Incidenca snadnje niša
Budyšin/Zhorjelc. Aktualnje je Zhorjelski wokrjes tři dalše natyknjenja z koronawirusom zwěsćił. RKI podawa tam incidencnu hódnotu 4,0. Za Budyski wokrjes registruja samsnu incidencu a tohorunja tři nowoinfekcije. Na wosebitej akciji wčera we Wojerowskim Łužiskim centeru je so 261 ludźi spontanje šćěpić dało. Dalšej tajkej akciji přewjedu 10. a 12. awgusta w Budyšinje a Wojerecach.
Kartki jeničce w předpředani
Nuknica. Towarstwo barakka z.t. wuhotuje po lońšim wupadźe lětsa znowa Nukstock-openair, po zwučenym wašnju posledni kónc tydźenja w awgusće. Tónraz pak njebudźe móžno sej zastupny lisćik při wječornej kasy kupić. Kartki hodźa so pod jeničce online w předpředani skazać.
35 próstwow zapodali
„Sotra“ z nowymi funkcijemi
Budyšin. Awtomatiski přełožowar „sotra“ je wotnětka tež pod sotra.app přistupny. Nimo toho wobsahuje program nětko dalše funkcije. Tak móža wužiwarjo přispomnjenja a pokiwy sposrědkować. Přidatnje móža woni dowolić, teksty a přełožki składować a dale wužiwać dać, zo hodźeli so tekstowy korpus rozšěrić a wuslědki polěpšić.
Incidenca w Sakskej najniša
Budyšin/Zhorjelc. Sakska je po informacijach dpa zwjazkowy kraj z najnišej incidencu w Němskej. W minjenym tydźenju zwěsćichu na 100 000 wobydlerjow šěsć nowonatyknjenjow z koronawirusom. W Budyskim wokrjesu zličichu tři dalše infekcije, incidenca tu wučinja po Roberta Kochowym instituće dale 6,3. Tež w Zhorjelskim wokrjesu zwěsćichu tři nowonatyknjenja a lochke zwyšenje incidency na 2,8.
Dźesać direktnych kandidatow
Ideje prašane rěč wožiwić
Budyšin. Załožba za serbski lud přihotuje wupisanje idejoweho wubědźowanja „Rěč zwjazuje. Rěc zwězujo. Sorbisch verbindet.“ Prašane su inowatiwne a naslědne ideje za konkretne regiony, kak hodźała so serbšćina wožiwić a we wšědnym dnju lěpje zakótwić, zo by serbsku zhromadnosć sylniła a identitu skrućiła. Wupisane budu myta w cyłkownej hódnoće 80 000 eurow.
Spontanje so šćěpić dali
Budyšin. Wjace hač 200 ludźi je so wčera w Budyskim Centeru na Žitnych wikach pře koronu šćěpić dało. Akciju chce Budyski wokrjes hromadźe z tamnišim wokrjesnym zwjazkom DRK jutře we Wojerowskim Łužiskim centeru wospjetować. Incidenca w Budyskim wokrjesu je po informaciji RKI dźensa snadnje na 6,3 woteběrała, w Zhorjelskim wučinja wona dale 2,0.
Plany předpołožili
Dalšu koronainfekciju zwěsćili
Budyšin/Zhorjelc. Budyski wokrjes je wčera dalše natyknjenje z koronu zwěsćił, RKI poda dźensa incidencu 7,3. Aktualnje je tu tuchwilu 35 ludźi na wirus schorjenych, dwě wosobje lěkuja w chorowni. W Zhorjelskim wokrjesu je incidenca dale na 1,6. Wot dźensnišeho zwjazkowa policija tež na mjezy do Čěskeje a Pólskeje w Hornjej Łužicy sylnišo kontroluje, hač so wšitcy pućowacy na winowatosć testowanja dźerža.
Znowa přidatne městna
Budyšin. Tež w poslednim tydźenju Budyskeho lětnjeho dźiwadła móže NSLDź snadneje incidency dla publikumej 135 přidatnych městnow za kóžde předstajenje inscenacije „Sherlock Holmes a paski Beatlesow“ poskićić. Hač do njedźele je jich dohromady hišće šěsć předstajenjow na Budyskim hrodźe.
Dalša pomoc za start-upy
Test po dowolu trěbny
Budyšin/Zhorjelc. Wot wčerawšeho dyrbja so nawrótnicy z dowola na koronu testować dać. Z toho wuzamknjeni su šćěpjeni a wustrowjeni, dalokož njejsu so z koronawariantoweje kónčiny wróćili. Wěstotnych přičin dla je wustajenje digitalneho šćěpjenskeho certifikata w Budyskim wokrjesu wokomiknje jeno přez domjaceho lěkarja móžne. Incidencna hódnota Budyskeho wokrjesa je po RKI dźensa 7,7. W Zhorjelskim wokrjesu wučinja wona dale 1,6.
Intendant na dwě lěće
Budyšin. Tomaš Kreibich-Nawka je na přichodnej dwě lěće powołany intendant Serbskeho ludoweho ansambla. Wón přewza zastojnstwo dotalneje intendantki Judith Kubicec, kotruž je wot lěća 2020 hižo zastupował. Ze zazběhom noweje hrajneje doby wobsadźi SLA tež městnje chóroweho nawody a nawody orchestra.
Dalše openair-koncerty
Gižkojce. Kulturny forum łužiskeje brunicy swoje lěćne koncerty na Gižkojskim (Geißendorf) dale wjedźe. Po dobrym zazběhu spočatk lěća planuja za 8. awgust folk a pop, 22. awgust klasikarje ze 70tych lět a 26. septembra šansony a pop. Koncern LEAG koncerty podpěruje.
Incidenca přiběra
Budyšin/Zhorjelc. W Budyskim wokrjesu su wčera dwanaće nowych infekcijow zwěsćili. RKI poda tu dźensa incidencu 6,7. W Zhorjelskim wokrjesu je so jedna wosoba inficěrowała, incidenca stupa na 2,0. Zastupowaca předsydka frakcije Lěwicy w Zwjazkowym sejmje Caren Lay kritizuje „přesnadnu iniciatiwu“, na niskej šćěpjenskej kwoće w Budyskim wokrjesu něšto změnić. Sakska ma w Němskej z 52 procentami najnišu kwotu.
Lange žada sej uniwersitu
Zhorjelc. Zhorjelski krajny rada Bernd Lange (CDU) namołwja sakske knježerstwo, Wysoku šulu Žitawa/Zhorjelc k uniwersiće wutworić. To by lěpše wuměnjenja skićało, nowe slědźerske instituty a nowe industrije zasydlić. Zdobom kritizowaše Lange, zo planowane sakske slědźerske wulkocentry wutworej infrastruktury we wuchodnej Sakskej zadźěwaja.
Mjenje rybow w Sakskej
Do abo po nakupje so šćěpić dać
Budyšin/Wojerecy/Zhorjelc. W Budyskim centeru na Žitnych wikach móža so ludźo přichodnu wutoru a wutoru pozdźišo pře koronu šćěpić dać, we Wojerowskim Łužiskim centeru přichodnej dwaj štwórtkaj. Dohromady sydom nowych infekcijow je Budyski wokrjes zwěsćił, incidenca postupi tu po podaću RKI na 5,3. W Zhorjelskim wokrjesu wučinja incidenca dale 1,6.
Podpěruja wopory zapławjenjow
Kamjenc. Z dohromady 20 000 eurami chcetej město Kamjenc a jeho bydlenska towaršnosć SWG wopory wulkeje wody podpěrać. Pjenjezy chcedźa z měšćanskeho kaž tež z etata SWG wzać. Za to su so měšćanscy radźićeljo a jednaćelstwo SWG wuprajili, kaž Lessingowe město informuje. Po naprašowanju SN města Budyšin, Wojerecy, Biskopicy a Běła Woda ničo podobne njeplanuja.
Spěšnoćahowa trasa njewěsta
Incidenca dale niska
Budyšin/Zhorjelc. W Budyskim wokrjesu je po informaciji Roberta Kochoweho instituta koronaincidenca na 3,0 woteběrała. Dwaj pacientaj staj so wustrowiłoj, jedna wosoba je so z wirusom natyknyła. W Zhorjelskim wokrjesu wučinja incidenca dale 1,6.
Nowe swětowe namrěwstwo
Fuzhou. Města Mainz, Worms a Speyer su jako kolebka europskeho židowstwa do lisćiny swětoweho namrěwstwa přiwzate. Na te wašnje je UNESCO židowske kulturne městna w Němskej prěni raz wuznamjeniła. Dale bu wčera tež delnjogermanski Limes jako dźěl mjezy antikskeho Romskeho mócnarstwa jako swětowe namrěwstwo připóznaty.
Přećiwo winowatosći šćěpjenja
Incidenca nimale stabilna
Zhorjelc/Budyšin. W Hornjej Łužicy wostawa incidenca dale pod hódnotu pjeć, tež, hdyž je w Zhorjelskim wokrjesu mjeztym po podaću RKI na 1,6 postupiła. Tam su kaž w Budyskim wokrjesu dwě dalšej koronainfekciji zwěsćili. Za Budyšin poda RKI dźensa z 3,3 tróšku nišu incidencnu hódnotu.
Wjace ludźi na Hrodźe móžnych
Budyšin. Němsko-Serbske ludowe dźiwadło informuje, zo rozšěrja přihladowarsku kapacitu za inscenaciju „Sherlock Holmes a paski Beatlesow“ na Budyskim hrodźe. Hač do 1. awgusta změja na kóždym předstajenju 135 přidatnych městnow. Dale z NSLDź rěka, zo „małe lětnje dźiwadło“, klankowa hra „Verfitzt und zugenäht“, na zahrodźe wulkeho domu kónc tydźenja schorjenja dla wupadnje.
Materielne swědstwa zwěsćić
Incidenca dale snadna
Budyšin. Hornja Łužica słuša k tym regionam Němskeje ze snadnej incidencu pod hódnotu pjeć. RKI je za Budyski wokrjes dźensa 3,7 podał, za Zhorjelski hižo štwórty dźeń 0,8. W Budyskim wokrjesu běchu minjeny pjatk wo třoch natyknjenjach z koronawirusom informowali. Tuchwilu je tu 46 komunow wot cyłkownje 57 bjez korony.
Zapodočěske kupjele w UNESCO
Karlovy Vary. Komitej swětoweho namrěwstwa je kónc tydźenja zarjadowanje cyłkownje jědnaće kupjelowych městow Europy do zapisa UNESCO wobkrućił. Nastupajo Čěsku republiku poradźi so to znatemu „kupjelowemu třiróžkej“ Karlovy Vary–Mariánske Lázně–Františkovy Lázně. Zhromadna nominacija městnosćow ze sydom krajow bě w mjenowanym zwisku něšto njewšědne.
Herbert Köfer zemrěł