Wospjetne namócnosće pozdatnych lěwicarskich awtonomnych w Lipsku su Sakski krajny sejm wčera pohnuli, we wobłuku aktualneje debaty wo tym rěčeć – a to chětro kontrowersnje.

Drježdźany (SN/MkWj). Sakska chce přećiwo namócnym ekscesam pozdatnych lěwicarskich ekstremistow w Lipsku konsekwentnje zakročić. Tole je nutřkowny minister Drježdźanskim Markus Ulbig (CDU) wčera w krajnym sejmje připowědźił. „Sakska dyrbi na to reagować, a to ze wšěmi srědkami“, rjekny Ulbig, kiž bě jako posledni rěčnik w přewšo emocionalnej debaće před mikrofon stupił. Zdobom warnowaše wón před přehnatymi reakcijemi a před relatiwowanjom njeskutkow. Pozadk diskusije běchu najnowše randale w Lipsku. Tam bě něhdźe sto zdźěla zakuklenych ekstremistow twarjenja a policistow nadběhowało. Wot spočatka lěta su mjeztym sydom tajkich namócnych akcijow zličili. Policija ma skućićelow za lěwicarskich ekstremistow.

Paris (dpa/SN). Kopilot znjezboženeho pasažěrskeho lětadła předewzaća Germanwings njebě po informacijach francoskeho statneho rěčnistwa lětanjakmany. Tole rjekny statny rěčnik Brice Robin wčera w Parisu, powołacy so na informacije lěkarjow. 27lětny kopilot bě instabilny a psychisce chory. Nimo toho měješe problemy z wočomaj. Zamołwići w Marseilleu chcedźa nětko přepytować, hač matej Germanwings abo maćerny koncern Lufthansa sobuzamołwitosć. Dotal pak nimaja pokazkow na to, zo stej předewzaći wo chorosći kopilota wědźałoj. Andreas Lubitz bě po přeswědčenju statneho rěčnistwa mašinu ze 149 pasažěrami 24. měrca wotpohladnje do katastrofy wjedł. Zražku do skały Alpow w južnej Francoskej njeje nichtó přežiwił. 27lětny muž bě po informacijach Robina w minjenych pjeć lětach pola 41 fachowych lěkarjow, w poslednim měsacu do nje­zboža pola sydom. W Halternje při jězoru chcychu dźensa 16 znjezboženych šulerjow tamnišeho gymnazija pochować. Woni běchu mjez woporami.

Bjezdźěłny? Čehodla njestanješ so to ze zaprajerjom? Nižozemski dźěłowy zarjad płaći bjezdźěłnym wukubłanje na „spi­rituelneho telefoniskeho poradźowarja“. Sydom bjezdźěłnym su za to dotal wot­po­wědne pjenjezy wupłaćili, kaž rěčnik zarjada nižozemskemu rozhłosej wobkrući. Priwatne předewzaće zajimcow za něhdźe tysac eurow nawuči, kak maja z kartow čitać abo dóńt čłowjeka w škleń­čanej kuli spóznać. Tež reinkarnaciju – wožiwjenje zemrětych – tam poskićeja.

Na wšě 15 wosobow w jednym awće je policija při kontroli w Badensko-Württembergskej zwěsćiła. Dźesać dorosćenych a pjeć dźěći běchu po puću do Španiskeje, zo bychu tam na žnjach pom­hali. Zastojnicy policije klučiki awta sćazachu, dokelž běchu 35lětneho šofera a jeho sobujěducych hižo dźeń do toho zadźerželi a jim dalejězbu zakazali.

Předewzaćeljo na wopyće

Čorna Pumpa (SN/ch). Na přeprošenje twarskeho předewzaća ASG Grodk je delegacija egyptowskich předewzaćelow, inwestorow, hospodarskich spěchowarjow a wuwiwarjow projektow industrijnišćo w Čornej Pumpje wopytała. Wosebje zajimowali su so egyptowscy fachowcy za tamniši management. Informacija, zo planuje zwjazkowe knježerstwo bórzomny kónc zmilinjenja brunicy, pak jich chětro zadźiwa. W Egyptowskej wšak planuja wjacore nowe brunicowe milinarnje twarić, trěbny knowhow maja tuchwilu z Indiskeje.

Łužiska Nysa renaturěrowana