Mandźelskaj ze žadnym jubilejom

pjatk, 18. septembera 2015 spisane wot:

Na 65 zhromadnych lět mandźelstwa zhladujetaj w Serbskich Pazlicach Zala a Beno Šnajdrec. 19. septembra 1950 je jeju farar Jurij Handrik w Njebjelčanskej cyrkwi zwěrował. Mjeztym zo je njewjesta w běłym šaće, zešitym wot Njebjelčanskeje šwalče Marje Lehmanoweje, před wołtar stupiła, bě nawoženja w čornej sukni a z cylindrom­. Dwaj dnjej do toho bě jeju gmejnski radźićel a zdobom stawnik Jakub Cyž w swojej dobrej stwě, dźensnišej Cyžec blidarni, stawnisce zmandźelił.

Beno Šnajder narodźi so 28. apryla 1925 swójbje skałarja w Smjerdźacej. Wuchodźiwši 8. šulski lětnik nawukny wón pola Jakuba Korjeńka w Smječkecach powołanje mulerja. 1943 slědowa­štej dźěłowa słužba w Pomorskej a wukubłanje na panceroweho grenaděra w Norwegskej. Jeho jednotku zasadźichu před Leningradom, pozdźišo pak přepołožichu ju do južneje Němskeje. W Awstriskej přińdźe Beno Šnajder najprjedy do ameriskeje na to do sowjetskeje wójnskeje jatby. Hakle w nowembru 1947 so wón domoj wróći. Tu dźěłaše w Kamjenskej twarskej firmje Dr. Reif.

Oficialnje wotewrěli su wčera nowy kreatiwny wotdźěl „Et labora“ w dźěłarnjach za zbrašenych swjateho Michała w Pančicach-Kukowje. Tam witaše nawoda Handrij Ošika (naprawo) nimo mnohich dalšich hosći zapósłanču zwjazkoweho sejma Marju Michałkowu­ (CDU, nalěwo). Tule móža sej zajimcy keramiske wudźěłki po swójskich přećach zhotowić dać. W nowonastatym wobchodźe dóstanješ keramiske twory, swěčki a dalše wudźěłki. Foto: Feliks Haza

W Delanach pěstowarnja dróša

pjatk, 18. septembera 2015 spisane wot:

Gmejnscy radźićeljo wyši staršiski přinošk wobzamknyli

Róžant (aha/SN). Přiměrić staršiski přinošk za žłobik, pěstowarnju a hort bě hłowna tema wčerawšeho posedźenja gmejnskeje rady Ralbicy-Róžant. Za kubłanišćo „Dr. Jurij Młynk“ w Ralbicach, kotrež je w nošerstwje Serbskeho šul­skeho towarstwa, wučinješe wot lońšich cyłkownych kóštow 717 000 eurow gmejnski podźěl 200 000 eurow. Z roz­šěrjenjom žłobika w Smjerdźacej rozrostu cyłkowne kóšty na wjace hač 800 000 eurow, gmejnski podźěl powjetši so tak wo dalše 74 000 eurow. Radźićeljo tuž rozwažowachu, hač měł so staršiski podźěl­ za dźewjećhodźinske žłobikowe městno wot tuchwilu 160 eurow na 180 abo samo 185 eurow zwyšić.

Přewodźany wot hewrjekanja skupiny demonstrantow a samo namócnosćow je wčera wječor prěni bus z ćěkancami do Biskopic dojěł. Policija dyrbješe zakročić. Požadarjo azyla su tam zaměstnjeni w něhdyšim tekstilnym zawodźe, kotryž skići 400 wosobam městno. Mjeztym su tři busy do Biskopic dojěli. Přebywanišćo běchu krótkodobnje spřihotowali. Foto: Rico Löb

Krótkopowěsće (18.09.15)

pjatk, 18. septembera 2015 spisane wot:

Schulz warnuje Europu

Berlin. Do wurjadneho wjerška krizy ćěkancow dla je prezident Europskeho parlamenta Martin Schulz před rozpadowanjom kontinenta warnował. „Europa je w špatnym stawje“ rjekny politikar SPD dźensa w Berlinje, hladajo na zwadu wo rozd­źělenje ćěkancow na kraje EU. Wjeršk statnych a knježerstwowych šefow ma so přichodnu srjedu wotměć.

800 pašowarjow ludźi w jastwje

Mnichow. W Bayerskej lepja dźeń a wjace pašowarjow ludźi. Nimale 800 z nich sedźi tuchwilu w přepytowanskej jatbje, kaž rěčnica justicneho ministerstwa w Mnichowje dźensa zdźěli. Dokelž su městna w přepytowanskich jastwach mjeztym wućežene, dyrbja tež normalne jastwa za pašowarjow wužiwać.

W hali sněhakować

Praha. Skupina čěskich předewzaćelow a sportowych funkcionarow chce blisko stolicy Prahi krytu sněhakowarsku halu twarić. Nastać ma 500 metrow dołha a 70 metrow šěroka indoorpista. Projekt planuja, dokelž su sněhakowarske sezony w čěskich horach njedosahaceho přirodneho sněha dla dale a krótše. Nowa pista pak móhła wot septembra hač do junija wužiwajomna być.

Policija (18.09.15)

pjatk, 18. septembera 2015 spisane wot:

Zhorjelc. Dźakowano spěšnemu pokiwej wobydlerja móžeše policija w Zhorjelcu wčera paducha lepić. Wobydlerjej bě podhladne, zo młodostny, jako jeho w rańšich hodźinach na puću wuhlada, swoje koleso pušći a ćekny. Swědk prawje reagowaše a informowaše policiju. Wobsadka policajskeho awta na to w bliskosći 18lětneho wuhlada a nachwilnje zaja. Jako­ jeho přepytowachu, namakachu nimo­ wšelakeho gratu k zadobywanju tohorunja nóž a powětrowu trašawku. Kaž so wukopa, steješe młody muž tež hišće pod wliwom drogow. Wón změje so nětko padustwa z brónjemi dla zamołwić. Zhorjelčanej pak so policija za jeho spěšny pokiw, z kotrehož pomocu mó­žachu młodostneho paducha lepić, wuraznje dźakuje.

Škotarjo sej zhromadnje wulećeli

pjatk, 18. septembera 2015 spisane wot:

Jónu wob lěto zarjaduja sej serbscy seniorojo-škotarjo wulět, na kotryž sej swoje mandźelske, partnerki a přećelow přeprošeja. Tak wulećachu sej wšitcy zhromadnje minjenu wutoru na jězbu z busom do Lubija­ a wokoliny.

Naš škotowy přećel Měrćin Nowak nas wěcywustojnje a wušiknje po swojej domiznje wodźeše. Jako do Lubija dojědźechmy, bě nam šofer busa hižo rańši słódny piknik spřihotował. W měsće wopytachmy znaty twarski pomnik domu Schminke, pohladachmy na ležownosć krajneje zahrodneje přehladki a runje tak na nowu indu­strijowu štwórć. Po wo­bjedźe na Lubijskej horje dachmy sej wuhlad z hory a wocloweje wěže na našu­ rjanu do­miznu lubić.

Chlěby 30 pjekarnjow je dźensa André Bernatzky ze Sakskeje akademije němskeho pjekarstwa w Budyšinje pruwował. Něhdźe połojca chlěbow dósta złoty predikat, z čehož wotwodźa wón dobre kwalitne dźěło pjekarjow. Jemu přidźěłachu před­sydźa pjekarskich­ zjednoćenstwow Michael Schlappa, Lutz Neumann a Norbert Brězan (wotlěwa). Foto: SN/Maćij Bulank

Steja k swojemu wobzamknjenju

štwórtk, 17. septembera 2015 spisane wot:

Rakecy (AR/SN). Reagujo na diskusije a tukanja w zjawnosći Rakečanski wjesnjanosta Swen Nowotny (CDU) na wčera­wšej zhromadźiznje gmejnskeje rady wobkrući, zo so na dotalnych wotpohladach komuny k zaměstnjenju požadarjow azyla ničo njezměni. Dźesać bydlenjow ze swójskeho wobstatka běchu Budyskemu wokrjesej k wužiwanju poskićili. W šěsć bydlenjach su hižo ćěkancy za­­měst­njeni, štyri su swobodne. Dalše imo­bilije njejsu k dispoziciji. Tele jasne wuprajenje móžeše njewšědnje wulka ličba hosći posedźenja na wědomje wzać, wjace hač dwaceći ludźi bě přišło.

Ćežišćo zhromadźizny pak tworjachu dypki, kotrež zaběrachu so z napjatym financnym połoženjom gmejny. Komornica Franziska Pfeiffer rozłoži staw hospodarskeho konsolidowanja na zakładźe konkretnych ličbow. Nimale hižo stajny hósć na zeńdźenjach Rakečanskeho parlamenta prof. Gerald Svarovsky přednošowaše na zakładźe inwesticiskich objektow zašłych lět wo tym, kotre wuskutki ma přechod wot dotalneho kameralistiskeho hospodarjenja na doppikowe.

Wotstronjeja škody

štwórtk, 17. septembera 2015 spisane wot:

Nadawki krok po kroku rozdawaja

Kubšicy (CK/SN). K wotstronjenju škodow wulkeje wody 2013 da Kubšiska gmejna nětko dróhu Při Albrechtowce w Jenkecach sporjedźeć. Tam bě po słowach wjesnjanosty Olafa Teicherta (njestronjan) k škodam dóšło, dokelž njebě wotwodźenje wody zaručene. Nětko chcedźa za 19 200 eurow asfalt a gulije sporjadkować. Pjenjezy dóstanu ze spěchowanskich horncow Sakskeje. Twarski nadawk přepodachu na wčerawšim posedźenju gmejnskeje rady Delnjokinjanskemu twarskemu zawodej.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND