Krótkopowěsće (18.06.21)
Młody wulkoprojekt předstajili
Budyšin. Serbski hudźbny kolektiw Trio a kumple a młodźinske towarstwo Pawk stej dźensa w Budyskej Röhrscheidtowej bašće projekt „Carpe noctem – Njeskónčna nóc“ předstajiłoj. Pop-opera změje 10. septembra w Chróšćanskej wjacezaměrowej hali „Jednota“ premjeru. Dohromady štyri předstajenja su planowane. Na jewišću a za nim skutkuje něhdźe 55 akterow, mjez druhim rejwarjo, spěwarjo a hudźbnicy.
Incidenca na niskim niwowje
Budyšin/Zhorjelc. Strowotniskemu zarjadej Budyskeho wokrjesa zdźělichu hač do wčerawšeho sydom dalšich natyknjenjow z koronawirusom. Aktualnje je 131 inficěrowanych wobydlerjow, 284 wosobow je w karantenje. Incidenca je lochce na 8,7 stupała. W Zhorjelskim wokrjesu zwěsćichu jednu nowoinfekciju. Incidenca tam je so na 4,4 pomjeńšiła. We woběmaj wokrjesomaj njeje wo dalšich smjertnych padach ničo znate.
Podpěra za delnjoněmski zapis
Krótkopowěsće (17.06.21)
Hornja Łužica pod incidencu 10
Budyšin. W Budyskim wokrjesu su wčera wo dźewjeć natyknjenjach z koronawirusom a třoch smjertnych padach informowali. Zemrěći běchu w starobje 63 do 81 lět. Incidenca je po Roberta Kochowym instituće dźensa 7,7. Wo třoch nowoinfekcijach a jednej w zwisku z koronu zemrětej wosobje informowachu wčera we wokrjesu Zhorjelc. Incidenca tam wučinja po RKI dźensa 4,7.
Twarnišćo labora wopytałoj
Zhorjelc. Zwjazkowy minister za hospodarstwo Peter Altmaier a sakski ministerski prezident Michael Kretschmer (wobaj CDU) staj dźensa přichodne twarnišćo wodźikoweho testoweho labora w Zhorjelcu wopytałoj. Labor je jedyn z centralnych projektow strukturneje změny we Łužicy. Kónc lěta chcedźa twarić započeć, wot kónca 2022 ma labor dźěłać. Zwjazk a Sakska přewostajitej jemu 42 milionow eurow.
Rusku a Chinu wuzamknyli
Krótkopowěsće (16.06.21)
Hač do kónca septembra
Budyšin. Šćěpjenskej centrumaj w Kamjencu a Lubiju ze swojimi mobilnymi teamami hač do kónca septembra dale dźěłatej. Prěnje šćěpjenja pak zaručeja tam jenož hišće hač do awgusta. W Budyskim wokrjesu přizjewichu wčera štyri natyknjenja z koronu a jedyn smjertny pad. Incidenca po RKI wučinja tu dźensa hódnotu 10. W Zhorjelskim wokrjesu rozprawjachu wo dwěmaj infekcijomaj. Incidenca po RKI je tam dźensa 6,3.
Hišće wušo z Pólskej dźěłać
Podstupim. Braniborska chce přichodnje hišće wušo ze susodnej Pólskej hromadźe dźěłać a po móžnosći wjele žiwjenskich a politiskich wobłukow splesć. To je krajne knježerstwo po informacijach statneje kenclije wčera wobzamknyło. Tak chcedźa mjezu přesahowacu zhromadnosć sylnić a rozrost pomjezneho regiona zhromadnje zaručić.
Startuja nowy podcast
Krótkopowěsće (15.06.21)
Dźeń a mjenje natyknjenjow
Budyšin. W Budyskim wokrjesu informowachu wčera wo jednym natyknjenju z koronawirusom. W tudyšich chorownjach lěkuja tuchwilu 44 koronapacientow, z nich dwanaće na intensiwnej staciji. Incidenca po RKI je tu dźensa 13,7. We wokrjesu Zhorjelc registrowachu wot soboty hač do wčerawšeho tři dalše infekcije a dwaj smjertnej padaj z časa wot 2. do 4. junija. Incidenca po RKI je tam 6,7.
Sputnik z ekologiskeje surowizny
Eespo/Paris. Finske předewzaće Arctic Astronautics a europska swětnišćowa agentura ESA wuwiwatej prěni přewažnje drjewjany satelit, kotryž chcedźa hišće lětsa do orbita dowjezć. Zaměr projekta „WISA Woodsat“ je wobkedźbować, kak so bjezćežitosć a radiacija w kosmosu na drjewo wuskutkujetej, a wuslědźić, hač hodźało so wone tam jako alternatiwa na přikład k zwjazowanskim maćiznam (Verbundstoffe) wužiwać.
Nahrawaja w Čěskej Šwicy
Krótkopowěsće (14.06.21)
W mnohich wobłukach bjez testa
Budyšin. W Budyskim wokrjesu njeje wot dźensnišeho w mnohich wobłukach hižo negatiwny koronatest trěbny. Na to skedźbnja krajnoradny zarjad, po tym zo bě incidencna hódnota pjeć dnjow za sobu pod 35. Wot pjatka hač do njedźele bě tu 22 nowych natyknjenjow, incidenca po RKI wučinja dźensa 17,1. Wokrjes Zhorjelc je předwčerawšim dwě infekciji a dalšej smjertnej padaj wozjewił. Infekcija tam je po RKI dźensa 7,1.
Lisćinu kandidatow schwalili
Njebjelčicy. Kulturna wědomostnica Cosima Stracke-Nawka, filmowc Reiner Nagel a Njebjelčanski wjesnjanosta Tomaš Čornak su kandidaća Serbskeho sejma za mandat serbskeho čłona Rozhłosoweje rady MDR. Jich mjena steja na lisćinje, kotruž su sejmarjo na swojim wirtuelnym posedźenju sobotu schwalili. Lisćinu chcedźa za zhromadny namjet nětko Domowinje přepodać.
Berlinala z nowinku
Krótkopowěsće (11.06.21)
Lochce stupace hódnoty
Budyšin/Zhorjelc. 17 dalšich natyknjenjow su hač do wčerawšeho w Budyskim wokrjesu zwěsćili. Z nich bě šěsć dodatnje podatych. Dwě wosobje stej zemrěłoj. W Zhorjelskim wokrjesu mějachu wčera šěsć nowoinfekcijow a dweju zemrěteju. Incidenca we woběmaj wokrjesomaj zaso lochce stupa. Roberta Kochowy institut poda za Budyski hódnotu 22,7 a za Zhorjelski 8,7.
Wostrowčenjo wuznamjenjeni
Bonn. Němska biskopska konferenca je iniciatiwu „Měrowy swjedźeń Wostrowc“ z hłownym Katolskim mytom přećiwo ksenofobiji wuznamjeniła. Wostrowčenjo běchu so prawicarjam, w městačku so schadźowacym, mjez druhim na te wašnje spjećowali, zo wobchodam wokoliny wšo piwo wotkupichu, a prawicarjo takrjec na suchim sedźachu.
Zabyty architekt znowa wotkryty
Krótkopowěsće (10.06.21)
Incidenca dźeń a snadniša
Budyšin/Zhorjelc. W Budyskim wokrjesu zličichu hač do wčerawšeho dohromady 18 dalšich infekcijow z koronawirusom. Z cyłkownje 43 stacionarnje zastaranych 14 pacientow intensiwnje hladaja, dwanaćo su zemrěli. Incidenca je so na 20,3 znižiła. W Zhorjelskim wokrjesu zwěsćichu štyri nowonatyknjenja a dwaj smjertnej padaj. Dale woteběraca incidenca tam aktualnje 7,5 wučinja.
Kritizuja wólbne procedere
Budyšin. W lisće Domowinje kritizuja někotři jeje čłonojo přećiwki we wustawkach towarstwa, předewšěm wólbne procedere delegatow na hłownu zhromadźiznu. Woni sej žadaja, předsydstwo njewuwjazać, doniž njejsu přećiwki wujasnjene. Domowina skedźbnja na bazodemokratiski princip a zo jako zarjad njediktuje, kak towarstwa swojich delegatow wola. Jeli so něchtó postorkuje, njech to najpjedy w towarstwje tematizuje.
Wobchad w Hřensku wolóžić
Krótkopowěsće (09.06.21)
Incidenca niska kaž hišće ženje
Budyšin. 13 nowych natyknjenjow z koronawirusom su wčera w Budyskim wokrjesu zwěsćili. Dale stej dwě wosobje zemrěłoj. Incidenca po informacijach Roberta Kochoweho instituta dale woteběra. Wottam zdźělichu za dźensa hódnotu 23, tak nisku kaž hišće ženje. Za Zhorjelski wokrjes podawa RKI hódnotu 12,3. Tam zwěsćichu wčera pjeć infekcijow, jednu z britiskej mutantu B.1.1.7.
Nora Schmid nowa intendantka
Drježdźany. Semperowa opera Drježdźany změje wot hrajneje doby 2024/25 nowu intendantku. 42lětna Nora Schmid naslěduje potom Petera Theilera, kotrehož zrěčenje w lěće 2024 wuběži. Z Berna pochadźaca hudźbna wědomostnica skutkowaše hižo w sezonje 2010/2011 na Sakskej statnej operje, a to jako šefdramaturgowka a wot 2012 přidatnje jako wosobinska asistentka intendantki.
Přećiwo drogowej kriminaliće
Krótkopowěsće (08.06.21)
Dale woteběraca incidenca
Budyšin. Indicenca w hornjołužiskimaj wokrjesomaj po hódnotach Roberta Kochoweho instituta dale woteběra. RKI mjenuje za Budyski wokrjes dźensa hódnotu 31,4. Tu su wčera wo dźesać natyknjenjach z koronawirusom informowali. Za Zhorjelski wokrjes je RKI dźensa 16,2 podał. Tam wčera žanu dalšu infekciju njemějachu, za to pak tři smjertne pady z časa wot 15. meje do 1. junija.
Namołwa Altmaierej
Budyšin. Budyski krajny rada Michael Harig je zwjazkoweho hospodarskeho ministra Petera Altmaiera (wobaj CDU) namołwjał, zo měł nuzne naprawy přećiwo podróšenju twaršćiznow zawjesć. Za jednu z přičin ma Harig kumštne pomjeńšenje poskitka ze stron producentow. Najebać potrjebu a kapacity su wulke koncerny produkciju wobmjezowali, zo bychu pjenjezy za krótkodźěłacych dóstali, rěka z krajneho zarjada.
Naležnosće Romow polěpšić
Krótkopowěsće (07.06.21)
Wot srjedy dalše wolóženja
Budyšin. W Budyskim wokrjesu rozprawjachu wot pjatka hač do wčerawšeho wo 54 koronanatyknjenjach a pjeć smjertnych padach. Sydomdnjowska incidenca na 100 000 wobydlerjow po RKI je dźensa 36. Dokelž je hódnota znowa pod 50, budu wot srjedy dalše wolóženja. Wokrjes Zhorjelc informowaše wčera wo pjeć infekcijach. Incidenca tam stabilizuje so po RKI wot minjeneho pjatka pod 30, dźensa je wona 21,4.
Nowe jewišćo wobnowja
Podstupim/Zły Komorow. Dohromady 6,5 milionow eurow dóstanje Złokomorowske Nowe jewišćo za saněrowanje a wutworjenje swojich dźěłarnjow. To zdźěli braniborske ministerstwo za wědomosć, slědźenje a kulturu minjeny pjatk w Podstupimje. Je to prěni komunalny projekt, kotryž su w Braniborskej po zwjazkowym zakonju wo sylnjenju strukturow wobkrućili.
Bydlenske mobile jara požadane
