Drježdźany/Rań (SN/MiP). Jako „dramatiski“ wopisuje sakski minister za energiju, škit klimy, wobswět a ratarstwo Wolfram Günther (Zeleni) wuskutk kruteho zmjerzka zańdźeneho tydźenja na lětuše žně plahowarjow sadu a winicarjow. Někotři z nich wočakuja kompletny wupad žnjow, piše ministerstwo kónc tydźenja w nowinskej zdźělence. Günther wuzběhuje, zo stej plahowanje sadu a wina za Saksku strategisce wažnej wobłukaj hladajo na cil, regionalne hospodarstwo wutwarić. „Tohodla stejimy swojim plahowarjam sadu a winicarjam kruće poboku“, wón podšmórnje. Tuchwilu ministerstwo konkretne škody kaž tež móžnosće skutkowneje pomocy pruwuje – wot wupłaćenja pjenjez ze stron zawěsćernjow hač k přiražkam we wobłuku spěchowanskeho prawa. „Móžno, zo dyrbimy so tež wo pomoc ze stron Zwjazka starać“, praji Günther.
Horca debata do europskich wólbow
Maastricht (SN/MG). Onlinowa platforma Politico bě wčera, póndźelu, štwórty raz na podijowu debatu do wólbow do europskeho parlamenta přeprosyła. Přichwatali běchu wšitcy kandidaća za poziciju prezidenta europskeje komisije. Dohromady wosom politikarkow a politikarjow bě přeprošenje sćěhowało a so na wulkim jewišću w měšćanskim dźiwadle zestupało. Poprawom wšak je dźewjeć wulkich stronow w europskim parlamenće, jedna pak nima hišće načolneho kandidata.
Jenička serbska profesorka sorabistiki, dr. phil. habil. Lucija Hajnec swjeći dźensa, 30. jutrownika, 95. narodniny. Přeju jubilarce po tutym puću Daj Bóh zbožo!
SJ Chrósćicy – SJ Drježdźany Strěžin 0:3 (0:3)Zestawa SJC: Králíček – Graf, F. Cyž, Kreuz, Hawš, L. Zahrodnik (46. Handrik), M. Zahrodnik (46. Rätze), G. Zahrodnik, Matješk (75. Mark), Matik, Młynk (46. Wencel)
Składnostnje Mjezynarodneho dnja reje a we wobłuku akcije „Happy monday Bautzen – Wjesoła póndźela Budyšin“ zarejowa wčera něhdźe 250 zajimcow na naměsće před Němsko-Serbskim ludowym dźiwadłom. Takrjec z animaterami běchu dźěći Budyskeje rejowanskeje šule Mühlmann, Zhorjelski cyłk BailaThea, syriska muska rejowanska skupina Nissaa, Drježdźanscy rejowarjo Gugelhupf a holcy ukrainskeho towarstwa Nowi susodźa. Serbski folklorny ansambl Wudwor předstaji zhromadnje z tójšto hosćemi mjez druhim „Šewcowu reju“. Moderatoraj Madleńka Šołćic a Tim Heilmann z NSLDź wuzběhnyštaj, zo „njesteji za ‚Wjesołej póndźelu‘ jednotliwa strona, ale wjeloraka syć iniciatorow“ a zo „njeje přećiwo něčemu, ale za wotewrjenu a pisanu měšćansku towaršnosć“. Foto: SN/Bojan Benić
Wjele ludźi je njedźelu w klóšterskej zahrodźe zahajenje lětušeje 30. sezony dožiwiło. Tam móžachu po přirodowych wikach dundać abo program na jewišću sćěhować, kiž wuhotowa mjez druhim skupina Wólbernosće. Abatisa Gabriela Hesse, bywši statny sekretar Hermann Kroll-Schlüter a dalši sadźichu štom lěta. Lětsa je to mučnica (Echte Mehlbeere). Foto: Feliks Haza
Grodk (JoS/SN). Na zjawny wobydlerski forum „Jasna Sprjewja“ bě akciski zwjazk tele dny w Grodku přeprosył. Něhdźe 30 zajimowanych wobydlerjow bě přeprošenju sćěhowało. Na spočatku zarjadowanja wopytachu přitomni neuralgiske dypki w nutřkownym měsće, hdźež so bruna Sprjewja wosebje wotbłyšćuje. Tam wopytachu dom čołmikoweho towarstwa Jednota SG. Wobdźělnicy foruma njerjany napohlad wuhladachu. „Čołmy so přebarbjeja. Tohorunja hižo pjeć lět zwěsćamy, zo dale a wjace rostlinow při přibrjohu rosće, štož njeje za naš motorski čołm optimalne. Čołm nas za čas treninga přewodźa a ma wuchowansku funkciju“, čłonojo towarstwa rozjasnichu. Jasne je, zo wobsteji zwisk mjez železowym hydroksydom a njerodźu. Potrjechene je tež spušćadło a slalomowa čara, kotruž za trening abo za narodne a mjezynarodne wubědźowanja wužiwaja.
