Erfurt (dpa/SN). Durinski krajny sejm w Erfurće měješe dźensa noweho ministerskeho prezidenta kraja wuzwolić. Po wobzamknjenju koaliciskeho zrěčenja mjez Lěwicu, SPD a Zelenymi je dotalny ministerski prezident Bodo Ramelow (Lěwica) znowa za zastojnstwo kandidował, byrnjež koaliciji w parlamenće štyri hłosy k wjetšinje pobrachowali.

Přećiwo 63lětnemu Ramelowej nastupi kandidat AfD, njestronski wjesnjanosta Christoph Kindervater. Tón bě so před dnjemi sam za zastojnstwo přizjewił.

W prěnim wólbnym přeběhu dósta Ramelow 43 z cyłkownje 90 wotedatych hłosow. Za Kindervatera hłosowaše 25 zapósłancow sejma. To su třo wjace, hač ma frakcija AfD mandatow.

Dokelž by Ramelow za absolutnu wjetšinu znajmjeńša 46 hłosow trjebał, prošachu zapósłancow k druhemu wólbnemu kołu. Jeho wuslědk hač do kónca redakciskeho časa njepředležeše. Fachowcy z toho wuchadźachu, zo budźe třeći wólbny přeběh trěbny. Potom do­saha jednora wjetšina.

Zastupnicy energijoweho hospodarstwa krizuja plany knježerstwa

Berlin (dpa/SN). Mócna krajna skupina Sewjerorynsko-Westfalskeje w frakciji SPD w zwjazkowym sejmje žada sej wot zwjazkoweho knježerstwa jasne polěpšenja w planowanym zakonju wo kóncu zmilinjenja wuhla. Zawrjenja bjez wotškódnjenja z wulkim rizikom skóržbow wohrožeja šěroki towaršnostny konsens wuhloweje komisije, rjekny předsyda krajneje skupiny Achim Post wčera w Berlinje. „Trjebamy nětko substancielne změny w procesu zakonjedawstwa.“ Je nuznje trjeba, zo zwjazkowe knježerstwo na kritiku dźěłarnistwow, předewzaćow a komunow reaguje a ju aktiwnje přesadźi, Post wuzběhny.

Tak drje so debata wo planowanym rjadowanju nastupajo kónc wuhla dale wožiwi. Němski zwjazkowy minister za hospodarstwo Peter Altmaier (CDU) je so w tej naležnosći wčera ze zastupnikami kamjentnowuhloweho hospodarstwa zetkał. Tež zastupnicy krajneho knježerstwa so na rozrěči wobdźělichu.

Wjetšina Walizičanow je w lěće 2016 za brexit hłosowała. Čehodla, so cuzy praša, hdyž je sej tamnišu wobkuzłacu krajinu a wobstejnosće zbližił, pod kotrymiž we Waliziskej ratarjeja. Kaž tak husto hakle we wosobinskej rozmołwje zhoniš – abo tež njezhoniš –, što je ludźi tehdy pohnuło tak hłosować. Runje na sewjeru, blisko najwyšeje waliziskeje hory Snowdon, rjekny mi twarski inženjer, zo budu so ludźo hišće dźiwać, što na nich přińdźe. 58lětny Walizičan-wuměnkar z južneho dźěla kraja bě porno tomu přeswědčeny, zo je jeničce brexit prawy puć. Zda so mi, zo mnohim scyła jasne njebě, kotry wuznam spěchowanske programy Europskeje unije za waliziskich ratarjow maja. Woni dwěluja, zo jim britiske knježerstwo wšo to zaruna, štož wot klětušeho z Brüssela wjace njedóstanu. Jeli pak ludźo pobrachowaceje perspektiwy dla swoje wsy wopušća, tam tež walizišćina wotemrěje. Kajki to zahubny wuslědk brexita. Axel Arlt

Na njewšědne wašnje je 32lětny z Essenskeho policajskeho prezidija twochnył, hdźež sedźeše w celi za wustrózbjenje. Jemu bě so poradźiło předrěć so přez małe woknješko, přez kotrež jatym jědź dawaja. Mylnje jemu zastojnicy hišće wěstotne durje wotewrěchu. Skónčnje móžeše wón prezidij wopušćić. Konsekwency zadźerženje muža žane njezměje: Ćeknyć njeje chłostajomne, nimo toho chcychu jeho tak a tak pušćić.

Ze špatneho sona wotućiwši je 90lětna w allgäuskim Bad Wörishofenje policiju zazwoniła a wo ilegalnym wubědźowanju awtow z wjacorymi zranjenymi w hewak měrnym městačku rozprawjała. Zastojnicy na to wosrjedź nocy přijědźechu, njemóžachu pak ničo njewšědne zwěsćić. W rozmołwje ze starušku so wukopa, zo bě sej wona před telewizorom wusnyła a wo podawkach jeno soniła.