Poćeženja triatlona dla
Běły Chołmc. Zajutřišim, sobotu, a njedźelu, 26. awgusta, zetkaja so znowa sta triatletow při Třižonjanskim jězoru, hdźež so lětuše wubědźowanje KnappenMan wotměje. Start a cil budźetej při Běłochołmčanskim přibrjoze před tamnišim hosćencom Hipos Beachbar. Po płuwanju jako prěnjej disciplinje powjedźe kolesowanska čara do Bórka a wokoło Šibojskeho jězora. Běhać budu wobdźělnicy na to po kołopuću wokoło jězora. Šoferojo měli wobkedźbować, zo dóńdźe sobotu a njedźelu triatlona dla k poćeženjam wobchada. Zdźěla budźe statna dróha S 108 pola Łaza dospołnje zawrjena.
Poradźować so dać
Kamjenc. Sakska centrala přetrjebarjow poskića wšitkim podružnikam a wobsedźerjam domow neutralne energijowe poradźowanje. Wone budźe póndźelu, 10. septembra, wot 15 do 18 hodź. w Kamjenskej poradźowarni na Pfortenowej 6. Při tym póńdźe wo kóšty za milinu a tepjenje, wo izolaciju twarjenjow, wo techniske prašenja, wo spěchowanje energetiskeho saněrowanja a dalše temy. Zajimcy měli so na kóždy pad přizjewić, a to pod darmotnym telefonowym čisłom 0800/809 802 400.
Informuja wo planowanju
Budyšin. Po tym zo je Jordanowa rěčka w juniju po zliwku na zjawnych městnach a priwatnych ležownosćach Budyšina škody načiniła, planuje měšćanske zarjadnistwo w tym wobłuku škit před wulkej wodu. Dźěło pak je čas rubjace a zaběra wjacore zarjady. Tohodla chcedźa wobydlerjow jutře, štwórtk, wot 18 hodź. na žurli Budyskeho Kamjentneho domu wo tuchwilnym stawje planowanja informować. Nimo toho porěča wo tym, kotre škody w zjawnym wobłuku su mjeztym wotstronjene.
Wobornicy zaso zwučuja
Biskopicy. Wohnjowe wobory Budyskeho wokrjesa budu přichodne dny zaso mobilnu wohnjowu zwučowansku připrawu wužiwać móc. Wot jutřišeho hač do 29. awgusta steji wona na terenje Biskopičanskeho wohnjowoborno-techniskeho centruma. W něhdźe 40 kwadratnych metrow wulkim kontejneru móža wohenje w stwě, kuchni, při płunowej připrawje a na dalšich městnosćach simulować. Wjace hač 320 wobornikow wokrjesa tam přichodne dny zwučuje.
Z kursom kurić přestać
Na knižnu premjeru
Za kolesowanje so přizjewić
Chórowa hudźba zaklinči
Ochranow. Ze swojim najnowšim rjadom koncertow „Mišterske twórby chóroweje hudźby“ budźe Serbski ludowy ansambl zajutřišim, pjatk, w Ochranowje a přichodnu njedźelu w Lutorjecach (Leutersdorf) z hosćom. Pod nawodom chóroweho direktora Andreasa Pabsta jewja so w koncertomaj kruchi serbskich, němskich a mjezynarodnych komponistow baroka, romantiki kaž tež moderny. Koncert w Ochranowskej cyrkwi započnje so pjatk w 19 hodź., tón w Lutorječanskej katolskej cyrkwi njedźelu w 16 hodź.
Předstaja alternatiwnu šulu
Běła Woda. Spočatk šulskeho lěta 2019/2020 chcedźa w Běłej Wodźe swobodnu alternatiwnu zakładnu šulu wutworić. Projekt čłonojo załoženskeje iniciatiwy přichodny tydźeń trójce předstaja, a to wutoru w 19 hodź., srjedu w 17 hodź. a štwórtk w 15.30 hodź., stajnje w rumnosćach Běłowodźanskeje perspektiwy w zetkanišću při bulwarje na Hasy Rosy Luxemburg 21. Štóž chce so wobdźělić, dyrbi so e-mailnje pod přizjewić.
Předsydka frakcije přijědźe
Poskića šulerski kalender
Budyšin (SN). W Budyskim wólbnym běrowje zapósłanca Sakskeho krajneho sejma Marka Šimana (CDU) na Wysokej 16 móža sej zajimcy šulerski kalender krajneho sejma za šulske lěto 2018/2019 wotewzać. Kalender je robustny tydźenski planowar za sakskich šulerjow a młodostnych. Běrow Šimana je wot póndźele do pjatka wot 9 do 17 hodź. přistupny.
Wulki zajim za rjemjesło
Rěčicy (SN). Wšitke hornčerske dźěłarnički běchu w lětnich prózdninach na Rěčičanskim Erlichtec dworje wuknihowane. Tež plećenje košow holcy a hólcy rady přiwzachu. Mnozy zajimcy běchu ze starych zwjazkowych krajow k swojim dźědam a wowkam na wopyt přijěli. Woni mějachu wulke wjeselo, sej starodawne rjemjesło zbližić, a móžachu sej na kóncu swój wudźěłk, kaž keramisku wazu, sobu domoj wzać.
Kubłanska jězba
Chrósćicy (SN). Župa „Michał Hórnik“ přeproša swojich čłonow a dalšich zajimcow na kubłansku jězbu wot pjatka, 31. awgusta, do njedźele, 2 septembra. do Namysłowa. Na programje steja wodźenje po měsće, wopyt radnicy kaž tež dalšich wosebitosćow města a wokoliny. Přizjewjenja přijimuja hač do 16. awgusta w regionalnym běrowje Domowiny w Chrósćicach (tel. 03 57 96 / 9 62 54; e-mail: ).
Informaciski a temowy wječor
Běła Woda (SN). Wyši měšćanosta Běłeje Wody Torsten Pötzsch přeproša póndźelu, 13. awgusta, we 18 hodź. do Běłeje Wody w Sociokulturnym centrumje Telux na informaciski a temowy wječor k wólbam do Serbskeho sejma. Na zarjadowanje su Serbja, wosebje ze srjedźneje Łužicy, přeprošeni. Přizamknje so diskusija wo prašenjach ke kulturnej a kubłanskej awtonomiji w Serbach, wězo předewšěm z perspektiwy srjedźneje Łužicy.
Swjedźeń pod Čornobohom
Hrjebak mjeno dóstał
Wojerecy (SN). Hakle njedawno we Wojerowskim zwěrjencu narodźeny hrjebak (Erdmännchen) rěka Lia-Mark. Při mjenoswjećbje minjeny pjatk staj jednaćel Wojerowskeje bydlenskeje tzwr Steffen Markgraf a jednaćel towaršnosće Zwěrjenc, kultura a kubłanje Arthur Kusber čiłe zwěrjatko wukřćiłoj. Mjeno wupytał bě Lukas z Bad Wurzacha. Jako dar dósta wón nětko lětnu kartku za Wojerowski hród a coologisku zahrodu kaž tež słónčne nawoči a frisbee.
Hrajkanišćo planować
Kedźbu, brigadnicy!
Budyšin (SN). Čłonojo chóra 1. serbskeje kulturneje brigady njech njeskomdźa zwučowanje štwórtk, 9. awgusta, kaž tež pjatk, 10. awgusta, wot 9.15 hač do 14.50 hodź. w SLA. Proby su wažne za wobrubjenje 100. posmjertnych narodnin židowki Hany, srjedu, 15. awgusta a za přihot nazymskeju koncertow.
Hudźbny tydźeń zakónčeny
Smochćicy (SN). 90 spěwarjow z cyłeje Němskeje, mjez nimi instrumentalisća, wobdźělichu so minjeny tydźeń na nětko hižo 16. Smochčanskim hudźbnym tydźenju. Pod nawodom prof. Wernera J. Patzelta a Huberta Gößweina woni hač do pjatka pilnje zwučowachu. W srjedźišću steješe skandinawiska chórowa hudźba. Wulkotny zakónčacy koncert sobotu wječor w Smochčanskej cyrkwi dožiwi 110 připosłucharjow.
Knefle a wuměłstwo
Njeswačidło. Wot njedźele, 5. awgusta, budźe w Njeswačanskim domizniskim muzeju nowa wustajeńca přistupna. W přehladce předstaja z Nowosólca-Hródka pochadźacy Michael Voigt pod hesłom „Wuměłstwo a knefle“ swoju zběrku knefli. Přehladku wotewru w 14 hodź.
Ze sportom přećiwo rasizmej
Grodk. Swójby w Grodku wustupuja zaměrnje přećiwo rasizmej. Towarstwo Přećeljo swójbow wotměje tuž jutře, 4., a njedźelu, 5. awgusta, na Grodkowskim sportnišću mjeztym 4. koparski cup přećiwo rasizmej. Mustwa móža so hišće hač do jutřišeho w 10 hodź. na městnje přizjewić. Přihladowarjo su witani.
