Berlin (dpa/SN). Zwjazkowa kanclerka Angela Merkel (CDU) je hladajo na koronapandemiju namołwjała, integraciju z wočow njezhubić. K zahajenju 12. integraciskeho wjerška rjekny Merkel dźensa w Berlinje: „Tak kedźbliwi, kaž dyrbimy być, zo bychmy strowotu swojich sobuwobydlerjow škitali, tak kedźbliwi dyrbimy tež na zhromadnosć dźiwać“, Merkel rjekny. To płaći wosebje za tych, kotřiž su hakle krótki čas w Němskej. Merkel je dźensa ze zastupnikami migraciskich organizacijow wo problemach ćěkancow wuradźowała.
Za atraktiwniše města
Berlin (dpa/SN). Mrěće wobchodow w nutřkownych městach Němskeje bě tema dźensnišeho wuradźowanja w zwjazkowym hospodarskim ministerstwje. Minister Peter Altmaier (CDU) bě na „wirtuelne blido“ ze zastupnikami wikowanja, kultury a komunow prosył. Po tym chcyše so wón k wuslědkam wuprajić. Hłowny zaměr je, měšćanske centrumy zaso atraktiwniše sčinić, zo bychu ludźo radšo tam a nic we wulkich kupnicach na kromje městow nakupowali.
Trump: Pandemija bórze nimo
Berlin (dpa/SN). Zwjazkowy nutřkowny minister Horst Seehofer ma poskitk dźěłodawarjow w tarifowej zwadźe zjawneje słužby za připóznaće dźěła přistajenych w za system relewantnych powołanjach. „Mytujemy ze swojim poskitkom to, štož rjekojo w krizy zdokonjenja“, rjekny politikar CSU nowinarjam. Při tym płaći zasada: Čim wjetše je poćežowanje, ćim wjetši je připłatk. Po informacijach nutřkowneho ministerstwa móža přistajeni w chorownjach a hladarnjach hač do 1 800 eurow wob lěto wjace wočakować.
Třeće koło jednanjow za 2,5 milionow přistajenych zjawneje słužby Zwjazka a komunow planuja zajutřišim, štwórtk a pjatk. Dźěłarnistwa maja dotalny poskitk dźěłodawarjow za njedosahacy a wukonjeja z warnowanskimi stawkami wotpowědny ćišć. Spočatk tydźenja běchu přistajeni w Bayerskej, Badensko-Württembergskej, Schleswigsko-Holsteinskej a Mecklenburgsko-Předpomorskej dźěło złožili. Nimo dźěławych medicinskeho sektora dźe wo hladarjow, kubłarjow, busowych šoferow a přistajenych w radnicach.
Podstupim/Drježdźany (dpa/SN). Nachwilnje zběhnjeny zakaz hospodowanja zbudźa w Braniborskej nadźiju w pućowanskej branši. „Nadźijamy so, zo dalšich hosći zdobudźemy a zo so turisća hišće na puć do krótkodowola podadźa“, rjekny prezident zwjazka hotelownikow a hosćencarjow Olaf Schöpe nowinarjam. Zakaza hospodowanja dla su hotelownicy połojcu wšitkich skazankow w nazymskich prózdninach přisadźili. „Rozsud je wolóženje a zdobom zawjazk, dalše naprawy zwoprawdźić, zo bychu so hosćo pola nas derje a wěsći čuli.“
Kak wodosłon cyły kirbs žerje, móža zajimcy pola Berlinskeje coologiskeje zahrody wobkedźbować. Składnostnje 25. narodnin wodosłona běchu zwěrjo a jeho sobuwobydlerjow z kirbsom překwapili a tole na facebooku dokumentowali. Ede bě so 17. oktobra 1995 w Praskim zwěrjencu narodźił. Ze swojimi mjeztym 25 lětami je wón „měrny a wurunany“, zwěrjenc kónc tydźenja pisaše.
Tysacy tonow kokošaceho hnoja su njeznaći w Japanskej ilegalnje zaryli. Kaž medije rozprawjeja, su na polu w sewjerowuchodnej prowincy Miyagi dźesać dźěrow z přeměrom dźesać metrow wotkryli. Po prěnich dopóznaćach je so tam w běhu dźesać lět něhdźe 2 000 tonow hnoja nahromadźiło. Tuchwilu so wobsedźerja bliskeje kokošaceje farmy prašeja. Hnój ma so po zakonju jako industrijne smjeće wobhladować a wotstronić.
Rom (B/SN). Bamža Franciskusa přiwótřacy so konflikt mjez Armenskej a Azerbajdźanom wulce starosći. Wón namołwja wšitkich wěriwych, za krizowu kónčinu w Kawkazu so modlić, a je konfliktnej stronje napominał, „dobru wolu pokazać. Njeje móžno, sej z brónjemi rozrisanje wunuzować.“ Mjez křesćanskimi armenskimi a muslimskimi azerbajdźanskimi wojakami dochadźa zas a zaso k ćežkim bitwam. Pozadk konflikta je region Hórski Karabach, kotryž je swoju samostatnosć wobzamknył.
Wućek z rezignacije
Mnichow (B/SN). Mnichowski farar a awtor Rainer Maria Schießler liči z tym, zo trend wustupow z cyrkwje dale traje. To pak je za njeho skerje přičina, rezignaciji wućeknyć, rjekny 59lětny dźenikej Münchener Abendzeitung. „Nětko je wažne na to skedźbnić, zo nochce cyrkej ničo druhe być hač domizna, kotraž je kóždemu wotewrjena. Mamy hladać na žiwjenje Jězusa a cyle jednorje z nim sobu hić. Tak mamy tež my ludźi přeprosyć, k nim hić a nječakać, doniž woni njepřińdu“, Schießler potwjerdźi.
Z dźesać wosadow jedna fara
Luxemburg (dpa/SN). Ratarscy ministrojo čłonskich statow Europskeje unije su dźensa w Luxemburgu wo reformje zhromadneje ratarskeje politiki za přichodne lěta wuradźowali. Dokelž Němska hišće hač do kónc lěta Radu EU jako zastupnistwo čłonskich statow EU nawjeduje, měješe ratarska ministerka Julia Klöckner (CDU) předsydstwo konferency. Hłowny zaměr je, zo so kraje na wotpowědne naprawy hoberskeho projekta dojednaja. Tuchwilu nałožuje EU 40 procentow swojeho etata za ratarstwo.
Předpisy dale přiwótřene
Rom (dpa/SN). Trěći króć w běhu dweju tydźenjow je Italska předpisy w boju přećiwo koronawirusej přiwótřiła. Raznje přiběracych ličbow nowych infekcijow dla knježerstwo gastronomiju dale wobmjezuje. Ministerski prezident Giuseppe Conte je wobydlerjow k „maksimalnej kedźbnosći“ namołwjał, zo njebychu so z koronawirusom natyknyli. W telewiziji rěčeše wón wčera wječor wo „kritiskim połoženju“. Po najnowšich předpisach smě w hosćencach jenož hišće najwjace šěsć ludźi za blidom sedźeć.
Wo integraciji wuradźowali
Berlin (dpa/SN). Přiwótřeneho połoženja koronapandemije dla móža sej ludźo ze symptomami nazymnjenja wot dźensnišeho zaso chorobny lisćik telefonisce wobstarać. Wuwzaćne rjadowanje płaći hač do kónc lěta. To je zhromadny wuběrk za strowotnistwo w Zwjazkowym sejmje wobzamknył. Pacienća ze snadnymi zjawami schorjenja dychanskeho puća njetrjebaja so hižo do lěkarskeje praksy podać, jenož zo bychu sej po chorobny lisćik doběželi. Tole ma pomhać, połnym čakarnjam a tak dalšim natyknjenjam zadźěwać. Wotpowědny chorobny lisćik płaći sydom dnjow. Lěkarjo dyrbja so pacientow telefonisce za jich strowotniskim stawom prašeć. Woni maja nimo toho prawo, telefonisce posrědkowany chorobny lisćik wo tydźeń podlěšić.