Krótkopowěsće (22.06.18)
Zarunaja přidatne wudawki
Drježdźany. Kóžda sakska komuna w serbskim sydlenskim rumje dóstanje za přidatne wudawki dwurěčnych napisow abo přełožkow dla wot 2019 kóžde lěto 5 000 eurow. Knježerstwo je srědki w nowym etaće zaplanowało, zdźěli předsydka serbskeje rady Sakskeje Marja Michałkowa, powołaca so na wosobinsku informaciju ministerskeho prezidenta Michaela Kretschmera (CDU).
Wuwzaćne rjadowanje ratarjam
Drježdźany. Hladajo na hižo dlěje trajacu suchotu dóstanu sakscy ratarjo dowolnosć, swoje jako ekologiske prioritne woznamjenjene ležownosće za picu abo jako direktnu pastwu za skót wužiwać. Wuwzaćne rjadowanje płaći wot 1. julija, zdźěli dźensa sakske statne ministerstwo za wobswět a ratarstwo w Drježdźanach. Chcedźa-li burja naprawu wužiwać, maja woni to do toho na wotpowědnych zarjadach přizjewić.
Dóstanu lětsa wjace pjenjez
Krótkopowěsće (21.06.18)
Dóstanu nowu kubłarku
Radwor. Witaj-skupina Radworskeje pěstowarnje „Marja Kubašec“ změje wot awgusta zaso serbsku maćernorěčnu kubłarku. To zdźěli wjesnjanosta Wincenc Baberška (CDU) Serbskim Nowinam, powołujo so na zdźělenku nawodnicy pěstowarnje Birgit Quindt. Kubłarka je wotpowědne zrěčenje podpisała. Nowowobsadźenje bě trěbne, po tym zo bě wjelelětny pěstowar w meji wupowědźił.
Z nowym předsydu
Wojerecy. Měšćanski zwjazk Wojerowskeje Lěwicy ma noweho předsydu. Kaž zwjazk na swojej internetnej stronje wozjewja, su jeho čłonojo minjeny kónc tydźenja Andréja Kocha do zastojnstwa wuzwolili. 30lětny Wojerowčan přewozmje předsydstwo wot Marcela Rittera, kiž bě je z priwatnych přičin złožił. Budźe pak dale w předsydstwje dźěłać.
Twarja naduwanske brónje
Krótkopowěsće (20.06.18)
Etatowa klawsura knježerstwa
Kamjenica. Sakske knježerstwo CDU a SPD wuradźuje w kónčnej klawsurje wo dwójnym etaće 2019/2020 dźensa a jutře w Kamjenicy. Wuchadźejo z dobreje dawkoweje prognozy wobkedźbowarjo trochuja, zo móhł dwójny etat prěni raz sumu 40 miliardow eurow docpěć, tón za lěće 2017/2018 wučinješe 37,5 miliardow. Docpěte wuslědki chcedźa pjatk předstajić.
Alojsowy běh wotprajeny
Budyšin/Radwor. Za 23. junij planowany 1. běh wo pokal zbóžneho Alojsa Andrickeho so njewotměje. Wo tym je wčera předsyda Towarstwa Cyrila a Metoda Jurij Špitank medije informował. Za přičinu podawa přemało přizjewjenjow. Wurisanje běchu składnostnje lětušich 75. posmjertnych narodnin zbóžnoprajeneho kapłana Alojsa Andrickeho na Radworskej nawsy planowali.
Dalše projekty planowane
Krótkopowěsće (19.06.18)
Ilegalna fabrika zawrjena
Bratislava. W Słowakskej su ilegalnu cigaretowu fabriku zawrěli, kotraž bě prawdźepodobnje wšu zapadnu Europu z falšowanymi cigaretami zastarała. Při raciji w srjedźosłowakskim měsće Revúca su po informaciji policije 10,5 milionow cigaretow a šěsć tonow tobaka sćazali. Dwě wosobje buštej zajatej. Jimaj hrozy hač do dwanaće lět jastwa.
Šansa za Wojerowski gymnazij
Drježdźany. Šěsć sakskich šulow wobdźěli so přichodne šulske lěto na nowym modelowym projekće „Twoja ideja? Twoja šula. Twój rozsud!“ wo demokratiji. Sakska załožba za młodźinu je z 21 zajimowanych kubłanišćow mjez druhim Wojerowski Léona Foucaultowy gymnazij wulosowała. Wo wobdźělenje prócowali běchu so gymnazije, wyše a spěchowanske šule z cyłeje Sakskeje.
Myto Lojzy Wieserej
Krótkopowěsće (18.06.18)
Fonds za krute pady připowědźił
Drježdźany/Zhorjelc. Na wopominanju wčera w Zhorjelcu k 65. róčnicy ludoweho zběžka 17. junija 1953 w NDR je sakski ministerski prezident Michael Kretschmer (CDU) k wjetšemu angažementej za demokratiju namołwjał. Kaž wón připowědźa, chce Sakska wopory diktatury SED přichodnje z fondsom za krute pady podpěrać.
Zarjaduja wěstotny centrum
Choćebuz. Město Choćebuz dóstanje nowy wěstotny centrum. Na to dojednaštaj so braniborski minister za nutřkowne naležnosće Karl-Heinz Schröter (SPD) a Choćebuski wyši měšćanosta Holger Kelch (CDU), informuje ministerstwo. W nim maja přichodnje policisća a sobudźěłaćerjo porjadniskeho zarjada skutkować. Nowy centrum wosrjedź města chcedźa hišće lětsa zarjadować.
Nowiny wuznamjenjene
Krótkopowěsće (15.06.18)
Nawodaj rehabilitowanaj
Drježdźany. Sakski statny minister za ratarstwo a wobswět Thomas Schmidt (CDU) je spočatk tydźenja bywšeju nawodow biosferoweho rezerwata Hornjołužiska hola a haty dr. Astrid Mrosko a Petera Heynu na rozmołwu witał. Woběmaj wón wobkrući, zo staj ze sudniskim wusudom dospołnje rehabilitowanaj. Wumjetujo Heynje a Mrosko ćežke přeńdźenja běchu jeju 2015 pušćili.
Maja nowu produkcisku halu
Budyšin. Kanadiski koncern Bombardier je dźensa na Budyskim stejnišću nowu produkcisku halu wotewrěł. Po informacijach předewzaća su za kompetencny centrum nutřkowneho wutwara ćahow a tramwajkow něhdźe wosom milionow eurow nałožili. Produkciske procesy budu tam přichodnje z digitalnej techniku podpěrane.
Za wuwiće wjesneho ruma
Krótkopowěsće (14.06.18)
Ryby tema w krajnym sejmje
Drježdźany. Pad wo zahinjenych pstruhach 8. junija w Njezdašecach stanje so nětko z temu w Sakskim krajnym sejmje. Zapósłanča Franziska Schubert (Zwjazk 90/Zeleni) je naprašowanje krajnemu knježerstwu zapodała. W prěnim rjedźe dźe jej wo to rozjasnić, kak je k tomu dóšło. Wotmołwy sakskeho knježerstwa wočakuje wona najpozdźišo 11. julija.
Žně kórkow w Błótach zahajene
Steinreich. Žně zawarjenskich kórkow su dźensa w Błótach oficialnje zahajili, zdźěla Błótowske towarstwo. Wysoke temperatury su dobry róst woblubowaneje zeleniny přisporjeli, informuje agrarne drustwo Delnje Błóta we wokrjesu Dubja-Błóta. Tak bu zapozdźeny start sadźenja rostlin niskich temperaturow w předměsacach dla nachwatany. Domchowane kórki předźěłuja hłownje w městnych konserwowarnjach.
Łódźny wobchad zakazany
Krótkopowěsće (13.06.18)
Nowe směrnicy
Drježdźany. Sakski kabinet je wčera předźěłane spěchowanske směrnicy wo polěpšenju stawa wodźiznow a wo škiće před wulkej wodu wobzamknył. Tak su mjez druhim spěchowanje za wuwiće a renaturěrowanje wodźiznow wot 75 na 90 procentow zběhnyli. Tež dotal přemałe projekty su wotnětka spěchujomne runje tak kaž nakup klumpow a wuchowanskich čołmow.
Dźěłaja na Borborinym kanalu
Zły Komorow/Halštrowska Hola. Borboriny kanal, zwisk mjez Lejnjanskim a Parcowskim jězorom, chcedźa hač do septembra za wobchad łódźow wukmanić. Za to natwarja do zajězda kanala z wobeju jězorow čakarnju za łódźe w napřećiwnym wobchadźe. Dale připrawja wotpowědne tafle za łódźny wobchad, kaž Łužiska a srjedźoněmska towaršnosć hórnistwoweho zarjadnistwa zdźěla.
Žonu z nožom morił
Krótkopowěsće (12.06.18)
Serbski napis bórze připrawja
Drježdźany. Twarjenje Sakskeho krajneho sejma změje bórze tež serbskorěčny napis. Kaž zarjadnistwo parlamenta wčera wozjewi, je prezident krajneho sejma dr. Matthias Rößler iniciatiwu wjacorych zapósłancow CDU sćěhował a wotpowědny nadawk dał. Zarjadnistwo jón ze społnomócnjenym architektom hišće wothłosuje. „Wjeselu so, zo budźe wuslědk za wšitkich wopytowarjow parlamenta bórze widźomny“, Matthias Rößler podšmórny.
Schwarz swój mandat złožił
Budyšin. Wokrjesny radźićel Martin Schwarz z frakcije Wobydlerske zjednoćenstwo za swobodu měnjenja a sobupostajowanje je swój mandat w Budyskim wokrjesnym sejmiku złožił. To pisa wón w lisće krajnemu radźe Michaelej Harigej (CDU). Kaž krajnoradny zarjad zdźěla, mjenowaše Schwarz jako přičinu swoje zasudźenje z 10. apryla kaž tež pobrachowacy čas powołanja dla.
Čěska je měrliwy kraj
Krótkopowěsće (11.06.18)
Kretschmer tež Delany wopyta
Konjecy. Sakski ministerski prezident Michael Kretschmer (CDU) wopyta pjatk Budyski wokrjes. Mjez druhim wočakuja jeho popołdnju tež w Konjecach. Tam chce so Kretschmer pola wowčerja Měrćina Justa wo plahowanju wowcow wobhonić a wjelči management kaž tež škitne naprawy narěčeć. Wječor je we Wojerecach dalše rozmołwne koło pod hesłom „Sakske rozmołwy“.
Naslědnistwo w firmje rjadować
Lipsk. Akciske dny sakskeho hospodarkeho ministerstwa su dźensa w Lipsku zahajili. Z nimi maja so firmy podpěrać, kotrež steja před změnu mějićela staroby dla. Institut za srjedźostawske slědźenje w Bonnje je w februaru wuslědk přepytowanja předstajił, po kotrymž je wot toho hač do lěta 2022 w Sakskej nimale 6 200 předewzaćow potrjechenych.
Partnerske styki pohłubšili
