Schwerin (dpa/SN). Dobre štyri tydźenje po wozjewjenju hrožaceho lista třoch senatorow USA přećiwo zamołwitym mórskeho přistawa Sassnitz-Mukran je ministerska prezidentka Mecklenburgsko-Předpomorskeje Manuela Schwesig (SPD) we wotmołwnym lisće z jasnymi słowami reagowała. „W spisu přistawej připowědźene sankcije a chłostanske naprawy najraznišo wotpokazuju“, tam rěka. Ze spisom senatorow jewješe so prěni raz pad, w kotrymž měrja so hroženja USA w zwisku z płunowodom Nord Stream 2 direktnje přećiwo jednomu z němskich předewzaćow.

W lisće, kotryž tež powěsćerni dpa předleži, wobara so Schwesig pospytam, němsku energijowu politiku wobwliwować. „Je suwereny rozsud zwjazkoweje republiki, zwotkel a po kotrym puću wona swoju energiju bjerje“, politikarka SPD wuzběhnje. Nimo toho so cyły rjad dalšich krajow w Europje na to spušća, zo budźe pipeline bórze dotwarjena.

Lipsk/Drježdźany (dpa/SN). Na wčerawšim cyłoněmskim warnowanskim dnju je so tež w Sakskej tójšto nimokuliło. Tak dóńdźe warnowanska app hakle z wulkim zapozdźenjom na mobilne telefony. Sireny, kotrež mějachu dypkownje w 11 hodź. wuć, na mnohich městnach mjelčachu. Přichodne dny chcedźa misnjenja na zwjazkowej a komunalnej runinje wuhódnoćić, zdźěli sakske nutřkowne ministerstwo w Drježdźanach. Zamołwići ministerstwa rěča přiwšěm wo „wažnym pruwowanju systemow“.

Zwjazkowy zarjad za škit wobydlerjow w Bonnje je mjeztym misnjenja warnowansku app za mobilne telefony nastupajo přiznał. Hłowna přičina je runočasne aktiwizowanje wjacorych warnowanskich systemow, štož wjedźeše k přećeženju techniki. Planowane bě systemy přez Zwjazk jónkrótnje aktiwizować. Tež w druhich krajach je k misnjenjam dóšło.

30 lět po zjednoćenju Němskeje a w času, w kotrymž so mnozy politiskemu establishmentej spřećiwjeja, su znowa horce diskusije. Čehodla je so wšitko tak wuwiło? Što su přičiny pačenja towaršnosće? Štó je wina na njespokojnosći ludźi na wuchodźe? Na Budyskim forumje wčera dopołdnja běchu sej sobudiskutowacy w publikumje – zwjetša staršeje generacije – hłownje přezjedni: Wina su ći tamni – rukowaćelnja, „wobsadniska móc“ ze zapada, stasi, stare kadry atd. Zo to snano tak jednore njeje a zo drje swójske zaznaće „my smy wopory“ wolóža, woprawdźitosći pak cyle njewotpowěduje, je mnohim po zdaću přetwjerdy chlěb. Połoženje je tež kompleksne a njeda so prosće čornoběłe rozkłasć. Přednoški a wěcowne diskusije, kaž je Budyski forum poskića, móža pomhać, swójske předstawy z nowymi informacijemi snano tróšku korigować a do zhromadneho dialoga přińć. Tež ­kniha „Das Jahr 1990 freilegen“ k tomu přinošuje. Cordula Ratajczakowa

Po nimale tydźenju na morju su pomocnicy dweju rybarjow před pobrjohom Awstralskeje wuchowali. Čołm, kiž njemóžeše skóncowaneho motora dla hižo jěć, wuhladachu po dny trajacym pytanju južnje města Adelaide. Do toho běchu nadźiju, jeju hišće žiweju namakać, nimale hižo spušćili. Najbóle wohroželi běchu rybarjow hoberske žołmy, kaž rozprawještaj. Swójbni witachu jeju z blešku piwa.

Mało jasnosće je sudniski wusud smjerdźateho kozoła dla wunjesł. Sudnistwo w Bayreuthu bě wukazało, zo njesmě smjerd skoćeća susodow „bytostnje“ mylić. Što to konkretnje rěka, njemóžeše tež rěčnik sudnistwa rjec. Susodka bě plahowarja skotu wobskoržiła, zo kozoł jeho stadła pječa surowje smjerdźi. Sudnik ­bě so wosobinsce k stadłu kozow podał, grawoćiwy smjerd, kotruž susodku hněwa, njemóžeše pak zwěsćić.