Policija (27.04.23)
Njezbožo zawinował a ćeknył
Běła Woda. K ćežkemu njezbožu dóńdźe srjedu dopołdnja na Mužakowskej dróze w Běłej Wodźe. 81lětny šofer a 78lětna pasažěrka běštaj z Opelom do směra na Mužakow po puću. Do awta storči napřećo přijěduce awto tak, zo z puća zjědźe a do štoma zrazy. Zawinowar njezboža pak ćekny. Wohnjowa wobora dyrbješe pasažěrku a šofera Opela z awta wuswobodźić. Wobaj běštaj ćežko zranjenaj. Policija pyta za swědkami njezboža, z informacijemi wo zawinowarju.
Wopojeny po puću ...
Rakecy. ...běše wutoru dopołdnja 33lětny młodostny wodźer Toyoty, jako jeho policija při kontroli zadźerža. Drogowy test reagowaše pozitiwnje na amfetaminy. Jězba młodostneho bě z tym zakónčena. Wón dyrbi nětko z pokutu ličić.
Policija (26.04.23)
Jězdźidło z ćěkancami zadźerželi
Zhorjelc. Transporter z něhdźe 29 ćěkancami je sakska policija po přesćěhanju pola Zhorjelca zadźeržała. Zastojnicy chcychu jězdźidło wčera wječor kontrolować, tola 50lětny šofer ćekny, dźensa rěčnik zwjazkoweje policije zdźěli. Po něšto kilometrach zrazy transporter w Markersdorfje do awta policije. Po prěnich dopóznaćach so nichtó njezrani. Po informacijach zwjazkoweje policije jedna so pola ćěkancow wo muži, žony a dźěći ze Syriskeje. Zarjady jich nětko registruja. Jelizo woni wo škit w Němskej proša, dowjezu ćěkancow do wotpowědnych přebywanišćow. 50lětny wodźer transportera pak ma nětko z chłostanskim jednanjom ličić.
Policija (25.04.23)
Pytaja za mužom
Biskopicy. Wot minjeneho štwórtka popołdnja pyta policija w Biskopicach za 26lětnym Christianom Bartschom. Wón bě wokoło 16 hodź. bydlenje za hladanje na Augusta Königowej dróze wopušćił. Młody muž je duchownje wobmjezowany a trjeba medikamenty. Dotal je policija ze wšelakimi naprawami za nim pytała, tola bjez wuspěcha. Policija tuž nětko ludnosć wo pomoc prosy. Christian Bartsch je něhdźe dwaj metraj wulki a ma brune dlěše włosy. Woblečeny je wón žołty kabat, čorne joggingowe cholowy a sportowe črije. Štóž ma informacije, hdźe Christian Bartsch přebywa, abo štóž móže dalše informacije podać, njech so na Budyskim policajskim rewěrje pod telefonowym čisłom 03591 3560 abo na dalšich direkcijach přizjewi.
Policija (24.04.23)
Z rolerom jěł a drogi brał
Wojerecy. Zastojnicy Wojerowskeho policajskeho rewěra kontrolowachu zawčerawšim dopołdnja na Spalowskim puću wodźerja elektro-rolera. Při tym zwěsćichu, zo bě 43lětny drogi brał. Přewjedźeny drogowy test reagowaše pozitiwnje na konop a dalše zakazane substancy. Policisća postajichu, zo měła so jeho krej přepytować.
Policija (21.04.23)
Awto policije znjezbožiło
Budyšin. Wobchadne njezbožo, na kotrymž bě policajske awto wobdźělene, je so předwčerawšim w Budyšinje stało. Na Stieberowej chcyše šofer Škody nalěwo na Liebknechtowu wotbočić, dyrbješe pak napřećiwneho wobchada dla čakać. Jako bě to móžno šofer nalěwo wotboči. To pak wodźer policajskeho awta po wšěm zdaću wobkedźbował njeje, tak zo wobě jězdźidle do so zrazyštej. Při tym nasta něhdźe 4 000 eurow škody. Njezbožo wobdźěłali su policisća z přiwołaneho policajskeho awta.
Policija (20.04.23)
Dźěłowy lift zhubił
Tři Hwězdy. Na małym nakładnym awće přitwarjenu platformu za dźěła we wysokosći je šofer wčera popołdnju w kružnym wobchadźe pola Třoch Hwězdow zhubił. Dźěłowy lift wosta na puću ležo a tež multicar wosta tam stejo. Z wobeju wuběža wjetše mnóstwo hydrawliskeho wolija, čehoždla dyrbješe wohnjowa wobora přijěć, zo by wolij wotstroniła. Fachowa firma dyrbješe dróhu wurjedźić, za čož bě kružny wobchad zawrjeny. Tohodla dóńdźe do wšitkich směrow k dołhim rynkam čakacych awtow.
Policija (19.04.23)
Młodostneho nadpadnyli
Wojerecy. Wo nadpadźe na 15lětneho hólca we Wojerecach je policija wčera rano zhoniła. Swědkojo rozprawjachu, zo běchu njeznaći młodostni 15lětneho wotzady storkali a do njeho kopali. Přiwołane wuchowanske mocy dowjezechu zranjeneho do chorownje. Čehodla běchu njeznaći hólca nadpadnyli a štó woni su, dotal znate njeje.
Policija (18.04.23)
Ptača chěžka přilećała
Wojerecy. K njewšědnemu zasadźenju wołachu policiju w nocy na njedźelu na Huttenowu we Wojerecach. Tam bě wobydlerka hary dla wotućiła a chcyše na to wokno spanskeje stwy začinić. W tym wokomiku jej nadobo ptača chěžka wokoło wuši zleća. Na zbožo drjewjana konstrukcija swój cil trjechiła njeje, tak zo žona ze stróželemi woteńdźe a so njezrani.
Policija (17.04.23)
Wjele pjenjez zhubił
Budyšin. Pjećcyfrowu sumu pjenjez kaž tež debjenki je 83lětny muž z Budyšina sobotu njeznatym w Pólskej přewostajił. Woni běchu jemu při telefonje napowědali, zo jeho dźowka w jastwje sedźi a zo móhł wón za nju kawciju zapłaćić. Pólska taksa dowjeze muža do Wrócławja a zaso domoj do Budyšina. Tu policija hižo čakaše a taksijoweho šofera najprjedy zaja, pozdźišo na přikaz sudnistwa pak zaso pušći. Pad dale přepytuja.
Policija (14.04.23)
Pokradnjene awto namakali
Budyšin. Hižo 3. apryla běchu njeznaći w Załomskej sportowni tablet, awtowy kluč a před halu stejace awto pokradnyli. Předwčerawšim so wobsedźerjej tableta poradźi, swój nastroj w Budyšinje na Jordanowej lokalizować. W mjenowanym wobłuku wuhlada wón awto swojeho sobu-sportowca. Na nim bě mjeztym hinaše čisło přičinjene. Policija wšitke slědy zawěsći a wobsedźerjej jeho Suzuki wróći. Tablet pak namakali njejsu, dokelž lokalizowanje dokładne dosć njebě, kaž policija zdźěli.
