Wěcowne dźěło w srjedźišću stało

štwórtk, 27. junija 2019 spisane wot:

W mnohich městach a gmejnach schadźu­ja so tele dny komunalne parlamen­ty k swojemu poslednjemu posedźenju w aktualnej wólbnej dobje. Wčera bě tomu­ tak w Kulowje.

Kulow (AK/SN). Wólbna doba 2014– 2019 so nachila. W tym času přewažowaše w Kulowskej měšćanskej radźe konstruktiwne wěcowne dźěło. Tole podšmórny měšćanosta Markus Posch (CDU) na wčerawšim posedźenju měšćanskich radźićelow. „Dohromady přewjedźechmy 34 posedźenjow, na kotrychž mějachmy 205 wobzamknjenjow na blidźe, 193 z nich bě jednohłósnych. Radźićeljo wšěch frakcijow su na dobro města hromadźe dźěłali“, bilancowaše Markus Posch, kiž je wot lěta 2014 w zastojnstwje.

Radźićeljo njejsu so jenož w Kulowje schadźowali. Jednotliwe posedźenja zarjadowachu tež w Du­brjenku, Mučowje a Kulowcu. To chcedźa tež přichodnje wobchować. Na te wašnje wot wobydlerjow we wsy a wo jich starosćach wjace zhonja.

Trochu kaž za čas Indianow w Americe čuješ so při kolesowanskej šćežce z Njebjelčic do Němskich Pazlic. Tam plahuje wobsedźer pjeć bizonow, kajkež hewak w našich kónčinach jeno zwěrjency maja. Za nje je pastwu z masiwnym płotom wobhrodźił. Nimojěducych plahowar na tafličce informuje, zo nimaja bizony picować, dokelž wone jenož trawu žeru a znjesu. Foto: SN/Maćij Bulank

Na šuli budu dale twarić

štwórtk, 27. junija 2019 spisane wot:

Pančicy-Kukow (SN/MiR). Šula Ćišinskeho w Pančicach-Kukowje budźe dale přetwarjena a saněrowana. Sakski statny sekretar za kultus Herbert Wolff je wčera Pančičansko-Kukowskemu wjesnjanosće Markusej Kreuzej (CDU) a nawodnicy šule Jadwize Čižankowej přepodał přizwolenje wo spěchowanju nimale 1,1 miliona eurow. Pjenjezy su z programa Zwjazka „Mosty za přichod“ a z programa za twar šulow Sakskeje, kotryž ma swój zakład w etaće swobodneho stata.

Srědki zasadźić chcedźa na kubłanišću za nowu wohnjoškitnu připrawu, do kotrejež słušeja wuchowanske a ćěkanske puće. Dale budźe šulska awla powjetšena. Muzej Ćišinskeho ma so na druhim městnje w přizemju zarjadować, a nastać ma rumnosć za mjeńše zarjadowanja.

Kapałku móža ponowić

štwórtk, 27. junija 2019 spisane wot:

Wobšěrne twarske nadawki za wohnjoškit w zakładnej šuli přepodali

Hórki/Chrósćicy (JK/SN). Swoje poslednje posedźenje do lětnjeje přestawki a scyła poslednje wólbneje doby přewjedźechu Chróšćanscy gmejnscy radźićeljo wčera w domje Hórčanskeje wohnjoweje wobory. Za nahladnu ličbu naćiskow dyrbjachu­ so horcoty dla połnje koncentrować. Poměrnje lochki zazběh mějachu z tym, wobzamknyć wudospołnjace twarske wustawki za Chrósćicy a Hórki, za ležownosće, hdźež maja jednoswój­bowe domy nastać. K tomu poda zastupjerka planowanskeho běrowa Panse trěbne wujasnjenja. Po jednohłósnym wobzamknjenju wustawki zjawnje wupołoža. Woby­dlerjo kaž tež zastupjerjo zjawnych za­jimow změja tak składnosć, sej je bliže wobhladać.

Sobudźěłaćerjo hladarnjow maja tež w ćopłym počasu wosebitu zamołwitosć za swojich wobydlerjow. Kursana-domicil w Běłej Wodźe je na horce dny derje nastajeny a poskića k wobjedu mjez druhim tež zymne jědźe. Popołdnju přijědźe lodowe awto. Wčera su wuměnkarjam samo mały bazenk ze zymnej wodu spřihotowali a jim wočerstwjace napoje poskićili. Foto: Joachim Rjela

Krótkopowěsće (27.06.19)

štwórtk, 27. junija 2019 spisane wot:

Srědki za strukturnu změnu

Berlin. Na swojim posedźenju je eta­towy wuběrk zwjazkoweho sejma wčera mjez druhim wobzamknył, přidatnje 57,4 miliony eurow za zaměstnjenje wotnožkow Němskeho centruma za lětarstwo a astronawtiku (DLR) we Łužicy nałožić. To zdźěla zapósłanc Thomas Jurk (SPD) na swojej internetnej stronje.

Młodownje přewšo powabne

Kamjenica. 22 młodownjow w Sakskej je dźeń a woblubowanišich. Loni je tam cyłkownje 142 400 dźěći a dorosćenych přenoco­wało. Lěta 2017 bě Krajny zwjazk skutka młodownjow Sakskeje něhdźe 141 000 hosći zličił. Rozrost přenocowanjow złožuje so předewšěm na poskitki swójbam, wuzběhny rěčnica skutka młodownjow Julia Nadler powěsćerni dpa. Najwjace přenocowarjow měješe Drježdźanski młodźinski hóstny dom.

Tež Łužica testowy region

Policija (27.06.19)

štwórtk, 27. junija 2019 spisane wot:

Zawinowarja njezboža wuslědźili

Brěžki. Dźakowano pokiwam wobydlerjow wuslědźichu nětko zawinowarja wobchadneho njezboža, kotrež bě so tydźenja mjez Brěžkami a Kulowcom stało. Tam bě so wodźer slěbrobarbneho Nissana mopeda šmórnył a ćeknył. 17lětny mopedist a 13lětna sobujěduca so zdźěla ćežko zraništaj. Kaž policija zdźěli, bě 62lětny muž zražku zawinował. Wón změje so nětko ćeknjenja z městna nje­zboža a zapowědźeneje pomocy dla na sudnistwje zamołwić.

Tuchwilne njewšědnje horce wjedro mnohich ludźi poćežuje. Štóž pak ma doma něšto drobneho skotu a trjeba w zymje nimo syna tež wotawu, tón tele dny wužiwa a nětko druhi raz swoje składy napjelnja. Wčera pozastachmy pola Wićazec w Šunowje, kotřiž runje wotawu dźěłachu. Foto: SN/Maćij Bulank

Prěnje twarske nadawki přepodali

srjeda, 26. junija 2019 spisane wot:

Pančicy-Kukow (SN/MWj). W běrowowym twarjenju zarjadniskeho zwjazka Při Klóšterskej wodźe w Pančicach-Kukowje su nětko w poslednjej horcej fazy přihotow na energetiske saněrowanje domu. Z nim chcedźa po wšěm zdaću spočatk awgusta započeć. Na wčerawšim poslednim posedźenju zastupjerjow pjeć sobustawskich gmejnow nachilaceje so wólbneje doby přepodachu twarskim firmam prěnje nadawki. To su hłownje te, kotrež dyrbja jako prěnje zwoprawdźić.

Wjedro wšěm wulke wužadanje

srjeda, 26. junija 2019 spisane wot:

Štóž runje dowol nima, tón ma tele dny chětro horce wjedro znjesć. Hač w běrowje, nakładnym awće abo na twarnišću – čłowjek so lědma wjeseli, hdyž je hižo dopołdnja 30 stopnjow a wjace.

Rakecy (aha/SN). Horcoće wosebje wustajeni su twarscy dźěłaćerjo, kotřiž maja nimo toho hišće ćežke ćělne dźěło zmištrować. Dźěłaćerjo Hórčanskeje Weh­nertec firmy mějachu předwidźane, parkowanišćo před Rakečanskim nakupowanišćom asfaltować. To pak při tuchwilnych temperaturach móžno njeje. Tohodla so najprjedy hinašim hłuboko­twarskim dźěłam wěnuja, kaž nawoda zawoda Ronald Thote rozłoži. Po jeho słowach smědźa dźěłaćerjo hižo připoł­dnju dźěłać přestać a nadhodźiny brać.

Kulowski ćěsla Milan Šefer swojim dźěłaćerjam do transportera kašćik wody staji, prjedy hač na twarnišća wotjědu. Woni drje su jara rozdźělne wjedro zwučeni, přiwšěm spytaja na třěchach nic runje tam dźěłać, hdźež so słónco staja.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND