Berlin (dpa/SN). Předsyda krajneje skupiny CSU w zwjazkowym sejmje Alexander Dobrindt ma za wopačne, wažne politiske temy kaž kónc zmilinjenja brunicy ryzy fachowemu gremijej přewostajić. Hladajo na dźěło wuhloweje komisije je wón wčera w Berlinje kritizował, zo so tajka wažna tema ze zjawneje debaty prosće zhubi, hdyž politiske rozsudy na te wašnje do gremija ekspertow „wurisaja“. Ludnosć na te wašnje pozdatnje prawe politiske rozsudy hižo na wědomje njebjerje. „To płaći ćim bóle za skónčenje wudobywanja brunicy.“ Dobrindt sej žada, zo přichodnje wjace rozsudow w parlamentach a w politice rozjimaja.
Je-li tema změny klimy za wolerjow rozsudna a maja-li ju na lisćinje temow cyle horjeka, dyrbjeli so politikarjo z njej rozestajeć. Dyrbjał-li so w tutej komunikaciji problem mjez posrědkowarjom a přijimarjom informacije pokazać, su zamołwići wočiwidnje wopačny medij wužiwali, Dobrindt doda.
Koparjo francoskeje narodneje wubranki, kotraž je sej loni titul swětoweho mištra wuwojowała, su wotnětka čłonojo francoskeje Čestneje legije. Prezident Emmanuel Macron je jim wčera w Pariskim Élyséeskim palasće najwyši zasłužbowy rjad kraja přepodał. K wuznamjenjenym słušeja tež trenar Didier Deschamps a sobudźěłaćerjo koparskeho mustwa. Čestnu legiju bě Napoleon 1802 załožił.
Z přećelnymi chłostankami chcedźa w Annabergu-Buchholzu přichodnje šoferow pochwalić, kotřiž přikładnje parkuja. Mjeztym zo dyrbja šoferojo wopak wotstajenych awtow dale z pjenježnej pokutu za woknotrějakom ličić, móža so šoferojo z korektnym zadźerženjom nastupajo parkowanje připóznaća nadźijeć. „Super parkowane – dale tak!“ steji na pisanych kartach. Nimo toho rozdźěleja tam titki z gumijowymi barikami.
Berlin (dpa/SN). Industrija Němskeje je kurs zwjazkoweho knježerstwa w hospodarskej politice masiwnje kritizowała. „Politika knježerstwa předewzaćam škodźi“, rjekny prezident wšoněmskeho Zwjazka němskeje industrije Dieter Kempf składnostnje dźensnišeho dnja industrije w Berlinje. „Knježerstwo je wulki dźěl swojeje dowěry přisadźiło.“ Hospodarske połoženje w Němskej wuwiwa so přiběrajcy na riziko. Předewzaćelske dawki měli so znižić.
Standardny list budźe dróši
Bonn (dpa/SN). Němski póst chce porto za listy jasnje podróšić. Standardny list ma přichodnje 80 centow město dotal 70 płaćić, kaž koncern w Bonnje zdźěla. Za pohladnicy planuja zwyšenje wot 45 na 60 centow. Do toho bě zwjazkowa syćowa agentura ramik postajiła, w kotrymž je móžno płaćizny zwyšić. Powšitkownje pak njeběchu z tym ličili, zo to Němski póst tak masiwnje čini. Nowe płaćizny płaća wot 1. julija.
Wjace pjenjez hladarjam
Weimar (dpa/SN). Zwjazkowa kanclerka Angela Merkel (CDU) z toho wuchadźa, zo so němske knježerstwo w juliju z namjetami zbliženja žiwjenskich poměrow mjez wuchodom a zapadom zaběra. To rjekny wona wčera na konferency frakciskich předsydow CDU a CSU we Weimaru. Tež z ministerskimi prezidentami chcedźa wo tym rěčeć. W lěću předpołoža potom wotpowědny program, kaž Angela Merkel připowědźi.
We Weimaru potwjerdźichu, zo chcyli wotpowědnje koaliciskemu zrěčenju mjez uniju a SPD dale na zawjedźenju zakładneje renty ze zjednorjenym pruwowanjom potrěbnosće a na wotstronjenju solidarneho připłatka dźěłać.
Drježdźany (dpa/SN). Sakski ministerski prezident Michael Kretschmer (CDU) je masiwne spjećowanje přećiwo wot zwjazkoweho knježerstwa planowanemu skónčenju zmilinjenja brunicy hač do lěta 2038 w rjadach CDU/CSU kritizował. „Wšitcy partnerojo dyrbja swoje přilubjenja dodźeržeć“, rjekny wón tele dny powěsćerni dpa w Drježdźanach. Sakskej njeje to lochko było, ale konflikt mjez ekonomiju a ekologiju ma so rozrisać. „Dojednane naprawy za strukturnu změnu dyrbimy nětko runje tak zwoprawdźić, kaž je planowane.“ Michael Kretschmer mjenowaše to wulku šansu za regiony, nowe dźěłowe městna wutworić, prjedy hač dotalne wotpadnu. „Ludźo dyrbja so na přilubjenja spušćeć móc. Smy kompromis namakali a chcemy, zo so tón zwoprawdźi.“
Berlin (dpa/SN). Zapósłancy SPD w zwjazkowym sejmje su so dźensa popołdnju schadźowali, zo bychu wo dalšim postupowanju po wotstupje stronskeje předsydki Andreje Nahles a po bolostnej wólbnej poražce při wólbach Europskeho parlamenta kónc meje wuradźowali. Nahles wuži składnosć, zo by so ze zapósłancami rozžohnowała a předsydstwo frakcije oficialnje złožiła.
Ze swojim wotstupom je Andrea Nahles SPD do ćežkeje krizy storčiła. Wčera běchu rozsudźili, zo ministerskej prezidentce Mecklenburgsko-Předpomorskeje Manuela Schwesig a Porynsko-Pfalcy Malu Dreyer a předsyda hessenskeje SPD Torsten Schäfer-Gümbel stronu nachwilnje zhromadnje nawjeduja.