Minjeny štwórtk běchu so koparjo Chróšćanskeje SJ na puć do Pólskeje nastajili. Cil rěkaše wjes Raszowa w gmejnje Leśnica. Po někak tři a poł hodźiny docpěchu mužojo kwartěr za přichodne dny: hotel Viktorjan. Na druhi dźeń rano započachu trenować. Trenarjej Detlefej Panitzej dźěše při tym wosebje wosebje wo wutrajnosć. Prěnjej połdrahodźinskej jednotce přizamkny so připołdnju dalša. Tež testowa partija steješe hišće na programje. Přećiwnik bě mustwo ze Stareho Ujazda, hrajace na 6. runinje pólskeho ligoweho systema. Loni bě wone postupiło a ma ambicije dale postupić. Tak steještej na kopanišću runohódnej cyłkaj. Zaměr testa njebě jenož dobry wuslědk, skerje wuspytanje wšelakich formacijow. Spočatnje bě widźeć, zo maja Chróšćenjo napinacy trening za sobu. Domjacy běchu přeco kročel spěšniši a so w dwubojach přesadźichu. Spytachu přećiwnika zahe pod ćišć stajeć, tak zo bě opcija za SJC husto jenož dołhi bul. Hosćićeljo w ofensiwje so z technisce sylnymi hrajerjemi přeco zaso do šěsnatki předrěwachu.
Kapitan Radworskeho koparskeho mustwa Paul Zimmermann zakónči po wjacorych ćežkich zranjenjach swoju aktiwnu hrajnu karjeru, a to z runje 26 lětami(!). Matej Wjeńka je so z nim rozmołwjał.
Sy so lětsa rozsudźił swoju aktiwnu karjeru zakónčić. Zranjenja dźě su Će přeco zaso trapili, tak tež 2012 na europeadźe we Łužicy. Jako jedna z wulkich nadźijow sy za Serbow do turněra startował, dyrbiš pak hižo tak młody přestać.
Minjenej měsacaj je so w koparskich mustwach tójšto změniło. Někotre cyłki su w přihotach na nowu hrajnu dobu samo połojcu kadra wuměnili. Kilian Hrjehor je za někotre cyłki wotchady a přichady zezběrał.
FC Energija Choćebuz
přichady: Abdulkadir Beyazit (ST Babelsberg 03), Daniel Stanese (VfR Aalen)
wotchady: Benjamin Förster (VSG Altglienicke), Christos Papadimitriou (Mauerwerk, Awstriska), Gabriel Boakye (1. FC Köln II), Alexander Siebeck (Karlsruheski SC)
Budissa Budyšin
přichady: Alexander Schidun (Jednota Kamjenc), Marcel Bär (Dynamo Drježdźany U19), Eric Merkel (Biskopičanske KT 08), Stefan Richter (trenar wrotarjow), Philipp Dartsch (SpVgg Bayern Hof), Marek Langr (Jednota Kamjenc), Christopher Schulz (SpVgg Bayern Hof), Mateusz Ciapa (U 19 1. FC Magdeburg), Michael Schlicht (1. FC Schweinfurt 05), Niclas Treu (Lüneburger SK Hansa)
Sokoł Ralbicy/Hórki – VFB Drježdźany-Hellerau/Klotzsche 4:2 (0:0)
Minjeny pjatk wječor přijědźe do delanskeho Stadiona přećelstwa mustwo z Drježdźan, přećiwo kotremuž běchu koparjo Sokoła Ralbicy/Hórki hižo w zymje raz hrali. Trenar Chrystof Gloxyn měješe nimale 20 hrajerjow k dispoziciji a naspomni hišće raz chutny charakter testoweje hry, kotruž chcyše na kóždy pad dobyć. Wobaj cyłkaj dojednaštaj so na to, trójce 30 mjeńšin hrać. Prěnja połojca słušeše domjacym, kotřiž pak dwě dobrej składnosći njewužichu. Tak přewzachu Drježdźanjenjo komando, a Sokoljo mějachu swoju lubu nuzu sej scyła bul wuwojować.
Po połčasu pak Ralbičenjo tempo powjetšichu a přez dwoje wulkotnje wuhrate wrota Stefana Bjeńša spěšnje nawjedowachu. Po zmylku hosćićelskeho wrotarja a z hłójčku pak Drježdźanscy koparjo wurunachu – to bě wjac hač njetrjebawše a zbudźi wulke mjerzanje Sokołow. Tola krótko do kónca so Pětr Domaška wo dobyće postara. Najprjedy wón z krótkeje distancy zwyši a w poslednjej mjeńšinje z rjanej třělwu do hornjeho třiróžka partiju ze 4:2 doskónčnje rozsudźi.
Budyšin/Biskopicy (SN/at). Na spočatku a w běhu koparskeje hry regionalneje ligi Biskopičanske KT 08 – Budissa Budyšin minjenu sobotu w Biskopicach je k antiserbskim parolam dóšło. Policija podawk z kameru dokumentowaše a zwěsći personalije škaraka. Mjeztym so tež statny škit z podawkom rozestaja.
„Jako FSV Budissa Budyšin nimamy diskriminowace a ponižace wołanja ani za rjane ani je njetolerujemy“, rěka na internetnej stronje Budyskeho koparskeho kluba. Budissa chce nětko ze swojim zamołwitym za fanow rěčeć a so z nim zhromadnje wo to starać, zo so tajke hanjace wołanja njewospjetuja. Budissa je drje so pola Biskopičanskeho KT 08 a jeho fanow zamołwiła, pola Serbow pak eksplicitnje nic.
W Biskopičanskim KT 08 su dźensa podawki analyzowali. „Distancujemy so wot tajkich ranjacych wołanjow“, rjekny nawoda jednaćelnje Fred Wonneberger našemu wječornikej. Jedna postajena naprawa je, zo jědźe prezident Jürgen Neumann dźensa z fanami w busu na hru přećiwo Lokomotiwje Lipsk, hdźež chce wohańbjace zadźerženje narěčeć.
Pjatk započnje so za Zapadołužiski koparski zwjazk sezona 2018/2019. Prěni duel we wokrjesnej wyšej lize wuhrajetej w Dobruši wot 18 hodź. mustwje ST Hnašecy-Dobruša a Póst Germania Budyšin. A to je nětčiša zestawa najwyšeje koparskeje ligi wokrjesa Budyšin:
Módro-běli Kulow
Sokoł Ralbicy/Hórki
Wojerowski FC
Rakečanske ST
LSV Hory
SG Großnaundorf
Motor Kumwałd
Drohotka Ramnow
ST Radwor
Natwar Němske Pazlicy
ST Porchow
ST Hnašecy-Dobruša
Zeleno-běli Bukecy
ST Kinspork/Łužnica
Póst Germania Budyšin
TSV Połčnica Jurij Bjeńš
SV Wehen/Wiesbaden
– FC Energija Choćebuz 0:2 (0:1)
Zestawa hosći: Spahić – Starcew (87.Geisler), Stein, Matuwila, Schlüter, Kruse, Weidlich, Zimmer (64. Stanese), Marcelo, Viteritti (74. Scheidhauer), Mamba
FSV Budissa Budyšin
– FC Viktoria 1889 Berlin 2:0 (0:0)
Zestawa domjacych: Ebersbach – Kunze, Patka, Hoßmang, Mack (90. Merkel), Ciapa, Weiß, Schlicht, Schmidt, Treu (64. Krawčik), Bönisch (79. Langr)
Po tym zo njebě přihot regionalneho koparskeho ligista Budissa Budyšin na nowu sezonu optimalny, startowachu Budyšenjo z někotrymi starosćemi. Přećiwnik Viktoria Berlin bě sej za hru wjele předewzał a chcyše kaž domjacy dobyće. A Budyscy koparjo chcychu swojemu trenarjej Torstenej Gütschowej, kiž swjećeše tón dźeń narodniny, tři dypki darić. W prěnim połčasu bě partija chětro wurunana. Najebać to pak mějachu hosćo dobru móžnosć, jako postara so Kwabenaboye Schulz z hłowu wo stróžele, bul pak prasny na zbožo Budissy do žerdźe (14.). Při horcych temperaturach přestawka za napoje (22.) runjewon wjele wočerstwjenja přinjesła njeje. Hač do změny stron hosćićeljo rumy wušiknje začinjachu a njedowolichu Viktoriji žane šansy. Sami pak spytachu so často před wrotami Berlinjanow zjewić. Tak bě 368 přihladowarjow z 0:0 k přestawce najprjedy raz spokojom.