Policija (16.12.15)

srjeda, 16. decembera 2015 spisane wot:

Chelno. Nimale zražku z policajskim awtom zawinił by 32lětny kolesowar, kiž bě zawčerawšim wječor na zwjazkowej dróze B 96 z Chelna do Čorneho Hodlerja po puću, jako nadobo na tamny bok puća zajědźe. Policisća chcychu jeho ně­hdźe w 22.30 hodź. kontrolować, muž pak ćekny na polo. Tam jeho skónčnje tola dosahnychu a naměrichu pola njeho 1,12 promilow alkohola w kreji. Nimo toho bě drogowy test po­zitiwny. Jako chcychu pozdźišo 32lětnemu krej brać, so wón mócnje wobaraše, tak zo změje so nětko přidatnje zamołwić.

Za dalšu serbsku wučbu w Barće

srjeda, 16. decembera 2015 spisane wot:

Adwentnička Malešanskeje Domowinskeje skupiny njeskići jeno přiležnosć, zhladować na wjerški nachilaceho so lěta. Nimo wuměny myslow wo klětušich předewzaćach rěčachu Domowinjenjo na swojej njedawnej bjesadźe tež wo starosćach nastupajo serbske naležnosće.

Překwapjenku dožiwichu tele dny wuměnkarjo w Ćisku na swojej adwentničce. Přišło je k nim Wojerowske dźěćatko ze swojej přewodźerku Janinu Sulkec. Mjeztym zo dźěćatko w běłych rukajcach, ze šlewjerjom před mjezwočom a ze zwónčkom w ruce wopytowarjow z hałžku pomajka­, štož přinjese zbožo a strowotu, wobdari jich přewodźerka z jabłukami. Foto: Johann Tesche

Prěni raz adwentne wiki přewjedli

wutora, 15. decembera 2015 spisane wot:

Štož maja we wjacorych dalšich wsach tež, chcychu sej rady tohorunja w Róžeńće wuhotować: adwentne wiki. To pak po wšěm zdaću scyła tak jednore njeje, kaž so při přihotach pokaza.

Róžant (jh/SN). Hižo loni w hodowniku běchu so Róžeńčanske młode swójby a tamniša młodźina na 1. adwentne wiki dojednali, dokelž tajke druhdźe kaž w Konjecach, Nowej Wjesce abo w Njebjelčicach tež maja. Hač do lětušeho prěnjeho adwenta pak docyła tak prawje jasne njebě, hač wiki scyła budu. Prawy organizator a wuhotowar hišće pobrachowaše. Nichtó nochcyše sej kłobuk stajić.

Najnjekomplikowanišo widźachu to někotre Róžeńčanske dźěći, kotrež chodźa přewažnje w Ralbicach do zakładneje a wyšeje šule. Tam běchu tydźenja po­dobne wiki wuhotowali. Njewědźo wo tójšto přihotach su so same starali a nadawki rozdźělili – susodam, šulskim přećelam,­ staršim, dźědam abo wowkam a dalšim. Pola domownika Ralbičanskeje šule Tomaša Langi wobstarachu sej předawanske budki, nanojo a maćerje dyrbjachu so wo zastaranje starać. Róžeńčanska wjesna rada přewostaji tepjenu wjesnu rumnosć.

Na zjawny přednošk

wutora, 15. decembera 2015 spisane wot:
Budyšin. Zjawny wědomostny přednošk wotměje so štwórtk, 17. decembra, w 15 hodź. w Budyskim Serbskim instituće. Dr. Tobias Weger, stawiznar a ludowědnik a wot lěta 2004 wědomostny sobudźěłaćer Zwjazkoweho instituta za kulturu a stawizny Němcow we wuchodnej Europje (BKGE) w Oldenburgu porěči na temu­ „Hornja Łužica na němskich ‚mental maps‘ w času mjez swětowymaj wójnomaj. Strach před ‚panslawizmom‘ a ‚zadźernjenjom‘“. Přednošk zaběra so ze stereotypami, kotrež płaćachu w němskej wjetšinowej towaršnosći w 1920tych a zažnych 1930tych lětach za Serbow.

Kapałku skónčnje ponowja

wutora, 15. decembera 2015 spisane wot:

Klětuši inwesticiski program města Kulowa nětko jasny

Kulow (AK/SN). Jednohłósnje wobzamknyła je Kulowska měšćanska rada na swojim zašłym posedźenju hospodarski plan za lěće 2016 a 2017. Naprawy saněrowanja města chce Kulow z pomocu wurunanskich pjenjez w přichodnymaj lětomaj dalokož móžno wotzamknyć. „Klětu je w etaće 55 000 eurow za saněrowanje zaplanowanych a za dwě lěće potom 15 000 eurow“, rozłoži komornik Thomas Woelke.

Rjadniske sotry wjesny wobraz wobohaćili

wutora, 15. decembera 2015 spisane wot:

Worklecy (aha/SN). Z cyłkownje ně­hdźe 280 wuměnkarjow Worklečanskeje gmejny móžeše wjesnjanosta Franc Brusk (CDU) tele dny połojcu na adwentničku na žurli wjesneho hosćenca witać. Mjez přitomnymi běchu tež farar na wuměnku Rolf Hock a najskerje posledni raz w tym kruhu pjeć sotrow rjadu Bo­žeje předwidźiwosće, kotrež so bórze do maćerneho­ domu do Münstera po­dadźa. „Z ćežkej wutrobu a njerady mamy so z wami rozžohnować. Waše njesebične dźěło na dobro pacientow w bywšej chorowni kaž tohorunja zamołwite hladanje kapałki njezabudźemy. Nic naposledk pak sće naš wjesny wobraz wobohaćili“, Brusk sotry narěča.

Ze sejmika do čoła zarjadnistwa

wutora, 15. decembera 2015 spisane wot:

Wakanca na čole Budyskeho krajnoradneho zarjada po zakónčenju wólbneje doby 1. přirjadnika Steffena Domschki je nimo. Budyski wokrjesny sejmik je na swojim wčerawšim posedźenju dotalneho Łazowskeho wjesnjanostu, wokrjesneho radźićela a zastupjerja krajneho rady ze stron sejmika Udo Wićaza (CDU) za přirjadnika krajneho rady wuzwolił.

44lětny Wićaz nastupi nowe zastojnstwo 4. januara 2016. Wón přesadźi so mjez štyrjomi požadarjemi wušeho wuběra. W Budyskim wulkowokrjesu je wón prěni wokrjesny radźićel, kiž přewozmje načolne městno we wokrjesnym zarjadnistwje. Namakanska komisija sejmika, wobstejaca z předsydow jeho frakcijow, bě poručiła Wićaza wuzwolić. Za njeho hłosowaše połsta wokrjesnych radźićelow, přećiwo njemu třiceći, sedmjo so hłosa wzdachu.

Krótkopowěsće (15.12.15)

wutora, 15. decembera 2015 spisane wot:

Prědowarja zajeli

Karlsruhe. Zwjazkowe statne rěčnistwo je radikalneho islamista Svena Lauwa dźensa rano we wulkorumje Düsseldorf zajeć dało. Wumjetuje 35lětnemu prědowarjej, zo je lěta 2013 z Němskeje wuchadźejo jako podlěšena ruka w Syriskej aktiwneje teroristiskeje organizacije Jamwa skutkował. Lau je w štyrjoch padach podhladny podpěry wukrajneho teroristiskeho­ zwjazka dla.

Přećiwo próstwje hłosować

Budyšin. Budyski wokrjesny sejmik je přirjadnicu Birgit Weber społnomócnił, wuprajić so na posedźenju kulturneho konwenta 17. decembra přećiwo próstwje města Zhorjelc wo čłonstwje z prawom wothłosowanja w kulturnym rumje Hornja Łužica-Delnja Šleska. Financneje lěpšiny z toho njebudźe, runa ličba čłonow pak rozsudam njepolěkuje.

Kralestwo njedaloko Łužicy

Policija (15.12.15)

wutora, 15. decembera 2015 spisane wot:

Wojerecy. Z dotal njeznateje přičiny je wčera popołdnju woheń we Wojerowskim předawanišću za zahrodnu po­trjebu blisko lěsneho pohrjebnišća wudyrił. Při tym rozpřestrěchu so płomjenja tež na wosebitu wustajeńcu, w kotrejž předewšěm adwentne a hodowne debjenki poskićachu. Wjacore wohnjowe wobory mějachu płomjenja spěšnje pod kon­trolu, škoda je přiwšěm poměrnje wulka. Na zbožo pak so nichtó zranił njeje. Kriminalna policija nětko pruwuje, hač ma tónle pad něšto z wohenjomaj minjeny kónc tydźenja we Wojerecach činić. Tam běštej so njedźelu wječor kontejner za staru papjeru kaž tež wosobowe awto paliłoj.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND