Lubowarjo listowych znamkow, póstowych kołkow a wosebitych wobalkow maja tele dny wurjadnu přičinu, sej do Budyšina dojěć. Tu prezentuje so hornjołužiska wustajeńca listowych znamkow OBRIA, kotraž ma tohorunja wobšěrny serbski podźěl.

Budyšin (SN/MWj). Regionalna wustajeńca listowych znamkow OBRIA pokazuje so wot wčerawšeho hač do njedźele w Budyskej „Krónje“. Přehladku wuhotuje tudyše filatelistiske towarstwo. Kmótřistwo za nju přewzał je zapósłanc Sakskeho krajneho sejma Marko Šiman (CDU). Při wčerawšim wotewrjenju wustajeńcy skedźbni předsyda Domowiny Dawid Statnik mjez druhim na to, zo su tež serbske listowe znamki a dwurěčne kołki kruty wobstatk filatelistiskeho swěta Hornjeje Łužicy.

OBRIA 2022 wěnuje so wjacorym mjezynarodnym a regionalnym jubilejam. Jedyn tajki je 150 lět wobstejace póstownistwo na Sněžce. Dale zaběraja so ze 150lětnym wobstaćom Budyskeje hwězdarnje a ze 150. róčnicu załoženja Budyskeje pišćelotwarskeje firmy Eule. Wopytowarjam wustajeńcy poskićuja na wšitkich dnjach wosebite wodźenja po hwězdarni a firmje.