Budyšin (SN). Z titlom „Šmjatańca w raju bajkow“ je Załožba za serbski lud nowu serbskorěčnu DVD za dźěći wot šěsć lět wudała, kotraž hodźi so derje pod hodowny štom. Młodźi a starši přihladowarjo móža sćěhować, kak so Cinderella z pomocu přećelow wo to prócuje, raj bajkow zaso do runowahi přinjesć.

Přełožk do hornjoserbšćiny wobstarała bě Jadwiga Dyrlichowa. Toni Bruk, Michał­ Cyž a Stefan Kutsche su na DVDji sobu dźěłali. Znaći serbscy dźiwadźelnicy spožčichu figuram swój hłós.

Hižo do kónca Druheje swětoweje wójny běchu so třo wodźacy reprezentanća anti­hitlerskeje koalicije dojednali, na­čolnych němskich wójnskich złóstnikow a politikarjow NSDAP ze smjerću chłostać. Jendźelski premier Churchill namjetowaše, sta wodźacych nacijow a generalow hnydom zatřělić. Stalin žadaše sej w mjenje Sowjetskeho zwjazka (ZSSR), tule ličbu na 50 000 rozšěrić. Prezident USA Roosevelt wupraji so za wotprawjenje złóstnikow ze sekeru abo na šibjeńcy. Na te wašnje su nazymu 1946 tež smjertne wusudy wuwjedli.

Wójnske ministerstwo USA pak namjetowaše na kóncu wójny 1945 nowemu prezidentej Trumanej, mjezynarodne wojerske sudnistwo wutworić. Wone njeměło jeničce načolnych złóstnikow, ale tež nacistiske organizacije a jich zahubnu ideologiju po dokładnym juristiskim jednanju zasudźić. Jako dotal nje­znata wobskóržba buchu „złóstnistwa přećiwo měrej a čłowjestwu“ poručene, do čehož słušachu nadpady na druhe staty, złóstnistwa wójska přećiwo cuzym wojakam a na ciwilnej ludnosći, ale tež masowe morjenje ludow kaž Židow.

Wojerecy (AK/SN). Hornja Łužica ma wulki potencial młodych wuměłcow za našočasne­ molerstwo a plastiki. Tole podšmórny přirjadnica Budyskeho krajneho rady Birgit Weber sobotu we Wojerowskim hrodźe na sedmej awkciji Za­łožby za wuměłstwo a kulturu Hornjeje Łužicy. Dohromady 122 twórbow 66 wu­měłcow­ su tam přesadźowali. Cyłkowny dobytk wučinješe wjace hač 12 000 eurow. Z 800 eurami najwjetši ­poskitk docpěchu za twórbu Jürgena Spottki „Tamny je hinaši – wón je kaž ty“. Wje­lećanski drjeworězbar bě tryptichon z lipoweho drjewa w času wot lěta 2006 hač do 2015 stworił a zaběra so w nim na zajimawe wašnje z mjezyčłowjeskej tolerancu. Spottke je so prěni raz na awkciji wobdźělił. Połojcu dobytka dósta wuměłc, tamnu Załožba za wuměłstwo a kulturu Hornjeje Łužicy.