Policija (24.11.16)

štwórtk, 24. nowembera 2016 spisane wot:

Pjenjezy kradnył

Budyšin. Njeznaty muž je rentnarjomaj zawčerawšim w Budyšinje 40 resp. 60 eurow pokradnył. Wón bě jeju prosył, jemu dwaj euraj zaměnić. Žona w swojej móšni drobne pjenjezy njeměješe, tak zo jeje mandźelski ze swojeje wupomha. Pozdźišo pytnyštaj, zo jimaj pjenjezy faluja.

Policija (23.11.16)

srjeda, 23. nowembera 2016 spisane wot:

W zahrodowych domčkach kradnyli

Budyšin. Do 15 zahrodowych domčkow při Budyskej Müntzerowej su so njeznaći w nocy na minjenu póndźelu zadobyli. Pokradnychu z nich wšelake elektriske nastroje, alkoholiske napoje kaž tež wozyčk. Nimo toho skóncowachu z motorskej piłu třěchu bungalowa a rozbichu studnjowu rynku. Hódnota pokradnjenych wěcow wučinja 500 eurow, wěcna škoda pak wjace hač 4 000 eurow.

Policija (22.11.16)

wutora, 22. nowembera 2016 spisane wot:

Wodźerce awta žiwjenje wuchowali

Tyhelk. Prěni pomocnicy su wčera rano znjezboženej žonje po wšěm zdaću žiwjenje wuchowali. Wobchadne njezbožo sta so na wokrjesnej dróze mjez Tyhelkom a Bórkom blisko Wojerec. 32lětna wodźerka VWja bě tam z dotal njeznateje přičiny w lěwej křiwicy na prawy bok jězdnje zajěła a z awtom zwróćiła. Při tym započa so jězdźidło palić. Prěnim pomocnikam so poradźi, žonu z awta wućahnyć a płomjenja podusyć. Wu­chowanska słužba dowjeze snadnje zranjenu do chorownje. Nastata wěcna škoda­ na VWju wučinja něhdźe 8 000 eurow.­

Policija (21.11.16)

póndźela, 21. nowembera 2016 spisane wot:

Rubježnika z drogami lepili

Běła Woda. W kupnicy na Budyskej dróze chcyše sobotu popołdnju młody muž twory sobu wzać, bjez toho zo bě je zapłaćił. Předawarka spyta muža zadźeržeć, wón pak ju nabok storči a ćekny z kolesom. Žona so snadnje zrani. Muža wuslědźi policija pozdźišo w jeho bydlenju, hdźež namakachu drogi.

Policija (18.11.16)

pjatk, 18. nowembera 2016 spisane wot:

Pod wliwom drogow jěła

Budyšin. Wobsadka policajskeho awta je zawčerawšim wječor na Budyskej Beethovenowej wosobowe awto typa VW a jeho wodźerku kontrolowała. Drogowy test wunjese, zo bě 28lětna po wšěm zdaću canabis k sebi brała. Na to přikazachu kontrolu kreje młodeje žony. Wobkrući-li so podhlad, dyrbi wona znajmjeńša 500 eurow pokuty płaćić, nimo toho měsac nóžkować a dóstanje dwaj dypkaj w Flensburgu. W najhóršim padźe žonje dopokazaja, zo wona dołhodobnje wodźenju awta kmana njeje.

Policija (17.11.16)

štwórtk, 17. nowembera 2016 spisane wot:

Pěšk so ćežko zranił

Budyšin. Ćežke wobchadne njezbožo je so wčera wječor w Budyskej Strowotnej studni blisko Röhrscheidtoweje kupjele stało. Tam chcyše 35lětny muž něhdźe w 17 hodź. dróhu přeprěčić, jako wosobowe awto typa Audi přijědźe. Jeho 25lětny wodźer njemóžeše zražce hižo zadźěwać a do muža zajědźe. 35lětny so při tym ćežko zrani. Jeho dyrbjachu z helikopterom do Drježdźanskeje chorownje transportować. Na wosobowym awće nasta něhdźe 2 500 eurow škody. Policija zawěsći na městnje wšelake slědy. Při­wšěm pytaja swědkow, kotřiž su wobchadne njezbožo snano wobkedźbowali. Tući njech so pod telefonowym čisłom 03591/ 36 70 přizjewja.

Policija (15.11.16)

wutora, 15. nowembera 2016 spisane wot:

Wopity z awtom jěł

Malešecy. Wčera w nocy je so wodźer Opela w Malešecach na Hućinskej dróze přećisnył. Po zdaću je 25lětny kontrolu nad jězdźidłom zhubił. Na kóncu so wukopa, zo měješe młody šofer 1,4 promile alkohola w kreji.

Policija (14.11.16)

póndźela, 14. nowembera 2016 spisane wot:

16lětneho z praskotakami lepili

Mužakow. Kónc tydźenja je policija w Mužakowje 16lětneho lepiła, kiž měješe 400 njedowolenych pólskich praskotakow w nachribjetniku. Wón měješe tež butterflyjowy nóž a zabijak při sebi, kotrajž tohorunja dowolenej njejstej. Na staršeju hólca čaka nětko wysoka po­kuta.

Naprawo z dróhi zajěł

Kamjenc. K ćežkemu njezbožu dóńdźe wčera rano na S 94 blisko Njebjelčic. Z dotal njewujasnjeneje přičiny je wodźer BMWja na prawo z dróhi zjěł a wosta z awtom w hajku pod mostom ležo. Dźakowano kedźbliwej šoferce su jeho ćežko zranjeneho namakali.

19lětny z drogami po puću był

Budyšin. W Budyšinje su zastojnicy sobotu wječor 19lětneho šofera lepili, kiž steješe pod wliwom drogow. W awće měješe dalše narkotikumy.

Policija (11.11.16)

pjatk, 11. nowembera 2016 spisane wot:

Pytaja swědkow

Čorny Chołmc. Hižo minjenu sobotu krótko do 17 hodź. bu předawarka w Čornochołmčanskej kupnicy Penny wot njeznateho muža wohrožena. Wona bě jeho prosyła, swoje twory na transportny pas před kasu połožić. Muž na to agresiwnje reagowaše, wućahny na pistolu podobny nastroj a měrješe jón na kasěrarku. Skónčnje so wón z kolesom zminy. Swědkow policija prosy, so pod telefonowym čisłom 03571/ 46 50 přizjewić.

Policija (10.11.16)

štwórtk, 10. nowembera 2016 spisane wot:

Tójšto pjenjez zhubiła

Wjelećin. 88lětnej žonje we Wjelećinje su njeznaći štyricyfrowu sumu pjenjez pokradnyli. Kaž wona zawčerawšim policiji zdźěli, dóstachu so paduši pod wumyslenej přičinu do bydlenja rentnarki a su wottam blachowu tyzu z něšto stami eurow, lutowanskimaj knižkomaj a pjenježnej kartu sobu wzali. Jako žona pozdźišo swoje konto přepruwowa, dyrbješe zwěsćić, zo bě něchtó z njeho wjacore razy pjenjezy wotzběhnył.

nawěšk

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019

nowostki LND