Berlinske Serbske blido druhdźe

štwórtk, 02. januara 2020 spisane wot:
Berlin (SN). Januarske Serbske blido w němskej stolicy njebudźe wuwzaćnje na znatym městnje a tež nic w zwučenym času. Wo tym informuje Angelika Kurowscyna. Štwórtk, 9. januara, budźe móžnosć, so ze zasłužbnym a horliwym Serbom kaž tež wjelelětnym swěrnym čłonom Towarstwa Serbska kulturna informacija­ Berlin Mětom Pernakom rozžohnować. Pohrjeb spočatk decembra zemrěteho budźe w 11 hodź. na kěr­chowje Moltkestraße w Berlinje-Lich­terfeldźe.

Chór Meja koncertuje

póndźela, 30. decembera 2019 spisane wot:

Radwor. Hodowny a jubilejny koncert wuhotuje chór Meja składnostnje 125. róčnicy swojeho wobstaća sobotu, 4. januara, w Ra­dworskim hosćencu „Meja“. Prěni započnje so w 15.30 hodź. Wot 15 hodź. poskića tam swačinu. Dalšemu koncertej w 19 hodź. přizamknu so reje z kapału Con-takt.

Silwester do cyrkwje

Baćoń. Hudźbny nyšpor z meditacijemi na kónc lěta budźe jutře w 19 hodź. w Baćonju. Kaž loni wuhotuja jón młodostni tamnišeje wosady.

Nowe wotewrjenske časy

Wojerecy. Měšćanski historiski archiw we Wojerecach budźe wot noweho lěta stajnje wutoru wot 10 do 12 hodź. a wot 14 do 16 hodź. wočinjeny. Póndźelu, štwórtk a pjatk budźe wón jenož po dorěčenju při­stupny, srjedu wostanje začinjeny. Hač do 3. januara 2020 wostanje Wo­jerowski měšćanski historiski archiw zawrjeny.

Kupjel budźe zawrjena

Kamjenc. Kamjenska halowa kupjel wostanje silwester a Nowe lěto zawrjena, dźensa je hač do 18 hodź. přistupna.

Na koncert z Emmerlichom

pjatk, 20. decembera 2019 spisane wot:

Lubij. 4. adwentnu njedźelu w 16 hodź. wotměje so w Lubijskej Mikławšskej cyrkwi swjedźenski adwentny koncert ze spěwarjom Guntherom Emmerlichom. Jemu poboku budźe sopranistka Jeanne Pascale Schulze. Pod nawodom komorneho hudźbneho direktora Christiana Kühny přewodźa Emmerlicha Collegium canorum Lobaviense a hudźbnicy na trompeće, cellu, klawěrje a pišćelach. Zaklinča arije a duety Händela, Bacha a Mozarta.

HC Schmidt čita ruske bajki

Slepo. Na powědanje starych ruskich bajkow móža so dźěći kaž tež jich starši a dalši njedźelu w 16 hodź. w Slepjanskim Serbskim kulturnym centrumje wjeselić. Připowědźił je so dźiwadźelnik a spěwar HC Schmidt, zo by publikum zakuzłał.

Po wuchodźe putnikował

štwórtk, 19. decembera 2019 spisane wot:

Chrósćicy. Něhdźe tysac kilometrow dołhi­ je Jakubowy puć podłu historiskeje Via regije wot ukrainskeje hranicy přez Pólsku hač do Zhorjelca. Po tej čarje je prof. Gerd Gellißen w dwěmaj wotrěz­komaj pěši putnikował, a to w lětomaj 2017 a 2018. Wo tym přednošuje emeritowany profesor, horliwy putnik a prezident Bratstwa swjateho Jakuba z Düsseldorfa, z wobrazami přichodnu sobotu, 21. decembra, w 19.45 hodź w Chróšćanskej putniskej hospodźe. Nimo wosobinskich dožiwjenjow Gellißen tohorunja wopisuje, što putniska šćežka ze swojej přirodu, stawiznami a wuměłskimi stawiznami skići. Wutrobnje přeprošeni su wšitcy putnicy, tajcy, kotřiž chcedźa so hakle z putnikom stać, a wězo tež wšitcy zajimcy zbliska a zdaloka.

Tohorunja sobotu, ale hižo w 16 hodź., su najmłódši znowa na bajku do Chróšćanskeje putniskeje hospody prošeni. Ćeta Monika baje jim tónraz wo „Třoch přećach“.­

Popołdnjo krótkofilmow

Na haćenja so nastajić

wutora, 17. decembera 2019 spisane wot:
Budyšin. Z haćenjemi wobchada dyrbja šoferojo tele dny w Budyšinje ličić. To zdźěla zarjad za medijowe dźěło a měšćanski marketing sprjewineho města. Kaž ze zdźělenki wuchadźa, wostanje Beh­ringowa hasa znajmjeńša hač do jutřišeje srjedy w 12 hodź. dospołnje za­wrjena. Přičina su twarske dźěła. Tam asfaltowy­ powjerch dróhi kompletnje ponowjeja. Dźěła wukonjeja po informacijach města w zwisku z přepołoženjom syće k zastaranju z dalnoćopłotu.

Na adwentne spěwanje

póndźela, 16. decembera 2019 spisane wot:
Wojerecy. Na zhromadne adwentne spěwanje su zajimcy dźensa wječor na dźěćacu a młodźinsku farmu Křesćansko-socialneho kubłanskeho skutka (CSB) we Wojerecach prošeni. Na prěnim zarjadowanju tajkeho razu scyła na farmje CSB chcedźa tradicionalne, adwentne a hodowne pěsnje spěwać. Podpěrać chcetaj jich hudźbnaj šulerjej Fabian Schulze a Philipp Seidel. Započatk adwentneho spěwanja je we 18 hodź. CSB skedźbnja na to, zo wotměje so spěwanje pod hołym njebjom, wotpowědna ćopła drasta je tuž trěbna.

Na Teschenske wiki

štwórtk, 12. decembera 2019 spisane wot:

Wojerecy. Dohodowny čas je nimale wšudźe zdobom čas adwentnych wikow. Tež we Wojerecach je hižo z dobrej tradiciju tajke wuhotować. Tamniše Teschenske wiki wotewru jutře, pjatk, w 16 hodź. Hač do njedźele móža sej zajimcy na staroměšćanskim torhošću – pjatk a sobotu hač do 22 hodź. a njedźelu hač do 20 hodź. – dohodownu atmosferu při rozmołwje a słódnym horcym winje lubić dać.

Adwent w starej wowčerni

Stróža. Na popołdnjo wosebiteho razu sće jutře, pjatk, na dwór biosferoweho rezerwata­ Hornjołužiska hola a haty w Stróži witani. Zarjadnistwo rezerwata a čłonojo serbskeho towarstwa Radiška su za 3. adwent nimo hudźby něšto k paslenju za dźěći spřihotowali a po­skića tež wšelake regionalne wudźěłki. Kupić móžeće sej tam mjez druhim hodowny štomik z łužiskich lěsow.

Pasla hodowne dariki

Worklecy. Na zhromadne paslenje hodownych darikow su šulerki a šulerjo 6. do 8. lětnika sobotu, 14. decembra, wot 9 hodź. do Worklečanskeho Don Boskoweho­ domu přeprošene/přepro­šeni. Za paslenski material zběraja zamołwići na wobdźělnika dźesać eurow.

Je zaso čas hrow

Na adwentne spěwanje

srjeda, 11. decembera 2019 spisane wot:

Wojerecy. Na zhromadne adwentne spěwanje su zajimcy póndźelu, 16. decembra, na dźěćacu a młodźinsku farmu Křesćansko-socialneho kubłanskeho skutka (CSB) we Wojerecach prošeni. Na prěnim zarjadowanju tajkeho razu scyła na farmje CSB chcedźa tradicionalne, adwent­ne a hodowne pěsnje spěwać. Podpěrać chcetaj jich hudźbnaj šulerjej Fabian Schulze a Philipp Seidel. Započatk adwentneho spěwanja je we 18 hodź. CSB skedźbnja na to, zo wotměje so spěwanje pod hołym njebjom, wotpowědna ćopła drasta je tuž trěbna.

Pohłubšacy kurs serbšćiny

Budyšin. Rěčny centrum WITAJ poskića wšěm tym, kotřiž maja hižo zakładne znajomosće serbšćiny a chcedźa je pohłubšić, wosebity rěčny kurs. 13. januara jón w Budyskim Serbskim šulskim a zetkawanskim centrumje na Friedricha Listowej zahaja. Kaž RCW dale zdźěla, přewjedu kurs hač do meje prawidłownje póndźelu wot 17.30 do 19 hodź. Dalše informacije­ namakaće pod www.witaj-sprachzentrum.de. Za kurs přizjewić móžeće­ so pod telefonowym čisłom 03591/550 400 abo z mejlku pod .

Spěšnje so přizjewić

wutora, 10. decembera 2019 spisane wot:

Worklecy. Jězbu na swětoznate pasionske hry do Oberammergauwa (njedaloko Mnichowa) za serbskich młodostnych přihotuje tuchwilu Worklečanske dekanatne młodźinske dušepastyrstwo. Wuprawa budźe wot 8. do 10. meje 2020, z wotjězdom pjatk nawječor. Kaž z běrowa Worklečanskeho dušepastyrstwa rěka, smědźa so tež 15lětni wobdźělić. Młodostni změja tam składnosć sej generalku wobhladać. Wšitcy 15- do 26lětni dóstanu zastupny lisćik, kotryž hewak znajmjeńša 150 eurow płaći, za 24 eurow. Po předstajenju budu so samo z dźiwadźelnikami rozmołwjeć móc. Zajimcy njech so hač do jutřišeje srjedy, 11. decembra, w běrowje Worklečanskeho dekanatneho młodźinskeho dušepastyrstwa a e-mailnje pod přizjewja. Dalše informacije k jězbje su tež pod www.jugendtage-passionsspiele.de přistupne.

Wuslědki slědźenjow

Knižna premjera

póndźela, 09. decembera 2019 spisane wot:

Budyšin. Na premjeru knihi „Dźiwadło njewidźomnych dźěći“ přeprosy wšitkich zajimcow Ludowe nakładnistwo Domowiny do Budyskeho Serbskeho gym­nazija na Friedricha Listowej. Srjedu, 11. decembra, předstaji tam přełožer Jan Měškank knihu Marcina Szczygielskeho. Započatk je w 9.40 hodź.

Dohodowny čas porjeńšić

Čorny Chołmc. Na adwentny koncert w Čornochołmčanskej Marinej cyrkwi přeprosytej tež lětsa zaso chór nałožkoweho towarstwa Krabat a Wojerowski šulski chór. Njedźelu, 15. decembra wot 16.30 hodź. chcedźa hudźbnicy a spěwarjo připosłucharjow ze swojimi poskitkami zwjeselić a jim tak dohodowny čas čakanja na přichad Chrystusa porjeńšić. Wšitcy su wutrobnje witani.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND