Lěwica: Wjace pjenjez potrěbnym
Wučerjo žadaja sej směrnicy
Braniborska planuje šule a gymnazije poněčim zaso wotewrěć
Podstupim (dpa/SN). Wotstawk dodźeržeć, wšitko čiste dźeržeć, škit za hubu a nós wužiwać – hladajo na poněčimne wotewrjenje šulow žada sej Zwjazk pedagogow Braniborskeje jasne směrnicy politiki. Zamołwići komunow měli so wo to starać, „zo su hygieniske žadanja wot šulskeho busa přez rjadownisku rumnosć hač k sanitarnym připrawam w šulskim twarjenju wšědnje spjelnjene“, zdźěla zwjazk wučerjow. Za organizaciju wučby wočakuja wučerjo wot kubłanskeho ministerstwa bórzomne směrnicy za šulske zarjady a kubłanišća, zo by jednotne postupowanje zaručene było. Tak chcedźa wědźeć, kotre wosoby su wohrožene, kak a hdźe chcedźa škit za hubu a nós přepodać a z kotrej pomocu móža šule we wosebitej psychologiskej nuzy koronakrizy dla ličić.
To a tamne (22.04.20)
Twarcy elektriskich šijawow w Japanskej njemóža tuchwilu dočinić, dokelž sej dale a wjace ludźi w kraju škit za hubu a nós samych šije, kaž nowiny rozprawjeja. Zawody maja trójce telko skazankow kaž hewak w tym času na blidźe. Dokelž nimaja w Japanskej dosć škitow, sej mnozy nětko šijawy kupja. Mustry za šiće firmy internetnje poskićeja.
Hudźba z wótřerěčakow ma zwěrjatam w bayerskich lěsnych parkach pomhać wostudu přewinyć, kotruž pobrachowacych wopytowarjow dla tuchwilu pasu. Za to hladarjo zwěriny wšědnje hudźbny program zestajeja a jón wot ranja we wosmich do wječora w šesćich wusyłaja. Při tym su wiolinowe koncerty runje tak słyšeć kaž twjerdy rock skupiny AC/DC. Mjez spěwami wothrawaja wodźenja wopytowarskich skupin. Koronawirusa dla su wšitke bayerske parki dźiwjeje zwěriny hač do 3. meje zawrjene.
Oktoberski swjedźeń njebudźe
Mnichow (dpa/SN). Tradicionalny Mnichowski oktoberski swjedźeń koronapandemije dla lětsa njepřewjedu. To staj bayerski ministerski prezident Markus Söder (CSU) a Mnichowski wyši měšćanosta Dieter Reiter (SPD) dźensa zdźěliłoj. Wopytowarjow a rumnostnych wobstejnosćow dla woznamjenja tajke zarjadowanje přewulki strach. Na oktoberski swjedźeń wot 19. septembra hač do 4. oktobra wočakowachu wjace hač šěsć milionow ludźi.
Trump: Njewidźomny njepřećel
Washington (dpa/SN). Prezident USA Donald Trump chce koronakrizy dla kóždežkuli zapućowanje do USA na wěsty čas zakazać. Wotpowědny wukaz wón bórze podpisa, kaž we Washingtonje připowědźi. Jako přičinu mjenowaše Trump „nadpad njewidźomneho njepřećela“ a trěbnosć, „dźěłowe městna našich wulkotnych ameriskich staćanow škitać“. Nadrobnosće wón žane njezdźěli, čehoždla tež prawniski pozadk jasny njeje. Na kóncu drje rozsudźa sudnistwa.
Tola so hišće dojednałoj
Nowe wohenje
Černobyl/Kijew (dpa/SN). Ukraina je w boju přećiwo wohenjam w radioaktiwnje zanjerodźenej kónčinje wokoło zničeneje Černobylskeje atomoweje milinarnje ličbu wobornikow hišće raz masiwnje powjetšiła. Mjeztym je tam cyłkownje 1 400 pomocnikow zasadźenych, kaž ministerstwo za škit před katastrofami zdźěla. Stajnje zaso dźě k wohenjam dochadźa.
Mjezynarodna organizacija k zadźěwanju atomoweje wójny před tym warnuje, wohenje złahodnić. Při njepřihódnym wětřiku móhli radioaktiwne mróčele zapadnu Europu a tak tež Němsku docpěć. Strach hrozy předewšěm potom, hdyž woheń bjezposrědnje w zawrjenym pasmje wokoło milinarnje wudyri.
W dalšich krajach škit za hubu a nós
Erfurt (dpa/SN). Kaž w druhich zwjazkowych krajach chcedźa nětko tež w Durinskej ludźi zawjazać, we wobchadnych srědkach a wobchodach sej hubu a nós škitać. To zdźěli rěčnik knježerstwa Günter Kolodziej nowinarjam. W Sakskej tajka winowatosć hižo wot wčerawšeho płaći. Mecklenburgsko-Předpomorska chce so přichodnu póndźelu přizamknyć, Bayerska tohorunja. Debata wo tym knježi tuchwilu tež w krajnych knježerstwach Berlina, Badensko-Württembergskeje a Saksko-Anhaltskeje.
Zwjazk wikowarjow Sakskeje je překwapjeny na „krótkodobnje wukazane rjadowanje“ reagował. Kaž jeho krajny jednaćel René Glaser zdźěli, by sej do toho wuměnu z politiku přał. Mjez wukazom a jeho płaćiwosću njebě wjace chwile hač kónc tydźenja, wón kritizuje. Wuraznje so Glaser tomu wobara, wikowarjam zamołwitosć za škitnu winowatosć nabrěmjenić abo jich nuzować, kupcow bjez škita za hubu a nós z wobchoda pósłać. „Ministerstwo je to postajiło, tak ma to z našeho wida tež kontrolować.“
Gastronomija bjez perspektiwy
Hosćencarjo a hotelownicy žadaja sej skutkownišu pomoc w času korony
Drježdźany (SN). Wot připowědźenych dalšich naprawow nastupajo zběhnjenje wobmjezowanja wšědneho žiwjenja koronawirusa dla wostanje gastronomija wuzamknjena. Tak hrozy dale a wjace předewzaćam tuteje branše insolwenca – tež w Sakskej. Zwjazk hotelownikow a hosćencarjow Sakskeje (DEHOGA) trochuje, zo dyrbi bjez bórzomnych skutkownych wuchowanskich naprawow 30 procentow wšěch potrjechenych předewzaćow zawrěć. Zwjazk je z teje přičiny z ministerskim prezidentom Michaelom Kretschmerom (CDU) w rozmołwje, zo by so tajkemu zahubnemu scenarijej zadźěwało, zwjazk wčera zdźěli.
To a tamne (21.04.20)
Koronapandemije dla su lětušu, mjeztym 50. „pride“-paradu, w New Yorku wotprajili. Hoberska party, na kotrejž stajnje w juniju na prawa homoseksualnych skedźbnjeja, njehodźi so tónkróć přewjesć, kaž tamniši wyši měšćanosta Bill de Blasio zdźěli. Na tym tež „historiski wuznam“ 50. razu ničo njezměni, wón rjekny. Parada dopomina na namócnosće mjez homoseksualnymi demonstrantami a policiju 1969 w New Yorku.
„Lěpje hač ničo“ mjenuje sakski ministerski prezident Michael Kretschmer (CDU) namjet, hry zwjazkoweje koparskeje ligi w nuzy tež bjez přihladowarjow přewjesć. „Ludźo w Němskej so na koparske hry wjesela, ja tež“, rjekny wón nowinarjam. Bohužel njeje wjele sportowych družin tak móžnych. „Znajmjeńša kopańca nam wostanje.“ Wot 9. meje móhli so hry zaso wotměć.
Projekt z prěnimaj přinoškomaj w syći zahajeny
Berlin/Budyšin (SN/JaW). Za čas koronakrizy nastawa tu a tam tójšto noweho a kreatiwneho, předewšěm we wobłuku nowych medijow. Hakle njedawno móžachu tež zastupnicy organizacije Młodźina europskich narodnych skupin (MENS) digitalnu nowosć předstajić, kotraž ma tež serbski podźěl, kaž informuje Berlinski mjeńšinowy sekretariat.
Wozjewiła je MENS w interneće pod hesłom „MYnority MYsay!“ prěnjej dźělej podcasta. Nastała bě myslička wo tym, tajki podcast – tak mjenuja seriju přinoškow k słuchanju w interneće, kotrež móže sej wužiwar kóždy čas naposkać – na nazymskim seminarje młodźinskeho towarstwa 2018 we Wienje, rěka w zdźělence. Naposkać móža sej jej wšitcy na spotify pod: www.open.spotify.com/show/3C5xAhTBVP6wbb9KPQxiEz abo na Anchor.fm pod: www.anchor.fm/youth-of-european-nationalities. „Naš zaměr je, sej mysle a nowe ideje wuměnjeć kaž tež wuslědźić, što młodostnych narodnych mjeńšin inspiruje a zdobom tež nowe perspektiwy zeznawać“, praja młodostni MENS, kotremuž přisłuša tež Serbske młodźinske towarstwo Pawk, sami wo swojim projekće.
Bamž: Chudym krajam pomhać
Vatikan (B/SN). W Pětrowej cyrkwi w Romje je bamž Franciskus tradicionalne žohnowanje a generalnu absoluciju wšěm wěriwym na swěće wudźělił. W krótkim prědowanju wón zwurazni, zo spomina w tutym ćežkim času na chorych, zemrětych a jich přiwuznych. Koronapandemije dla žadaše sej wón chudym statam dołh spušćić. Bamž poprawom kóžde lěto jenož k hodam a k jutram wěriwych žohnuje, lětsa je wón přidatnje 27. měrca stupaceje mrětwy dla tute wosebite žohnowanje wudźělił. Přez livestream Vatikana je jutrońčku 31 000 přihladowarjow tomu sćěhowało.
Pomoc italskim chorownjam
Drježdźany (B/SN). Sakska krajna cyrkej podpěruje w boju přećiwo koronawirusej chorownje w Italskej z 15 000 eurami a namołwja k dalšim daram. Pjenjezy z fondsa za hnydomnu pomoc krajneje cyrkwje su předwidźane za škitnu drastu a za dychanske aparaty za chorownje w Bergamu, Genuwje a Neapelu. Z jałmožnu maja tež nastać dodatne intensiwno-medicinske městna za terapiju. Z tutej akciju reaguje krajna cyrkej na namołwu k jałmožnje lutherskeje cyrkwje w Italskej.
Zapokazanje biskopa Bilza
