. wokrjesne mišterstwo z dobyćom přećiwo kolegam Powołanskeje šule za zežiwjenje Budyšin a wotzamknychu sezonu šěsć startowacych šulow z bronzu.
Sernjačan dalši wuspěch žnjał
Na lětušej wokrjesnej dźěćacej a młodźiniskej spartakiadźe w Budyšinje wuwojowa sej blidotenist Benjamin Grutka znowa dwě medali. Pola dwójkow přesadźi so młody Sernjančan z Paulom Hauffu (SZ Lückersdorf-Gelenau) přećiwo Freundej/Brokwitzej (SZ Łužnica/TuS 1890 Gersdorf-Möhrsdorf) w zajimawym finalu a wudoby sej tak złotu medalju.
Po tym sćěhowachu hry jednotliwcow. Tam hraješe Benjamin w finalu přećiwo swojemu partnerej z dwójki. Na kóncu pak dyrbješe so wón přećiwnikej z 0:3 kłonić. W rozsudnych fazach falowachu jemu prosće mocy a tróšku dokładnosće w akcijach. Ale tež druhe městno je wulki wuspěch, nad kotrymž so cyłe towarstwo Viktorije Worklecy za njeho wjeseli.
Marcel Rjelka
