Quo vadis přihladowarjo?

srjeda, 04. nowembera 2015
artikl hódnoćić
(0 )
Susi Glücklichowa a Janin Wachsmann při wuspěšnym bloku, Carolin Todt škita.  Foto: Pětr Bart Susi Glücklichowa a Janin Wachsmann při wuspěšnym bloku, Carolin Todt škita. Foto: Pětr Bart

Přeco, hdyž Marijine hwězdźički doma hraja, su tež volleyballisća Viktorije Worklecy hosćićel – a to w samsnym času­. Próstwy, tole změnić, zamołwići dotal njewusłyšachu. Tak so potencielny přihladowar kóždy raz praša, hač sej w Pančicach-Kukowje rjane holiča wobhlada abo radšo Worklečanskich mužow pohonja.

Marijine hwězdźički, zastupjerki wobwodneje volleyballoweje ligi, witachu tuž na třeći hrajny dźeń z mustwomaj ST Kupoj/Nowa Łuka a VV Žitawa­ 09 II minjenu sobotu w Pančičansko-Ku­kow­skej sportowej hali jenož horstku přihladowarjo­w. Žitawske mustwo bě Pančanki hižo w pokalnym předkole ze­znało a porazyło. Kupoj/Nowa Łuka jako třeći minjeneje hrajneje doby zdaše so skerje twjerdy worjech. Hač su sej Mari­jine hwězdźički na nim zuby wukusali, pokaza prěnja partija dnja.

ST Kupoj/Nowa łuka – ST Marijina hwězda 3:1 (21:25,25:10,25:22,25:13)

Pančičanski trenar Ralf Wachsmann pósła swoju najsylnišu šestku do boja. Ta njeda so wot spočatneho zastatka 1:6 zatrašić. Dypk po dypku bližeše so přećiwnikej. Z 21:20 přewza nawjedowanje a njeda je wjac z rukow. W druhej sadźbje steješe po zdaću cyle hinaše mustwo za domjace hrajerki na polu. Akcije wostachu bjez wuspěcha. Mjenje a bóle bjezradne dyrbjachu so hosćom jasnje kłonić. W přichodnym přechodźe poskići so zaso wobraz kaž na započatku. Sebjewědomje wzachu Marijine hwězdźički wotežki do rukow. Nimale kóždy nadběh so zešlachći a předskok rosćeše. Jako pokazowaše dypkowa taflička 21:16, zdaše so triumf bliski. Tola přećiwnik chcyše hišće słowčko sobu rěčeć. Wón wobradźi Marijinym hwězdźičkam najčorniši wokomik dnja. Kupoj/Nowa Łuka wuruna a zawěsći sej dobyće. Pančičanska moralka bě zlemjena, štož tež štwórta sadźba wotbłyšćowaše. Ničo njechaše so hosćićelkam wjace poradźić. Z jasnej plistu dźěchu wone do přestawki.

VV Žitawa – ST Marijina hwězda 1:3 (18:25, 8:25, 25:22, 9:25)

Do druheje hry dnja podachu so Marijine hwězdźički z nowym elanom. Dobre nazhonjenja z prěnjeho rozestajenja ze Žitawje je pohonjachu. Mjeztym zo so hóstne volleyballistki kopolachu, běžeše za domjace ćim lěpje. Dobyće zbudźi přidatne mocy. W druhej sadźbje nahromadźichu sej hižo dźesać dypkow, prjed hač so Žitawje prěni poradźi. Wysoke dobyće pak zawjedźe k lochkomyslnosći. Njetrjebawše zmylki pomhachu přećiwnikej so zaso do hry namakać. Prjed hač sej Marijine hwězdźički prawje wuwědomichu, kak so jim stanje, běchu wone třeću sadźbu přěhrali. To pak bě wolij do wohenja. Nic z nami, sej na to hrajerki wokoło kapitanki Christin Opicec prajachu. Dobyće 25:9 w štwórtym přechodźe bě tuž jasne znamjo.

Za Marijinu hwězdu hrajachu: Madlena Bartec, Cornelia Berndt, Johanna Fiegler, Anne Fünfstück, Susi Glücklichowa, Constance Gühmann, Halena Jancyna, Stefanie Montag, Christin Opicec, Anne Šołći, Carolin Todt a Janin Wachsmann.

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND