Europske a komunalne wólby w Hornjej Łužicy: Wšudźe přirost za AfD, BSW na třećim městnje
Budyšin (SN/mb). Strona zwjazkoweho kanclera Olaf Scholza, SPD, je na europskich wólbach w Bóšicach 1,7 procentow hłosow dóstała (2019: 5,2), AfD je tu swój wuslědk lěta 2019 (42,1) na 51,8 procentow stopnjowała. Tež w Njeswačidle je „módra“ strona ze 759 wot 1 519 hłosow (50,0%) absolutnu wjetšinu zdobyła. Gmejny zarjadniskeho zwjazka Při Klóšterskej wodźe wostanu drje „čorna kupa w módrym morju“, ale twjerdźizna křesćanskich demokratow so w Ralbicach-Róžeńće drjebi. Tule měješe CDU před pjeć lětami hišće 45,4 a AfD 23,7%, nětko su za CDU 39,7 a za AfD 30,2% ličili.
Štóž je z čłonom gremija Domowiny a za AfD kandiduje, so z tym awtomatisce z woleneje funkcije w třěšnym zwjazku wuzamknje. To je zwjazkowe předsydstwo (ZP) pjatk wobzamknyło.
Budyšin (SN/mb). Zakład za jasne wotmjezowanje je, zo je krajny zarjad za škit wustawy w Sakskej stronu AfD jako wěsće prawicarskoekstremistisku zastopnjował. Rozsud płaći tež za druhe ekstremistiske strony a skupiny. Třo čłonojo ZP, Jan Bělk, Alena Hiccyna a Marja Michałkowa, su so k tomu słowa jimali a namjet podpěrali, doniž njeje gremij jednohłósnje přihłosował. Rjadowanje płaći wot dnja wobzamknjenja.
Dalša wažna tema, kotruž su krótkodobnje na dnjowy porjad wzali: Po dotalnym planje krajneho zarjada za šulu a kubłanje (LaSuB) w přichodnym štwórtym lětniku Serbskeje zakładneje šule „dr. Marja Grólmusec“ w Radworju serbska rjadownja njebudźe (Serbske Nowiny su rozprawjeli). Starši potrjechenych serbskich šulerjow kaž tež čłonojo Staršiskeje iniciatiwy Radwor z.t. su Domowinu a Serbske šulske towarstwo (SŠT) wo podpěru prosyli. ZP žada sej zdźerženje nětčišeje serbskeje rjadownje 3. lětnika.
Prěnje koparske mustwo Biskopičanskeho KT 08 je sej sobotu w Arnstadće mišterstwo wyšeje ligi stafla juh wudobyło, a to z wo jedne wrota lěpšim wrotowym poměrom (hlej tabulka), hač dotalny načolnik VFC Plauen. Arnstadt – Biskopicy 0:6. Z tym hraje cyłk trenarja Franka Ričela w nowej hrajnej dobje w regionalnej lize na přikład přećiwo FC Carl Zeiss Jena abo Berlinskemu FC Dynamo. Gratulaciju do Biskopic! Foto: Frank Terks/Biskopičanske KT 08
Přewšo spokojom je pólski ministerski prezident Donald Tusk (naprawo) wčera wječor zhromadnje z Waršawskim wyšim měšćanostu Rafałom Trzaskowskim (nalěwo) na wuslědki wólbow Europskeho parlamenta reagował: Polacy su so ze 37,1 procentom za nowu knježacu wobydlersku koaliciju wuprajili. Dotal knježaca PiS dósta 36,2 procentaj. Foto: dpa/Kacper Pempel
Njewšědny swójbny chór ze serbskimi a mjezynarodnymi pěsnjemi zahoriłPančicy (SN). Hižo třeći króć wotmě so pjatk wječor na kopaće połnym Błažikec-Kaulfürstec dworje w Kukowje wosebity koncert. Po tym, zo běštej jón w zašłymaj lětomaj skupinje Wólbernosće a Přezpólni wuhotowałoj, wustupichu tónkróć wnučki Hany Šnajdroweje a Bena Šnajdra ze Smječkec, kotryž by lětsa swoje 100. narodniny woswjećił, hromadźe ze swojimi partnerami. Dohromady 16 spěwarjow a instrumentalistow poskići pisany program. Znate serbske štučki kaž „Słyšće kak pišćele w korčmje du“, „Maćernu rěču lubuju“ abo klasikar Zejlerja a Kocora „Tam kóždy dźeń je lubosć nowa“ wotměnjachu so z klasiskim a popowym mjezynarodnym repertoirom. Tež publikum dósta składnosć, někotre chórowe sadźby sobu spěwać, na přikład znate słowakske „Aká si mi krásna“. Hromadźe z akordeonom zanjese připosłucharstwo z elanom pěsnje kaž „Lubka lilija“ abo „Pod Kulowom w holi“. ...
Chrósćicy (SN/BŠe). Za cyłkownje 54 maturantow a maturantkow Budyskeho serbskeho gymnazija je so zawčerawšim z přepodaćom wuswědčenjow w Chróšćan „Jednoće“ nowy žiwjenski wotrězk zahajił. Młodostni su lětsa wuspěšnje abituru złožili. Za swjedźenskeho rěčnika běchu sej woni kapłana Floriana Mróza přeprosyli. Wón sam je w juniju 2008 na Wojerowskim Lessingowym gymnaziju maturu złožił a měješe dobru radu přihotowanu. „Z čehož je waša wutroba połna, z toho rěči waš ert“, wón hladajo na nowy žiwjenski wotrězk a rozsud za powołanski puć wuzběhny. „Žiwjenske prašenja trjebaja sprawne wotmołwy wašeje wutroby“, Mróz zwurazni
