Policija (27.01.23)
Prochsrěbak pokradnyli
Słona Boršć. Njeznaći su srjedu njepřitomnosć wobsedźerjow wužili a so do chěže w Słonej Boršći zadobyli. Tam wšitko přepytachu a pokradnychu srěbanski roboter w hódnoće 150 eurow. Wěcna škoda pak wučinja něhdźe 650 eurow. Kriminalny technikar zawěsći slědy na městnje njeskutka. Kriminalna słužba je přepytowanja zahajiła.
Policija (26.01.23)
Pod wliwom drogow jěli
Wojerecy. Hnydom pjeć šoferow, kotřiž wodźachu swoje awto pod wliwom drogow, su policisća předwčerawšim a w nocy na srjedu lepili. Jónu bě to w Sprjejcach, trójce we Wojerecach a jónu w Njedźichowje. Pola lepjenych zwěsćichu trójce konop, jónu amfetaminy a jónu samo kokain. Wšitcy pjećo změja za swój delikt pokutu płaćić.
Policija (25.01.23)
W předrasćerni kluč kradnyli
Budyšin. Zo njesměš swoje hódnotne wěcy w předrasćerni sportoweje hale wostajić, je předwčerawšim wječor wobsedźer Hyundaja w Budyšinje bolostnje nazhonić dyrbjał. Jako muž w hali na Nagelowej sportowaše, so njeznaći do předrasćernje zadobychu, wšitke toboły přepytachu a awtowy kluč wosoboweho awta sobu wzachu. Tak móžachu módry i20 startować a z nim wotjěć. Jězdźidło z lěta 2020 bě něhdźe 15 000 eurow hódne. Za nim nětko mjezynarodnje pytaja, kaž policija zdźěli.
Policija (24.01.23)
Njemdry wnučk zachadźał
Wojerecy. 23lětneho muža dyrbjachu policisća předwčerawšim připołdnju na Wojerowskej Bonhoefferowej změrować, a to hižo wospjetny raz. Wón chcyše na kóždy pad do bydlenja swojeje wowki a tak mócnje klinkaše, zo při tym klinkačk wobškodźi. Dokelž młody muž njemdrje zachadźeše, wołachu wobydlerjo policiju. Zastojnikam napřećo 23lětny tež runjewon kooperatiwny njebě, tak zo wzachu jeho sobu na rewěr. Pola młodeho harowaka namakachu policisća konop a amfetaminy.
Policija (23.01.23)
Woheń škodu načinił
Wojerecy. Něhdźe 300 000 eurow škody nasta sobotu wječor w awtowej zamkarni we Wojerecach. Wudyrili su płomjenja po wšěm zdaću po napjelnjenju tepjenja z wolijom. Woheń rozpřestrě so na pódlanske twarjenje a přeskoči tohorunja na wjacore wosobowe awta.
Policija (20.01.23)
Paduši w hosćencu
Budyšin. Hosćenc při Budyskim Bórklinje su sej njeznaći w nocy na srjedu jako cil swojeho njeskutka wupytali. Kaž policija rozprawja, so skućićeljo namócnje do lokala zadobychu a spytachu w nim so do dalšich rumnosćow předrěć. To pak so jim njeporadźi. Tuž cigaretowy awtomat namócnje wočinichu. Kelko cigaretow su pokradnyli, njeje znate. Wěcnu škodu powobliči policija na něhdźe 2 000 eurow.
Policija (19.01.23)
Wjele škody načinili
Běła Woda. Při zadobywanju do Běłowodźanskeho wobchoda su njeznaći w nocy na wutoru wulku škodu načinili. Najprjedy spytachu, so ze zadnimi durjemi do objekta łamać, štož pak so njeporadźi. Na to rozsudźichu so za rabiatnu wariantu a zajědźechu z jězdźidłom do zachodnych duri. Z wobchoda pokradnychu wjacore nastroje za wobdźěłanje zahrody, drastu a 20 litrow wolija. Rubizna ma hódnotu něhdźe 18 000 eurow. Wěcna škoda na zachodnych durjach wobchoda wučinja něhdźe 7 000 eurow.
Policija (18.01.23)
Z trikom pjenjezy wulišćili
Spale. Podhladne powěsće přez whatsapp staj tele dny mandźelskaj w Spalach dóstałoj. Cuzy wudawaše so jako syn mandźelskeju a napowěda, zo ma nowy handy, z kotrymž pak njemóže onlinebanking wužiwać, a prošeše wo 9 000 eurow. Spalowčanaj to wěrještaj a sumu přepokazaštaj. Pozdźišo wobšudnistwo pytnještaj a policiju informowaštaj.
Policija (17.01.23)
Ćeknjeneho tola lepili
Biskopicy. Na Cyrkwinskej dróze w Biskopicach chcyše so njedźelu wječor 41lětny wodźer wosoboweho awta wobchadnej kontroli wuwinyć. Jako policisća jemu signal k zadźerženju dachu, stupi muž na płun swojeho Golfa. Na šulskim dworje pak jeho zastojnicy tola spěšnje dosahnychu. Při alkoholowym tesće so wukopa, zo měješe muž 1,78 promilow alkohola w kreji. Nimo toho wón žanu płaćiwu jězbnu dowolnosć předpołožić njemóžeše. Na njeho čaka nětko jednanje třoch deliktow dla.
Policija (16.01.23)
Na statoku so paliło
Michałki. K hašenju wołachu wčera dopołdnja wohnjowych wobornikow do Michałkow. Tam paleše so dźěl štyristronskeho statoka. Jednoho ze štyrjoch wobydlerjow dyrbjachu zranjeneho do chorownje dowjezć. Po dobrej hodźinje bě woheń pod kontrolu, tak zo płomjenja na tamne dźěle statoka přeskočić njemóžachu. Přiwšěm nasta něhdźe štwórć miliona eurow škody. Po wšěm zdaću bě techniski defekt přičina wohenja.
