Koncept 2plus dale zwoprawdźeć

srjeda, 01. apryla 2020
artikl hódnoćić
(0 )
 Karl-Heinz Schütze  Foto:  Andreas Kirschke  Karl-Heinz Schütze Foto: Andreas Kirschke

Wo połojčnosćach Karl-Heinz Schütze nidźo­ njedźerži. „Hdyž so gratu přimaš, da porjadnje“, je dewiza 61lětneho Wojerowčana. Wot 2014 do 2019 bě wón po­ra­dźowacy wobydler we Wojerowskej přiradźe za serbske naležnosće. Na to chce nawjazać. Čornochołmčanski Krabatowy młyn ma dale rosć a wuprudźeć. Model Witaj w Němčanskej pěstowarni „Pumpot“, kotraž je w nošerstwje Serbskeho šulskeho towarstwa, dyrbi dale hić. Na to nawjazowacy koncept 2plus na Handrija Zejlerjowej zakładnej šuli ma so konsekwentnje dale zwoprawdźeć. To wšo jemu na wutrobje leži. „Trjebamy serbšćinu tež na přichodnej wyšej šuli. Po móžnosći měli tam tohorunja předmjety kaž zemjepis, biologiju a stawizny w serbskej rěči podawać. Personal zawěsćić měło kultusowe ministerstwo.“

Narodźił so a wotrostł je Schütze we Wojerecach. Nan je konsumowu towaršnosć nawjedował, mać bě zawodna chorobna sotra. Hižo zahe wotkry sej Karl-Heinz Schütze lubosć k warjenju, da so na kucharja wukubłać a bě z 22 lětami najmłódši wukubłany kucharski mišter Choćebuskeho wobwoda. Poł lěta smědźeše wón samo w Berlinskim Palasće republiki kucharić. Po změnje dyrbješe so znowa wusměrić, a bu wučer na Wojerowskej Euro-šuli, hdźež wukubłaše młodostnych w domjacnosći a gastronomiji. Wot 1998 wuwučuje wón w Powołansko-šulskim centrumje „Konrad Zuse“.

Serbske korjenje drje Karl-Heinz Schütze nima. Hižo jako šuler pak ze­znajomi so z jutrami a Kulowskim kři­žerskim procesionom. Spěw a hłuboka pokornosć muži jeho fascinowaštej. Jako dźěćo bě sej tež ptači kwas zbližił. Přez dźěda a wowku ze stron nana nańdźe wón přistup k Serbam. Jeho dźěd Paul Schütze bě w Delnim Wujězdźe pjekarski mišter był. Jeho wowka Anna Schütze je hišće serbšćinu rozumiła.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND