Wosta duchowne zjednoćenstwo

póndźela, 20. januara 2020
artikl hódnoćić
(0 )
Po nyšporje w Chrósćicach ćehnjechu wčera wěriwi ze swěčkami w procesionje ke kapałce,  kotruž je farar Měrćin Deleńk znowa poswjećił.  Foto: Feliks Haza Po nyšporje w Chrósćicach ćehnjechu wčera wěriwi ze swěčkami w procesionje ke kapałce, kotruž je farar Měrćin Deleńk znowa poswjećił. Foto: Feliks Haza

Z přednoškom dr. Birgit Mitzscherlich z Budyskeho diecezanskeho archiwa zahaji­ so minjeny pjatk rjad zarjadowanjow k 600. róčnicy wobstaća bratstwa swjateho Bosćana.

Chrósćicy (MG/SN). Něhdźe 110 zajimcam na farskej žurli historikarka rozprawješe, čehodla běchu w srjedźowěku bratstwa swjateho Bosćana nastali – a na to hłownje wo tym, što nam zachowane dokumenty wo Chróšćanskim bratstwje přeradźeja. Mór bě jako „čorna smjerć“ znata mrětwa, kotraž zlě zachadźeše. Tak w Europje na přikład w lětach 1347 a 1359 jenož połojca ludnosće přežiwi. Strach, zo znowa wudyri, bě stajnje wědomy. Ludźo wućěkachu so tuž swjatemu Bosćanej, tehdy jara popularnemu swjatemu. Dokument wo załoženju Chróšćanskeho bratstwa njeeksistuje – lětoličba 1420 pak jewi so w protykarskim artiklu 1904, hdyž mějachu něhdźe 500 čłonow. Załožene bu jako pohrjebne bratstwo, kotrež zemrětym hódne chowanje z Božej mšu wuhotuje a so za nich modli. Zakład je křesćanske zrozumjenje, zo bywa zhromadnosć mjez žiwymi a mortwymi, dr. Mitzscherlich rozkładźe. Iniciatiwy tajkich bratstwow wuńdźechu „wotdeleka“ a běchu sylne znamjo „awtonomije lajkow“. Tak běchu bratstwa skazali a zdźěla­ sami zapłaćili fararjej a kapłanej kemše bratstwa, rekwiemy za zemrětych, kantorjenje wučerja a zwonjenje zwóńka za to. Na přikład dósta farar­ dźewjeć najgrošow za spěwane kemše. Při zastupje měješe čłon wosom najgrošow zapłaćić.

Ze zamóženja bratstwa tež pjenjezy wupožčowachu. Wjetšu sumu chcychu za nowotwar Chróšćanskeje cyrkwje darić. Z toho nasta 1769 zwada z biskopskim zarjadom, kotryž jich financy přepruwowaše. Wukopa so, zo maja 1 300 tolerjow zamóženja, ale wjele wjace běchu jim wěrićeljo dołžni. Hakle po zrjadowanju financow so dojednachu a smědźachu cyrkwiny twar ze 680 tolerjemi, přez wróćožadanja požčonkow zdobytymi, podpěrać. Zajimawe słyšeć bě, zo mějachu někotři čłonojo čorne bratrowske płašće ze slěbornej bortu (1802 běchu zličbowanki 9 płašćow naspomnjene), zo mějachu swójske čorno-běłe chorhoje a zo su w 19. lětstotku zapłaćili ćišć nowych serbskich spěwarskich „Jězusowa winica“. Wo towaršliwosći abo někajkich swjedźenjach bratstwa swjateho Bosćana w aktach ničo njesteji – to tež njebě jich nadawk, wostachu přeco duchowne zjednoćenstwo, rěkaše rezimej referentki.

Po přednošku mějachu słucharjo hišće tójšto prašenjow, mjez druhim k tuchwilnemu połoženju a socialnemu skutkowanju. Wo tym informowaštaj předsyda, wosadny farar Měrćin Deleńk a rěčnik bratstwa Jurij Špitank.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND