Policija (01.08.16)

póndźela, 01. awgusta 2016 spisane wot:

Wo pizzu njerodźili

Wojerecy. Pizzeria bě w nocy na njedźelu zaměr njeznatych zadobywarjow. Po tym zo běchu so namócnje do wobchoda zadobyli, spytachu cigaretowy awtomat wočinić, štož pak so jim njeporadźi. Z registrowanskeje kasy pak rubichu třicyfrowu sumu pjenjez a zawostajichu cyłkownu wěcnu škodu 3 00 eurow. Kriminalna policija so z padom nětko zaběra.

Zawinowar njezboža ćeknył

Połčnica. Na lěwej jězdni awtodróhi A4 do směra na Drježdźany jěducy šofer Škodowki dyrbješe so njejapcy před nim na samsnu čaru měnjacemu njeznatemu awtu wuwinyć. Při tym zhubi kontrolu nad swojim jězdźidłom, kotrež poča so wjerćeć, zjědźe z awtodróhi a so na bliskim polu zwróći. 42lětna sobujěduca so ćežko zrani a ju dowjezechu do chorownje. Šofera a sobu jěducej dźěsći su ke kontroli tohorunja do chorownje dowjezli. Awto njeda so wjac wužiwać. Nastata škoda wučinja 6 000 eurow. Zawinowar njezboža so wotsali, policija z pomocu swědkow za nim slědźi.

Z Mazdu kontra sornikej

Policija (29.07.16)

pjatk, 29. julija 2016 spisane wot:

Dobry popad

Zhorjelc. Šwarny popad mějachu zastojnicy inspekcije zwjazkoweje policije za­wčerawšim, srjedu. Na awtodróze A 4 pola­ Zhorjelca zadźeržachu BMW 7 z Döbelnskim čisłom. Při naslědnej kontroli so wukopa, zo njebě wulke wosobne awto ani přizjewjene ani zawěsćene. Nimo toho měješe šofer falšowanu jězbnu dowolnosć při sebi, dokelž běchu jemu jeho hač do lěta 2018 sćazali. Jězba za njeho bě nablaku nimo. Policija sćaza awto a awtowej čisle. Nětko přepytuje přećiwo mužej hnydom wjacorych přeńdźenjow dla.

Koleso kontra awto

Budyšin. Njejapcy přetorhnjena bu dowolowa jězba srjedu dopołdnja njeda­loko Budyšina. Z třěchi Škodowki bě so koleso z dźeržaka sunyło a na jězdnju padnyło. 34lětna wodźerka naslědneho VWja njezamó sčasom zaborzdźić a prasny do kolesa. Na jeje awće nasta škoda 1 500 eurow. 45lětna šoferka Škodowki po zwěsćenju formalitow skóncowane koleso zaso na třěchu jězdźidła staji a jědźeše dale do dowola. Policija skedźbnja w tym zwisku na to, kolesa na awtach wěsće při­činić.

Policija (28.07.16)

štwórtk, 28. julija 2016 spisane wot:

Pokradnjenej awće napadnyłoj

Horni Wujězd. Wčera rano su policisća slědźenskeje skupiny (GFG) na awtodróze A 4 dwě pokradnjenej wosobowej awće zawěsćili a jeju šoferow zajeli. Zastojnikam běštej jězdźidle marki Honda Jazz z Geraskim čisłom napadnyłoj. Jedne awto zadźeržachu zastojnicy pola Wujězda, tamne pola wotbóčki Budyšinje-zapad. Při kontroli woni spóznachu, zo běchu zamki awtow manipulowane. Kaž so wukopa, buštej awće jenož hodźiny do toho w Gerje pokradnjenej. Wobsedźerjej njeběštaj to ani hišće pytnyłoj. 22 a 23 lět stareju skućićelow policija zaja. Wosebita komisija pad nětko přepytuje.

Policija (27.07.16)

srjeda, 27. julija 2016 spisane wot:

Muž so při dźěle wopalił

Wětrow. We Wětrowje je so dźěłaćer wčera dopołdnja při wukonjenju asfaltowych dźěłow zranił. Walca, kotruž 62lětny wodźeše, so na nahłym městnje po­wróći, na čož muž do horceho bitumena padny. Wožahanja dla jeho do chorownje dowjezechu. Lěkar bě z helikopterom k městnu njezboža přilećał.

Kremserowy wóz pomórali

Kulowc. Dotal njeznaći su po zdaću wčera w nocy kremserowy wóz a murju ležownosće w Kulowcu pomórali. Při tym wužiwachu grafitijowu prsykawu. Wěcna škoda wučinja něhdźe 500 eurow. Kriminalna policija za skućićelemi slědźi. Pomóranje pak skerje wobsedźer kremsera a domskeho wotstroni.

Policija (26.07.16)

wutora, 26. julija 2016 spisane wot:

Wulka wěcna škoda wohenja dla

Kamjenc. W Kamjenskej Halštrowskej niwje je so dźensa w nocy dwójny carport palił. Hižo někotre mjeńšiny po wudyrjenju wohenja běchu wobornicy na městnje, awtowe wotstajenišćo a wosom lět stary Mercedes pak steještej hižo w płomjenjach a so cyle zničištej. Škoda wučinja wjacore dźesaćitysacy eurow.

Wotpadkowe awto so zwróćiło

Wojerecy. Na zwjazkowej dróze B 96 mjez Njedźichowom a Wojereceami je wčera připołdnju wodźer wotpadkoweho nakładneho awta z dotal njeznateje přičiny kontrolu nad wodźidłom zhubił. 40 tonow ćežke wozydło zajězdźe do přirowa a zwróći. Na zbožo so šofer jenož lochko zrani. Dróhu pak dyrbješe policija połojčnje zawrěć, dokelž bě z awta močowina wuběžała.

Policija (25.07.16)

póndźela, 25. julija 2016 spisane wot:

Młodostny šofera slepił

Budyšin. W Budyšinje je młodostny sobotu wječor mjez křižowanišćom a Lawskimi hrjebjemi šofera z laserowym pointerom slepił. 15lětny dyrbi so nětko wohroženja wobchada dla zamołwić. Pointer je policija nablaku sćazała.

Warnuja před dźiwinu

Žuricy. Minjeny pjatk je na dróze mjez Žuricami a Porchowom dźiwje swinjo do mopeda běžało, na čož jeho wodźer pa­dny a so ćežko zrani.

Policija (22.07.16)

pjatk, 22. julija 2016 spisane wot:

Z awtom so wjacekróć přećisnyła

Dobrošecy. Na statnej dróze S 109 mjez Budyšinom a Dobrošecami je młoda šoferka Rovera wčera popołdnju kontrolu nad wodźidłom zhubiła. W dołhej prawej křiwicy zjědźe wona z awtom z dróhi wjacore metry hłuboko a so wjacekróć přećisny. Ćežko zranjenu dyrbjachu žonu do chorownje dowjezć.

Njeskutkaj wujasnjenej

Zhorjelc. Kaž Zhorjelska policajska direkcija wčera zdźěli, je komisariat za cwólbowu kriminalitu po wob­šěrnych slědźenjach dwě zado­bywani do wuchodosakskeju hrajneju salonow­ wujasnił. Lětsa 14. februara w Budyšinje a 9. měrca w Lubiju­ běštaj so rumunskaj staćanaj w starobje 25 a 28 lět do tajkeju salonow zadobyłoj a tam dohromady 20 000 eurow pokradnyłoj.

Policija (21.07.16)

štwórtk, 21. julija 2016 spisane wot:

Motorski do štoma zrazył

Šćeńca. Dźensa něhdźe w 10 hodź. je 25lětny ze swojim motorskim na wokrjesnej dróze mjez Šćeńcu a Stróžu po puću z dotal njeznateje přičiny z jězdnje zajěł. Na to zrazy do štoma a wobchad­neho znamjenja. Ćežko zranjeneho dowjezechu z helikopterom do Budyskeje chorownje.

Pytany wuměnkar zaso doma

Chelno. Wutoru wječor je policija na Budyskim Augusta Bebelowym naměsće dementneho muža nadešła. 87lětny bě bydlenje w Chelnje wopušćił. Po zdaću je na to z busom do Budyšina jěł.

Policija (20.07.16)

srjeda, 20. julija 2016 spisane wot:

Derje wobkedźbowali a jednali

We Wojerecach je policija wčera rano 23lětneho paducha lepiła. Tón bě so z komplicu do pincow dweju domow na Hasy­ Brigitty Reimann zadobył. Wobydlerjo paduchow wobkedźbowachu a informowachu zastojnikow. Mužej ćeknyštaj, staj pak minjeny kónc tydźenja pokradnjene koleso a nachribjetnik ze zadobywanskim gratom stejo wostajiłoj. Z wysokodomu na tamnej stronje dróhi je wobydler na to ćěkaceju wobkedźbował a zdźěli policiji ćěkanski puć paduchow. Jednoho z njeju, 23lětneho, kotryž chcyše so ze zastojnikami bić, woni zajachu. Z popjerjowym sprayjom paducha přemóchu. Nětko slědźa za komplicu. Policija so kedźbliwym wobydlerjam za pomoc dźakuje.

Wažna informacija policije

Policija (19.07.16)

wutora, 19. julija 2016 spisane wot:

Tragika na čarje

Mjez Šěrachowom a Korzymjom je wčera popołdnju ćah Trilex 67lětneho muža sobu hrabnył, kiž bě njejapcy na kolije běžał, jako so ćah bližeše. Najebać hnydomne borzdźenje njezamó wodźer njezbožu zadźěwać. Ćah muža něhdźe 50 metrow sobu wlečeše. 67lětny zražku njepřežiwi. Pasažěrojo a wodźer ćaha wostachu njezranjeni. Jednočarowy wotrězk wostanje nachwilnje zawrjeny. Kriminalna policija pad nětko přepytuje.

Wotstawk njedodźerželi

Na awtodróze A4 njedaloko Połčničanskeje wotbóčki je wčera popołdnju k zražce třoch nakładnych awtow dóšło. Šofer Volva njedźiwaše na Iveco, kotryž před nim jědźeše, a zrazy do njeho. Dalši šofer situaciju njespózna a prasny na to ze swojim Iveco do znjezboženeju awtow. Cyłkowna škoda na jězdźidłach wučinja něhdźe 19 000 eurow.

nawěšk

  • Spěchowanski kruh za serbsku ludowu kulturu je 16. a 17. měrca mjeztym 28. serbske jutrowne wiki w Budyskim Serbskim domje wuhotował. Wiki běchu jara wuspěšne, tež nastupajo ličbu wopytowarstwa. Tule smy wam někotre fotowe impresije z wikow zestajeli

nowostki LND