Slepo (JoS/SN). UNESCO geopark Mužakowski zahork je předwčerawšim na tradicionalne lětnje pućowanje dźěći přeprosył. Zetkanišćo bě při Slepjanskim Serbskim kulturnym centrumje, cil jěžikowa wučbna šćežka. Wona je projekt Slepjanskeje zakładneje šule w zhromadnym dźěle ze Sakskej přirodnej šulu, spěchowany přez załožbu „Doma w Slepom, Rownom, Mułkecach“.

Prašenja za hódančko su holcy a hólcy spisali, kotřiž chodźachu w šulskim lěće 2011/2012 do 4. lětnika. Na kóždej z cyłkownje jědnaće stacijow mějachu wobdźělnicy předwčerawšim słowo wuhódać, w kotrymž chowaše so pismik za cyłkowne wuhódanje. To bě němsce runje tak kaž serbsce móžno. Ewa Brunner, w geoparku za wobswětowe kubłanje zamołwita, a přewodnica po geoparku ­Verina Dullin wjeseleštej so nad njewočakowanym wulkim zajimom. Wšako je šćežka do přirody raz cyle hinaše dožiwjenje. 20 dźěći kaž tež runje telko staršich, dźědow a wowki slědowaše na tři hodźiny trajacym pućowanju wuwjedźenjam fachowčow. Na kóncu běchu wšitke dźěći prawe wuhódanje wuslědźili.