Wopiteho dwójce lepili

Budyšin. Policajscy zastojnicy su srjedu na Cyhelskim nasypje w Budyšinje wodźerja Fiata kontrolowali. Pola 45lětneho naměrichu 1,94 promilow alkohola w kreji. Policisća přikazachu, zo ma muž krej wotedać, a jemu dalšu jězbu zakazachu. To pak bě jemu po wšěm zdaću smorže. Połdra hodźiny pozdźišo mjenujcy muža znowa kontrolowachu, tónraz na Tuchorskej. Tam měješe wón mjeztym 2,0 promilow intus. Zastojnicy wupisachu wospjet chłostanske přizjewjenje a kluč awta sćazachu.

Wjele nalutowaneho zhubiła

Budyšin. Telefonowi wobšudnicy su wutoru w Budyskim wokrjesu z tak mje­nowanym wnučkowym trikom staršej žonje wjele pjenjez wulišćili. Cuza žona wudawaše so płakajo jako wnučka a powědaše, zo je runje samodruhu žonu přejěła. Dalša žona předstaji so jako po­licistka a starušce zdźěli, zo móhła wona z kawciju pomhać, zo wnučka do jastwa njetrjeba. Na to přepoda rentnarka cuzej žonje 40 000 eurow.

Zawinowarja hišće lepili

Wojerecy. Na křižowanišću na Grodkowskej šoseji we Wojerecach je wodźer nakładneho awta póndźelu dopołdnja wotboka do Mitsubishija zajěł, kiž chcyše naprawo wotbočić. Přiwšěm pólski šofer Lkw-ja dale jědźeše a so wo zražku njestaraše. Tuž 72lětny wodźer Mitsubi­shija za nakładnym awtom jědźeše a po puću policiju informowaše. Zastojnicy móžachu nakładne awto skónčnje na Drježdźanskej dróze zadźeržeć a wodźerja z podawkom konfrontować. Dohromady nasta něhdźe 5 000 eurow škody.

Moped pokradnyli

Miłoraz. Tež hdyž su dny Miłoraza hač k wotbagrowanju ličene, su tam při­wšěm paduši po puću. Tak su njeznaći minjene dny milinowy nastroj za elektriski płót direktnje z pastwy spakosćili. ­Nimo toho pokradnychu skućićeljo ze składa moped typa S 51. Mjez młodostnymi woblubowana mašina njebě při­zjewjena. Kaž policija informuje, nasta dohromady nimale 2 000 eurow škody.