Bórze zaso piwo z Choćebuza
Choćebuz (SN). W delnjołužiskej metropoli změja snano bórze zaso swoje piwo. Tónle plan chce zwoprawdźić z Porynskeje pochadźacy 44lětny Olaf Wirths. Hižo dwě lěće bydli wón w Choćebuzu a pyta nětko wotpowědne twarjenje, zo móhł swoje plany zwoprawdźić. Wirths chce nimo mikropiwarnje a piwoweje bary tež tak mjenowany craftbeer a online předań na nohi stajić. „Choćebuz jako město piwa z tradiciju ma so na korjenje jeho warjenja dopomnić. Swójska piwowa marka ma nastać a so wuspěšnje a dołhodobnje w regionje zaměstnić“, zjima přichodny piwarc swoje wotmysły.
Šok za łužiske komuny
Drježdźany (B/SN). Dujerjo z wosadow cyłeje Němskeje zetkaja so wot 3. do 5. junija 2016 na Druhi němski ewangelski dźeń pozawnistow w Drježdźanach, hdźež liča z 25 000 wobdźělnikami z kraja a wukraja.
Předwidźane su wjacore koncerty pod hołym njebjom a w cyrkwjach. Dale stejitej na programje hudźbna stafeta po nutřkownym měsće a wulka wječorna serenada na brjohu Łobja. Zakónčić chcedźa dujerjo swój zjězd z kemšemi w koparskim stadionje z fararku Margot Käßmann jako prědarku.
K islamej njepřestupili
Ferguson (dpa/SN). Po třěleńcy při wopominanju róčnicy namócneje smjerće Michaela Browna su zarjadnistwa w ameriskim Fergusonje nuzowy staw wuwołali. Zamołwity St. Louis County zdźěli, zo hižo žane dalše namócne akty w swojim regionje njećerpi. Wčera wječor knježeše w měsće napjata ćišina. Krajnu dróhu demonstranća nachwilnje blokowachu, rozprawja sćelak CNN.
Njedźelu bě po spočatnje měrnych protestach dóšło k třěleńcy mjez policiju a 18lětnym, kiž bě započał na policistow trěleć. Wón bu při třěleńcy žiwjenjastrašnje zranjeny a leži w chorowni. Při demonstraciji před sudniskim twarjenjom wčera wječor buchu wjacori demonstranća zajeći, mjez nimi znaći wojowarjo za wobydlerske prawa.
Zagreb (dpa/SN). Kraje juhowuchodneje Europy maja hladajo na rosćace ličby ćěkancow dźeń a wjace problemow. W Serbiskej planuje Europska unija zarjadować wulke srjedźišćo, kotrež měło 400 000 ćěkancow přiwzać. Na juhu Serbiskeje eksistuje blisko města Preševo narodne lěhwo za přiwzaće migrantow, přewažnje ze Syriskeje a Afghanistana.
Móžne stejnišćo potwjerdźił je předsyda parlamentariskeho wuběrka za zakitowanje a wěstotu Serbiskeje Momir Stojanović. Wone móhło wosebje ćežko wot ćěkancow potrjechene kraje, kaž Grjeksku, wolóžić. Tam je połoženje hižo nětko wjace hač napjate. Na grjekske kupy su dalše sta ćěkancow dóšli. W Serbiskej je tuchwilu 70 000 ćěkancow do směra na zapadnu Europu po puću.
Traktorist w porynskim Nettetalu je wulke mnóstwo nakładowaneje morcheje zhubił, po tym zo bě přerazantnje po puću. Na kromje wsy zhubi wón móc nad wodźidłom, připowěšak so powróći a morchejowy přestrjenc pokrywaše cyłu dróhu. Morcheje su njezbožo derje přetrali, jeničce traktorist trjebaše po přespěšnej jězbje chětro wulku sćerpnosć, zo by je wšitke zaso zezběrał.
Nuzowa situacija je bjezdźěłneho w Kölnje pohnuła, sej drje najmjeńši domčk Němskeje natwarić. Dwaj měsacaj bydli wón mjeztym w 1,47 kwadratnych metrow wulkim bydlenskim mobilu, 210 centimetrow dołhim, 70 centimetrow šěrokim a 122 centimetrow wysokim. Bjezdźěłny nochcyše wot zarjada płaćene bydlenje, nochcyše pak tež pod mostom bydlić. Jeho mobil steji na parkowanišću firmy blisko Kölnskeho dwórnišća.
Nowy labor za studentow
Budyšin (dpa/SN). Hišće lětsa ma nastać moderne twarjenje za labor Budyskeje powołanskeje akademije. To zdźěli direktorka kubłanišća prof. Barbara Wuttke. Twarić chcedźa jón na płoninje něhdyšeje mensy. Z nowotwarom maja so wuměnjenja za slědźenje studentow polěpšić, wosebje we wobłuku kumštnych maćiznow, lijernje a elektrotechniki. Po předležacych planach ma labor w oktobrje 2017 za wužiwanje hotowy być. Tuchwilnje přewjeduja slědźenske dźěła we wuskich rumnosćach w pincy powołanskeje akademije.
„Módry dźiw“ ponowja
Habrachćicy-Neugersdorf (dpa/SN). Tak mjenowany „módry dźiw“, móst w Habrachćicach-Neugersdorf budźe ponowjeny. Škody a njedostatki hakle w lěće 1996 twarjeneho mosta maja so wotstronić. Swobodny stat Sakska přewostaji za to 540 000 eurow. Za sporjedźenje trěbnych budźe 760 000 eurow. Železnu konstrukciju mosta móža nětko zasadnje wobnowić. Twarske dźěła na „módrym dźiwje“, kotryž přeprěča železniski zwisk do Žitawy a Sprjewju, klětu zahaja. Jězdnju a chódnik runje tak ponowja kaž njerunosće před a za mostom.
Nowy wobsedźer rězaka