Krótkopowěsće (25.10.16)

wutora, 25. oktobera 2016 spisane wot:

Nowy album Caroliny Eyckec

New York. „Fantasias for Theremin and String Quartet“ rěka nowy album Caroliny Eyckec, kotryž je minjeny tydźeń jako winylowa tačel pola ameriskeho labela Butterscotch Records wušoł. Na nim je słyšeć šěsć kruchow, kotraž je tereministka zhromadnje z American Contemporary Music Ensemble z New Yorka natočiła.

Dan ma čěskej stolicy pomhać

Praha. Wokolina awtoweje magistrale w centrumje čěskeje stolicy, kotraž Václavske naměsto chětro nječućiwje wot Narodneho muzeja dźěli, je dotal jenož šoferam awtow přiměrjena. Tole pak ma so změnić. Wo to prosy Praski magistrat sławneho danskeho urbanista Jana Gehla, specialista za zjawne přestrjenje a žiwjenje na nich. Wón ma nadawk, centrum Prahi přijomniši sčinić.

Tilich wopory wopominał

Krótkopowěsće (24.10.16)

póndźela, 24. oktobera 2016 spisane wot:

Woidke: Dźiw normality

Wrócław. Braniborski ministerski prezident Dietmar Woidke (SPD) ma němsko-pólske poćahi za dźiw normality. „Poměr mjez krajomaj je tak přećelski a dowěrliwy kaž nihdy do toho.“ Tole rjekny koordinator zwjazkoweho knježerstwa w narěči składnostnje 25. róčnicy němsko-pólskeho zrěčenja wo dobrym susodstwje dźensa we Wrócławju.

Měrowe myto přijała

Frankfurt n.M. Žurnalistka a publicistka Carolin Emcke je wčera w Frankfurće nad Mohanom Měrowe myto zwjazka němskich knižnych wikowarjow přijała. Wuznamjenjenje je 25 000 eurow hódne. Awtorku počesćichu za jeje přinošk k towaršnostnemu dialogej. Emcke bu hižo loni z Lessingowym mytom Sakskeje počesćena.

Wuwozny móst zaso dźěła

Wochozy. Po 13 tydźenje trajacym ponowjenju wuwozny móst F 60 wot minjeneho pjatka we Wochožanskej wuhlowej jamje zaso dźěła. Při ponowjenju hoberskeho nastroja su 550 tonow wocla za­twarili, zo bychu jón z wosebitej konstrukciju stabilizowali, kaž zamołwići energijoweho předewzaća LEAG zdźěleja. Ponowjenje bě trěbne, dokelž je wuwozny móst mjeztym starši hač 40 lět.

Krótkopowěsće (21.10.16)

pjatk, 21. oktobera 2016 spisane wot:

Agentura pyta dorost

Budyšin. Agentura za dźěło chce klětu po cyłej Sakskej 59 młodostnym we wobłuku posłužbow agentury wukubłanske městno zmóžnić. Tole zdźěli nětko regionalna direkcija Sakska zwjazkoweje agentury za dźěło. Z toho je 39 wukubłanskich městnow fachoweho přistajeneho, dwaceći młodostnym skića móžnosć dualneho studija.

Mortwej wjelkaj

Rěčicy. Minjene dny stej we Łužicy dwaj wjelkaj zahinyłoj. Wo tym informuje kontaktny běrow Wjelči region Łužica w Rěčicach. Kónc tydźenja bě pěšk w Halštrowskej gmejnje mortweho wjelka našoł. Přepytowanje wunjese, zo měješe wjelk w klamje chětro zahorjenu ranu. Tak drje bě zahłódnił abo zawutlił. Dalši, hišće młody wjelk bu srjedu pola Njedźichowa wot awta přejědźeny.

Hroža hładke dróhi

Lipsk. Šoferojo měli so kónc tydźenja tež w Sakskej na hładke dróhi nastajić, wšako su tež w nišich kónčinach zmjerzki móžne, Němska wjedrarnja w Lipsku zdźěla. Na horach móže so lochce sněžić. Sobotu a njedźelu njebudźe ćoplišo hač dźesać stopnjow. Wot póndźele pak nawróći so miliši powětr.

Terminy a časy postajili

Krótkopowěsće (20.10.16)

štwórtk, 20. oktobera 2016 spisane wot:

Šuli wuznamjenjenej

Drježdźany. Kulowska Krabatowa zakładna šula kaž tež Budyska Montessori-šula stej we wubědźowanju „hrać wučinja šulu“ myto dobyłoj. Wonej stej mjez dalšimi 34 wuznamjenjenymi za indiwidualny a kreatiwny koncept hrow. Sakske ministerstwo za kultus přewostaji kubłanišćam wobsahowje šěroke wuhotowanje z wšelakimi hrami.

Kitesurfowanje dale zakazane

Lejno. Sakska krajna direkcija je próstwu gmejny Halštrowska hola wotpokazała, při Lejnjanskim jězoru kitesurfowanje wuwzaćnje dowolić. Tam płaća rjadowanja Sakskeho łódźnistwa, zarjad argumentuje. Próstwa měrješe so na juho- wuchodny dźěl jězora. Zarjad wopodstatnja zakaz mjez druhim z móžnymi konfliktami při wužiwanju jězora.

Twarja nowu škodowku

Krótkopowěsće (19.10.16)

srjeda, 19. oktobera 2016 spisane wot:

„Reja na deponiji“

Wolfen. Na 5. filmowych dnjach we Wolfenje, kotrež so wot 19. do 23. oktobra wotměwaja, pokaza so mjez druhim film DEFA „Tanz auf der Kippe“ z lěta 1991 po noweli „Augenoperation“ („Wšitko, štož ja widźu“) Jurja Kocha. Je to tragiska stawizna młodźenca, kotryž chce w kóždym nastupanju sprawnje jednać a kiž pod towaršnostnymi strukturami a normami časa zwrěšći.

Fachowa konferenca

Oelsnitz/V. Přechody zhromadnje zrjadować je wulki zaměr pomjeznych regionow. Z tutej temu zaběraja so fachowcy na konferency dźensa we vogtlandskim Oelsnitzu. Mjez nimi stej tež nawodnica Budyskeho Rěčneho centruma WITAJ dr. Beata Brězanowa a wědomostna sobudźěłaćerka za rěčny marketing a wědomostne dźěło Jadwiga Kaulfürstowa.

Biskopja w Betlehemje

Krótkopowěsće (18.10.16)

wutora, 18. oktobera 2016 spisane wot:

Kalender Błótowskich wjerškow

Choćebuz. Błótowski turistiski zwjazk skedźbnja na kulturne wjerški lěta 2017. Cyłkownje 23 podawkow lěta su w nowym kalendrje zestajili, kiž je w nakładźe 30 000 eksemplarow wušoł. Brošurku poskićuja darmotnje w turistiskich informacijach. W njej pokazuja na rjemjeslniske wiki runje tak kaž na kulinariske tydźenje a Choćebuski filmowy festiwal.

Chcedźa kupjele dotwarić

Chrastava. Hoberski projekt nowotwarjenych kupjelow w sewjernočěskej Chrastavje ma snano tola hišće šansu. Před pjeć lětami započaty twar bě wot Europskeje unije nimale 4,5 milionow eurow podpěry dóstał. Financnych manipulacijow dla pak projekt zwrěšći. Nětko chcył nowy wobsedźer, firma Elektra Praha, kupjele dotwarić a dale wobhospodarjeć.

Saksojo njespokojom

Krótkopowěsće (17.10.16)

póndźela, 17. oktobera 2016 spisane wot:

Wěstotna akcija zahajena

Zhorjelc/Budyšin. Wot dźensnišeho kontroluje sakska policija pod hesłom „Blitz für Kids“ dodźerženje spěšnosće před šulemi. Přichodnjej tydźenjej njepokazaja jenož tym, kotřiž su přespěšnje jěli, žołtu kartu, ale dawaja wšitkim, kotřiž spěšnosć dodźerža, jako dźak zelenu kartu. Policija přewjedźe akciju zhromadnje ze šulerjemi tež w Budyskim wokrjesu.

Z łužiskim wobdźělenjom

Złyčin/Batumi. Lětuše swětowe mišterstwa w šachu wotměja so z łužiskim wobdźělenjom. W starobnej klasy U 10 nastupi Gino Rössel ze Złyčina. Dźesaćlětny ma hóstne dary za wuhotowarjow sobu, kotrež bě jemu Łazowski wjesnjanosta Thomas Leberecht (CDU) sobu dał, wottam rěkaše. Šachowe mišterstwa wotměwaja so hač do 31. oktobra w georgiskim Batumiju.

Wiwka ptak lěta

Krótkopowěsće (14.10.16)

pjatk, 14. oktobera 2016 spisane wot:

Sakske wobydlerske myto

Drježdźany. Rownjan Manfred Hermaš w kategoriji towaršnostnje-socialnje a Wojerowske wuměłstwowe towarstwo w kategoriji kulturnje-duchownje staj mjez 89 nominowanjemi za lětuše Sakske wobydlerske myto. Lawreatow počesća na swjatočnosći 17. oktobra w spódnej cyrkwi Drježdźanskeje cyrkwje našeje knjenje.

E-booki z LND w direktnej předani

Budyšin. Běše dotal jenož móžno, serbske digitalne knihi přez wulke internetowe předawanišća kupować, je nětko tež direktny puć k požadanemu medijej móžny. Wotnětka móže sej kupc w in­ternetowym wobchodźe www.domowi­na-verlag.de 18 e-bookow wšelakich žanrow w serbskej a němskej rěči 24 hodźin wob dźeń jako download wobstarać.

Grütters w Złym Komorowje

Krótkopowěsće (13.10.16)

štwórtk, 13. oktobera 2016 spisane wot:

Dźesać měsacow jastwa

Budyšin. Zarjadniske sudnistwo sprjewineho města je srjedu 31lětneho k dźesać měsacam jastwa zasudźiło. W Budyšinje bydlacy Awstričan bě loni w januaru policistomaj wjacore razy z woknom hitlerski postrow pokazał. Kaž sudnistwo zdźěla, postara so jeho zakitowar na jednanju wo njezrozumjenje, twjerdźo, zo njebě to hitlerski postrow.

Amplowy mužik 55

Berlin. NDRski amplowy mužik swjeći runje dźensa swoje 55. narodniny. 13. oktobra 1961 je Karl Peglau we wuchodnym dźělu Berlina zamołwitym prěnje naćiski mužikow předstajił. Wosom lět po tym rjadowachu prěnje z nich wobchad w NDRskej stolicy a bórze po cyłym kraju. Po změnje sta so NDRski amplowy mužik z kultom a bu zdźěla tež w zapadnych zwjazkowych krajach zasadźeny a samo wudospołnjeny z amplowej žónku.

Tamme Hanken njeboh

Krótkopowěsće (12.10.16)

srjeda, 12. oktobera 2016 spisane wot:

Towarstwo mytowane

Choćebuz. Towarstwo centrum za čłowjeske prawo Choćebuz bu wčera w Braniborskej radnicy z „Braniborskim mytom swobody“ wuznamjenjene. Zwjazkowy wonkowny minister Frank-Walter Steinmeier (SPD) česćowaše towarstwo a přepoda předsydce Sylvii Wähling myto, dotěrowane z 25 000 eurami.

Za lěpše kórki

Podstupim. Nowy wědomostny projekt ma kwalitu Błótowskich kórkow zawěsćić. K tomu su wědomostnicy Leibnitzoweho instituta a burja z regiona njedawno w braniborskej stolicy koncept předstajili, zdźěla rozhłós RBB. W přichodnych štyrjoch lětach chcedźa wuslědźić, kak móhli zničenjam přez škódnikow zadźěwać a twjerdše kórki plahować.

Znowa wjac studentow

Lipsk. Nawal studentow na Lipsčansku uniwersitu njewoteběra. Wjac hač 7 500 młodostnych tam lětsa w zymskim semestrje swój studij zahaji. Z tym leži ličba šěsty raz nad 7 000. Cyłkownje je so 44 700 ludźi na uniwersiće wo studijne městno požadało. Tuchwilu studuje tam 30 000 młodostnych w 157 studijnych směrach. 3 200 studentow pochadźa z wukraja.

Klětu nowy modus

nawěšk

nowostki LND