Marko Šiman: Kriza ćěkancow dla móhła towaršnosć pačić
Budyšin (CK/SN). Najhórše, štož móhło so stać, je pačenje towaršnosće, kaž zwěsći to wčera Marko Šiman. „Sylnosć demokratije w Němskej bě přeco kruta srjedźizna, kotraž z ekstremami doprawa abo dolěwa ničo činić nima“, rjekny zapósłanc CDU Sakskeho krajneho sejma na forumje swojeje strony w Budyskim Sprjewinym hotelu. Tón słuži hižo połdra lěta jako dom požadarjow azyla. Runja politikarjej starosća so mnozy wobydlerjo. Někotři wčera rozprawjachu, zo wobhladuja jich zjawneho angažementa za ćěkancow dla prosće jako njepřećelow.
Ahmed Ali Tahseen bydli hižo třinaće měsacow w Sprjewinym hotelu. W nimale běžnej němčinje powědaše Sewjeroirakčan wo swojej ćěkańcy. „Chcu dźěłać, potom pjenjezy wot stata njetrjebam“, rjekny studowany twarski inženjer, „abo dale studować.“ Wosebje pak přeje sej 25lětny wjace kontaktow z Němcami, zo by swoje rěčne kmanosće dale polěpšił.