Twory za 40 000 eurow zničić dyrbjeli

Wojerecy. Njeznaći su so wo to postarali, zo je w nocy na štwórtk w kupnicy na Wojerowskej Šulskej hasy chłódźenska připrawa dospołnje wupadnyła. Najprjedy technikarjo z toho wuchadźachu, zo jedna so wo mylenje. Alarmowany monter pak zwěsći, zo běchu skućićeljo nuzowy zapinak na třěše kupnicy hasnyli. Z tym je chłódźenje za cyłe twarjenje dźěłać přestało. Wšitke w chłódźakach składowane twory dyrbjachu zničić. Škodu trochuja na něhdźe 40 000 eurow.

Piwowy wóz so palił

Roholń. Na statnej dróze S 108 pola Roholnja (Riegel) we Łazowskej gmejnje je so předwčerawšim piwowy wóz palił. Po wšěm zdaću bě so při nim koleso puknyło a škrě płomjenja zamiškrichu. Wodźerjej nakładneho awta so poradźi, připowěšak wotstajić, tak zo so Lkw njewobškodźi. Přiwołani wohnjowi wobornicy woheń zhašachu. Na piwowym wozu nasta něhdźe 5 000 eurow škody.

Kolesowarka znjezbožiła

Lejno. Njejapki kónc měješe předwčerawšim kolesowanski wulět mandźelskeju w Lejnom w gmejnje Halštrowska Hola. Wobaj běštaj z elektrokolesom po puću. Jako muž naprawo wotboči, chcyše jeho žona runje naprawo přesćahnyć. Wona do njeho zrazy a padny. Při tym so tak zrani, zo dyrbješe do chorownje.

Natutkany z awtom jěł

Chrósćicy. Dobry čuch mějachu policisća w nocy na njedźelu, jako w Chrósćicach wosobowe awto typa Chevrolet zadźeržachu a šofera kontrolowachu. Dokelž 49lětny chětro za alkoholom wonješe, přewjedźechu pola njeho test a zwěsćichu, zo měješe wón 1,36 promilow alkohola w kreji.

Drogi při sebi měł

Wojerecy. Při kontroli kolesowarja njedźelu we Wojerecach namakachu pola 27lětneho muža 20 gramow konopje. Jako na to jeho bydlenje kontrolowachu, zwěsćichu dalšich 72 gramow samsneje drogi a konopowu rostlinu.