Zhromadnje do wustajeńcy
Pančicy-Kukow. Čłonojo Domowinskeje skupiny Pančicy-Kukow njech njezabudu na zhromadny wopyt wustajeńcy „Čej’ da sy“ w Budyskim Serbskim muzeju. Wobdźělnicy dojědu sej njedźelu, 8. oktobra, do Budyšina z priwatnym awtom a zetkaja so w 14 hodź. před muzejom.
Swjeća při kupowym haće
Radwor. Dalši swjedźeń we wobłuku łužiskich rybowych tydźenjow budźe jutře, sobotu, swjedźeń při Radworskim kupowym haće. Wot 10 do 13 hodź. poskića tam čerstwu a sušenu rybu.
Elektrobusy za dołhodobny přichod
Wojerecy (AK/SN). Wojerowska wobchadna towaršnosć chce wobstatk swojich jězdźidłow wot tuchwilu 21 busow wo wosom elektrobusow rozšěrić. K tomu přińdu wotpowědne móžnosće nabiwanja a wuhotowanje zamkarnje. Nimo toho chcedźa wuwiwać turistiski wobchad z Wojerec do Hórnikečanskeje Energijoweje fabriki, do Čornochołmčanskeho Krabatoweho młyna a do Dubrjenskeho bahna. „Cyłkowna inwesticija ma wobjim 7,8 milinow eurow. Nadźijamy so spěchowanja 90 procentow z hornca za změnu strukturow. Je to najwjetša inwesticija wobchadneje towaršnosće w zašłych 40 lětach“, wuzběhny jednaćel Stefan Löwe na zašłym posedźenju Wojerowskeje měšćanskeje rady.
Elektrobusy maja ze „zelenej milinu“ jězdźić, kotruž dobywaja zastaranske zawody VBH ze słónca, wětřika a dalšich wobnowjomnych energijow. Po słowach jednaćela jědu nowe jězdźidła měrnišo hač dotalne, štož budźe na přikład na dobro staršich ludźi z rolatorom. Jězdźenje z milinu ma nimo toho tuńše być hač z ćěriwom. Přidatny efekt je, zo móža sydlišćo Hórnikecy do syće zapřijeć.
Policija (06.10.23)
Pjenjezy pokradnyli
Worklecy. Z njewšědnym padustwom zaběra so policija nětko we Worklecach. W nocy na srjedu zadobychu so tam paduši do twarjenja na Šulskej. Kaž policija dale zdźěli, pokradnychu paduši škleńčane sudobjo, w kotrymž běchu wjacore sta eurow hotowych pjenjez. Nimo toho nasta něhdźe 300 eurow wěcneje škody.
Plesternaki mjetali
Wojerecy. Plesternaki su njeznaći minjene dny we Wojerecach do woknow twarjenja na Rybarskej mjetali. Njedočinkam pak so njeporadźi, škleńcu woknow rozbić. Přiwšěm nasta 2 000 eurow škody.
„Pola nas hewak ničo njeje“
Wjesny klub Lutobč-Měrkow w nowych rumnosćach dźěło zahajił
Lutobč (SN/MWj). Wulki zawod za ratarsku techniku Femtech drje je to prěnje, štož čłowjekej w zwisku z Lutobčom do mysli přińdźe. Hewak je lědma přičiny sej do małeje wsy pola Radworja dojěć. To móhło so w přichodźe změnić. Přetož wot septembra ma Wjesny klub Lutobč-Měrkow na terenje předewzaća Femtech nowe rumnosće, kotrež chcedźa čłonojo nětko najwšelakorišo wužiwać.
Předźernja budźe zetkawanišćo
Nowe Město (AK/SN). Wotewrjeny wobswětokubłanski a zetkawanski centrum nastawa na kromje Noweho Města nad Sprjewju. Za to přetwarjeja tuchwilu fabrikowe twarjenje bywšeje předźernje drjewjaneje wołmy. Projekt ma towarstwo Předźernja wudźeržliweho žiwjenja w swojej horšći. „Naše twarnišćo je projekt k sobučinjenju“, podšmórnje čłon towarstwa a projektowy nawoda Adrian Rinnert. „Pola nas sej eksperimentowanje z alternatiwnymi twaršćiznami a technikami wuraznje přejemy.“
Na wotžnjatych kukuricnišćach Hornjeje Łužicy wuhladaš tuchwilu ...
Krótkopowěsće (06.10.23)
Myto za wusahowace dźěło
Kamjenc. Kamjensku měšćansku biblioteku G. E. Lessinga počesća z lětušim Sakskim mytom knihownjow. Tole je ministerka za kulturu, Barbara Klepsch (CDU), dźensa w Drježdźanach wozjewiła. Zarjadnišćo přesadźi so w kruhu dźewjeć wulkich a mjeńšich bibliotekow ze wšeho swobodneho stata, kotrež su so wo myto požadali. Z 10 000 eurami dotěrowane wuznamjenjenje přepodadźa 1. nowembra w Kamjencu oficialnje.
Wuspěšna kubłanska jězba
Budyšin. Župna kubłanska wuprawa po slědach Hadama Bohuchwala Šěracha do Budyšinka a na to do pčólnicy „Regina“ w Konjecach minjenu sobotu bě wulki wuspěch. Tak posudźowaše předsydstwo župy „Jan Arnošt Smoler“ wjeršk skutkowanja w požnjencu na swojim wčerawšim posedźenju. Wosebje zetkanje ze Serbami w Konjecach wuchwalowachu sej wuprawnicy, wšitkim spodobaše zhromadne kofejpiće, spěwanje a serbska bjesada.
Ze serbskim podźělom
Kak cebrasmuhi před muchami škitaja
Nic jenož na wsach, ale tež w městach maja mnozy domjacy skót. Něchtóžkuli nimo toho drobny skót plahuje. Wšitcy so wo strowotu swojich dwu- abo štyrinohatych lubuškow prócuja. K tomu přinošować chce naša serija z pokiwami z weterinarneje mediciny. (16)
„Štóž chce lěćo měć, dyrbi kuntwory znjesć“, praji serbske přisłowo. Porno nam čłowjekam pak njemóže so skót cyle jednorje ze sprayjom přećiwo insektam napryskać abo do chłódneje chěže hić, hdźež škit před woknami zadźěwa, zo bychu muchi, kuntwory atd. do jstwy lećeli.
Wosebje konje maja swoju lubu nuzu z njeprošenymi hosćimi, kaž ćelčkami (Bremsen). Runje w lěćnym času jich wóń konjow wosebje wjele přiwabja. Konje njeznjeměrnja jeno šwórčenje wokoło woči a wuši, ale tež bolostne kusnjenje krejlačneho překasanca.
Zhubjeny dokument zaso maja
W Němcach chcedźa wjesnu chroniku zestajeć a wšelake žórła wužiwać
Němcy (AK/SN). Wot lěta 2024 chcedźa w Němcach wobšěrnu chroniku zestajeć. Wužiwać chcedźa za to zapiski wobydlerjow a towarstwow kaž tež šulsku a gmejnsku chroniku wot 1825 hač do 1949. Tole rjekny wjesny předstejićer Eugeniusz Diesterheft předwčerawšim na wjesnej žurli. Składnostnje lětušeje 775. róčnicy Němcow je tam mała wustajeńca widźeć. Wona pokazuje z dokumentami a wobrazami dopomnjenki wjesneho a młodźinskeho kluba, wohnjoweje wobory, seniorow a pěstowarnje „Pumpot“.
Policija (05.10.23)
Zawinowar so přizjewił
Wojerecy. Hižo minjeny pjatk je so na parkowanišću Wojerowskeje kupnicy wobchadne njezbožo stało. Zawinowar pak so zminy. Předwčerawšim so muž na policajskim rewěrje přizjewi a njezbožo přizna. Při tym so wukopa, zo 65lětny hižo wot julija žanu jězbnu dowolnosć njewobsedźi a tuž awto scyła wodźić směł njeby.
