Berlin (dpa/SN). Hladajo na suche lěća minjenych lět a tuchwilu pobrachowacu wodu dla žada sej ministerka za wobswět Svenja Schulze nowe myslenje nastupajo rozdźělenje wody. Wužiwanje wody žada sej nuznje krutu hierarchiju a nowe prawidła, rjekny politikarka SPD nowinarjam. Najwažniše je zastaranje ludźi z wodu k piću, warjenju a myću. „To je čłowječe prawo.“ Potom pak je wěc hižo napjata, rjekny Schulze. Jako přikład mjenowaše wona prašenje, hač měła so najprjedy měšćanska kupjel zawrěć abo hač ludźom zakazaja, zahrodki krjepić. Schulze na to skedźbni, zo dyrbja tež w přichodźe zamołwići w komunach wo tym rozsudźić. Wona chcyła k tomu klětu narodnu wodowu strategiju předpołožić, zo by lokalnym institucijam jasne směrnicy a orientacije w tymle prašenju do ruki dała.

Suchota tež ratarjow starosća, dokelž nimaja z městnami hižo dosć picy za skót. Deficitow minjeneju lět dla drje su škody lětušeje suchoty dla hišće hórše hač 2018 a 2019, zwjazk ratarjow zdźěla. Lokalny dešć tole wjace njenaruna.

Dalše demonstracije w Běłoruskej – Babiš chcył „somoćanu rewoluciju“

Praha/Minsk/Berlin (dpa/SN). Europska unija dyrbjała po měnjenju čěskeho ministerskeho prezidenta Andreja Babiša ludźi w Běłoruskej pohnuć, so na změnu režima po přikładźe somoćaneje rewolucije lěta 1989 zwažić. Statowe zjednoćenstwo měło w tymle zmysle aktiwne być, pisaše Babiš wčera w interneće. „Štož je so 1968 w našim kraju stało, njesmě so w Běłoruskej stać“, pisaše čěski ministerski prezident hladajo na krawne pobiće Praskeho nalěća přez wójska Sowjetskeho zwjazka, Pólskeje, Madźarskeje a Bołharskeje. Tohodla chcył so wón nětko w tutej naležnosći zasadźować a druhe kraje pohnuć, jeho podpěrować.

Rakecy/Budyšin (SN). W Rakecach su pomnik za sowjetskich a pólskich wojakow tak wobnowili, zo je stary napis zaso widźeć: „1946 von sorbischen Studenten errichtet, 1980 erneuert“. Wo tym informuje Domowina w nowinskej zdźělence.

„Smy na iniciatiwu serbskeho spisowaćela Křesćana Krawca, župneho předsydstwa a Domowinskeje skupiny Rakecy 8. meje składnostnje 75. róčnicy kónca Druheje swětoweje wójny při pomniku wuswobodźerjow wopominali. Bjez nich by serbski lud zahinył, kotremuž běchu knježacy fašisća rěč, kulturu a organizacije zakazali. Tohodla je serbska studowaca młodźina sowjetskim a pólskim wojakam pomnik stajiła, wědźo, zo je wjele młodych muži z Pólskeje a Sowjetskeho zwjazka swoje žiwjenje tež za serbski lud woprowało“, praji Katja Liznarjec, regionalna rěčnica župy „Jan Arnošt Smoler“ Budyšin.

Kóčka z Tuneziskeje w připowěšaku nakładneho awta je do městačka Kahl nad Mohanom w Aschaffenburgskim wokrjesu dojěła. Mały „slepy pasažěr“ je drje w Tuneziskej do připowěšaka skočił a tak chcyjo-nochcyjo daloku jězbu na so wzał, samo přez Srjedźne morjo. Jězba skónči so w Delnjej Frankskej. Sobudźěłaćerjo běchu žałosćenje słyšeli. Přiwołana policija namaka lačnu a hłódnu kóčku, kotraž pak je jězbu hewak derje přetrała.

Porjedźenje mopeda je so w sewjerobayerskim Karlstadće z rozbuchnjenjom skónčiło. Ćišć detonacije wutorhny wěka kanalow a wutłóči wodu z toaletow. Při porjedźenju běštej dwaj litraj bencina do kanalizacije wuběžałoj, hdźež nasta strašna měšeńca bencina a powětra. Jako chcyše 25lětny moped startować, dóńdźe k rozbuchnjenju. Nichtó so njezrani.